ການເປີດຮັບບໍລິຈາກ ຄວນຖືກຕ້ອງຕາມກົດໝາຍ ແລະ ຮັບປະກັນໄດ້ຄວາມໂປ່ງໃສ

ທຸກໆການຊ່ວຍເຫລືອຈາກຄົນສູ່ຄົນ ຈາກສັງຄົມສູ່ສັງຄົມ ນັບວ່າເປັນເລື່ອງດີ ເປັນເລື່ອງທີ່ໜ້າຍົກຍ້ອງສັນລະເສີນເນື່ອງຈາກເປັນການສະແດງໃຫ້ເຫັນເຖິງນໍ້າໃຈທີ່ປະເສີດ ການເອື້ອເຟື້ອເພື່ອແຜ່ ວ່າກັນງ່າຍໆຄືການຍິນດີໃຫ້ນັ້ນເອງ. ຈາກການຍິນດີໃຫ້ທີ່ບໍ່ຫວັງສ້າງຊື່ສຽງ ການໄດ້ໜ້າໄດ້ຕາ ຈຶ່ງເກີດມີທັງບຸກຄົນ ນິຕິບຸກຄົນ ຫລື ການຈັດຕັ້ງພາກເອກະຊົນ ເປີດຮັບການບໍລິຈາກການສະໜັບສະໜູນຂອງທຸກຄົນທີ່ຫວັງດີແລະ ຕ້ອງການຊ່ວຍເຫລືອ ແບ່ງປັນໃຫ້ຜູ້ທີ່ດ້ອຍໂອກາດ ຜູ້ຫຍຸ້ງຍາກລຳບາກກວ່າ ໄດ້ມີອັນໃໝ່ທີ່ດີຂຶ້ນໃນຊີວິດ ຊຶ່ງຈຸດນີ້ມີຫລາຍຕົວຢ່າງທີ່ເຄື່ອນໄຫວຕາມຕົວບົດກົດໝາຍ, ຂະນະດຽວກັນກໍອາດຈະມີການເຄື່ອນໄຫວທີ່ຂັດກົດໝາຍ.

ຄວາມເປັນຈິງ, ການຈັດຕັ້ງສະມາຄົມໃດໜຶ່ງ ມູນນິທິໃດໜຶ່ງ… ຕ້ອງໄດ້ຮັບອະນຸຍາດ ຫລື ອະນຸມັດຈາກຂະແໜງພາກລັດກ່ຽວຂ້ອງໂດຍສະເພາະກະຊວງພາຍໃນທີ່ເປັນອົງການທີ່ຮັບຜິດຊອບໂດຍກົງ ແລະ ຢູ່ບົນພື້ນຖານປະຕິບັດຕາມດຳລັດວ່າດ້ວຍສະມາຄົມ ສະບັບເລກທີ 238/ລບ ລົງວັນທີ 11 ສິງຫາ 2017 ແລະ ຂໍ້ຕົກລົງວ່າດ້ວຍການແຕ່ງຕັ້ງເຈົ້າໜ້າທີ່ທະບຽນອົງການຈັດຕັ້ງສັງຄົມ(ສະມາຄົມມູນນິທິ)ສະບັບ 632/ພນ ລົງວັນທີ 7 ທັນວາ 2018 ແລະ ພາຍຫລັງໄດ້ຮັບການອະນຸມັດ ກໍຖືວ່າເປັນອົງການຈັດຕັ້ງສັງຄົມ ທີ່ຖືກຕ້ອງຕາມກົດໝາຍ ມີສິດເຄື່ອນໄຫວຕາມຈຸດປະສົງເປົ້າໝາຍ ທັງໄດ້ຮັບຄວາມໄວ້ເນື້ອເຊື່ອໃຈຈາກທົ່ວສັງຄົມ ໂດຍຈະເຫັນໄດ້ຈາກການບໍລິຈາກເຄື່ອງໃຊ້ຂອງສອຍ ການສະໜັບສະໜູນ ຫລື ການສົມ ທົບເງິນຜ່ານຈາກການເປັນຂົວແຫ່ງບຸນ ຊຶ່ງຈຸດນີ້ກໍຂໍສາທຸອະນຸໂມທະນາບຸນນຳດ້ວຍ.

ແນວໃດກໍດີບໍ່ວ່າຢູ່ບ້ານເຮົາເມືອງເຮົາ ຫລື ບ້ານອື່ນເມືອງໄກ ກໍຄົງໜີບໍ່ພົ້ນປາກົດການຫລອກລວງ ໂດຍການສວຍໂອກາດເອົາຄວາມຫວັງດີ ຈິດໃຈເມດຕາກະລຸນາຂອງສັງຄົມ ມາຈັດຕັ້ງ ແລະ ເຄື່ອນໄຫວຕາມເປົ້າໝາຍທີ່ຕັ້ງໄວ້ ຊຶ່ງຈຸດນີ້ກໍບໍ່ໄດ້ຢືນຢັນວ່າ: ນີ້ແມ່ນການຫລອກລວງແທ້ຫລືບໍ່? ນີ້ແມ່ນການສ້າງຜົນປະໂຫຍດໃສ່ໂຕເອງຈາກຄວາມທຸກຍາກລໍາບາກ ຄວາມເດືອດຮ້ອນຂອງຄົນອື່ນຄົນທີ່ດ້ອຍໂອກາດ ຫລືບໍ່? ນີ້ຄືປາກົດການຂອງມິດສາຊີບຫລືບໍ່?

ເລັກໆໜ້ອຍໆຈາກໃຈຂອງຜູ້ໃຫ້ກໍຄືການຫວັງເຫັນຄວາມບໍລິສຸດຂາວສະອາດ ຫວັງພົບຄວາມຖືກຕ້ອງຂອງບຸກຄົນ, ນິຕິບຸກຄົນ ຫລື ການຈັດຕັ້ງທີ່ເປີດຮັບການບໍລິຈາກ ຫລື ການເປັນຂົວແຫ່ງບຸນ ສົ່ງຕໍ່ຄວາມປະສົງ ຄວາມຫວັງດີຂອງຜູ້ໃຫ້ສູ່ຜູ້ຮັບ. ເວລານີ້ກ້າວສູ່ໜ້າໜາວແລ້ວ ແນ່ນອນຜູ້ທຸກຍາກ ອານະຖາ ດ້ອຍໂອກາດຢູ່ຫລາຍເຂດ ພວມຄອງຄອຍການຊ່ວຍເຫລືອຈາກສັງຄົມ ຫລື ຜູ້ມີຈິດໃຈເມດຕາທັງຫລາຍຊຶ່ງເມື່ອຕັ້ງໃຈຢາກເປັນຂົວຕໍ່ແຫ່ງບຸນ ກໍໃຫ້ເປັນຜູ້ໃຈບຸນແທ້ຈິງ ແລະ ທີ່ສຳຄັນຕ້ອງໄປໃຫ້ຖືກປ່ອງ ລ່ອງໃຫ້ຖືກແປວ ປະຕິບັດຕາມຕົວບົດກົດໝາຍ ຫລື ຂໍ້ກຳນົດລະບຽບຫລັກການຢ່າງຄັກແນ່.