ໂລມາເຊນໂກ ສົ່ງ ຄອມມີ ນັບຍາວ ກ່ອນຊະນະຄະແນນຂາດລອຍ

ວາຊິລີ ໂລມາເຊນໂກ ຍອດນັກຊົກຊາວຢູເຄຣນ ອະດີດແຊ໊ມໂລກຮຸ່ນ ໄລເວດ 3 ສະຖາບັນ ຄືນຟອມ ຊົກ ຣິຊາດ ຄອມມີ ນັບຍາວ ກ່ອນຊະນະຄະແນນແບບເອກະພາບຂາດລອຍ ໃນການແຂ່ງຂັນຊົກມວຍ ທີ່ນະຄອນ ນີວຢອກ ເມື່ອເຊົ້າວັນອາທິດທີ່ຜ່ານມາ.

ການແຂ່ງຂັນຊົກມວຍນອກຮອບ ຮຸ່ນໄລເວດ ກຳນົດ 12 ຍົກ ທີ່ສັງວຽນເມດິສັນ ສະແຄວ ກາເດັນ ໃນມະຫານະຄອນນີວຢອກ ປະເທດສະຫະລັດ ອາເມລິກາ ເມື່ອວັນເສົາທີ 11 ທັນວາທີ່ຜ່ານມາ ຫລື ກົງການເຊົ້າວັນອາທິດ ທີ 12 ທີ່ຜ່ານມາ ຕາມເວລາປະເທດລາວ ວາຊິລີ ໂລມາເຊນໂກ ຍອດນັກຊົກຊາວຢູເຄຣນ ອະດີດແຊ໊ມໂລກຮຸ່ນ ໄລເວດ 3 ສະຖາບັນ WBC, WBA ແລະ WBO ຂຶ້ນດວນຫມັດກັບ ຣິຊາດ ຄອມມີ ນັກຊົກຊາວການາ ອະດີດແຊ໊ມໂລກຮຸ່ນດຽວກັນຂອງ IBF.

ຜົນການຊົກປາກົດວ່າ ໂລມາເຊນໂກ ເຮັດໄດ້ດີກວ່າຕັ້ງແຕ່ເລີ່ມຕົ້ນ ກ່ອນຈະຍິງຫມັດຊ້າຍ ສົ່ງ ຄອມມີ ລົງໄປນອນໃຫ້ກຳມະການນັບ 8 ໃນຍົກທີ 7 ແຕ່ປິດບັນຊີບໍ່ລົງ ແນວໃດກໍຕາມ ຍອດມວຍຢູເຄຣນ ຍັງຄົງຊົກໄດ້ເຫນືອກວ່າ ຈະຄົບ 12 ຍົກ ກ່ອນຈະຊະນະຄະແນນໄປແບບເອກະພາບຂາດລອຍ 117-110, 119-108 ແລະ 119-108 ເພີ່ມສະຖິຕິເປັນຊະນະ 16 ຄັ້ງ ເສຍ 2 ເປັນການຊະນະແບບບໍ່ຄົບຍົກ 11 ຄັ້ງ ໂດຍຄາດວ່າລາວຫນ້າຈະມີໂອກາດໄດ້ຂຶ້ນຊົກຊີງແຊ໊ມໂລກອີກເທື່ອຫນຶ່ງກັບ ຈອດ ຄຳໂບຊອສ ຈູເນຍ ເຈົ້າຂອງແຊ໊ມໂລກ 3 ສະຖາບັນ ທີ່ຫາກໍຄວ້າແຊ໊ມໄປຈາກ ທີໂອຟີໂມ ໂລເປສ ນັກຊົກຊາວສະຫະລັດທີ່ຍາດແຊ໊ມໄປຈາກ ໂລມາເຊນໂກ ກ່ອນຫນ້ານີ້ ຂະນະທີ່ ຄອມມີ ເສຍເປັນຄັ້ງທີ 4 ຫລັງຊະນະ 30 ຄັ້ງ ແລະ ເປັນການຊະນະແບບບໍ່ຄົບຍົກ 27 ຄັ້ງ.