ລັດວິສາຫະກິດໄຟຟ້າລາວ ອອກແຈ້ງການໃຫ້ພະນັກງານ-ກໍາມະກອນ ເຂົ້າປະຈໍາການປົກກະຕິ ໂດຍເລີ່ມແຕ່ວັນທີ່ 13 ທັນວາ 2021

ວັນທີ 10 ທັນວາ 2021 ນີ ລັດວິສາຫະກິດໄຟຟ້າລາວ ອອກແຈ້ງ ເລກທີ 4691/ຟຟລ.ຝຈບ ການເຖິງພະນັກງານ ໃນຂອບເຂດທົ່ວປະເທດ ໂດຍມີເນື້ອໃນດັ່ງນີ້: ໃຫ້ພະນັກງານ-ກໍາມະກອນຂອງລັດວິສາຫະກິດໄຟຟ້າລາວ ທຸກພາກສ່ວນ ເຂົ້າ ປະຈໍາການປົກກະຕິ ເລີ່ມແຕ່ວັນທີ 13 ທັນວາ 2021 ເປັນຕົ້ນໄປ ແລະ ໃຫ້ສືບຕໍ່ເພີ່ມທະວີບັນດາມາດຕະການປະຕິບັດ ການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງເຊື້ອພະຍາດໂຄວິດ 19 (COVID-19) ພ້ອມທັງປະຕິບັດ ລະບຽບຂອງ ຟຟລ ແລະ ມາດຕະການປ້ອງກັນ:

1. ໃຫ້ພະນັກງານ-ກໍາມະກອນ ຂອງລັດວິສາຫະກິດໄຟຟ້າລາວ ທຸກພາກສ່ວນ ເອົາໃຈໃສ ສືບຕໍ່ປະຕິບັດມາດຕະການການປ້ອງກັນ, ຄວບຄຸມສະກັດກັ້ນ ແລະ ແກ້ໄຂການລະບາດຂອງເຊື້ອພະຍາດໂຄວິດ19 ຕາມແຈ້ງ ການຂອງຫ້ອງວ່າການສໍານັກງານນາຍົກລັດຖະມົນຕີ, ສະບັບເລກທີ 1494/ຫສນຍ, ສະບັບລົງວັນທີ 14 ພະຈິກ 2021.

2. ໃຫ້ຫ້ອງການຜູ້ອໍານວຍການ, ບັນດາຝ່າຍຕ່າງໆ, ບັນດາສາຂາ ທີ່ຂຶ້ນກັບ ຝ່າຍລະບົບຈໍາຫນ່າຍ ແລະ ພະແນກລະບົບສົ່ງ ທີ່ຂຶ້ນກັບ ຝ່າຍຄຸ້ມຄອງລະບົບສົ່ງ ອ້ອມຂ້າງລັດວິສາຫະກິດໄຟຟ້າລາວ ໃນຂອບເຂດທົ່ວປະເທດ ແຈ້ງຕໍ່ພະນັກງານ-ກໍາມະກອນ ທີ່ຂຶ້ນກັບຕົນໃຫ້ເຂົ້າປະຈໍາການປົກກະຕິ ໂດຍເລີ່ມແຕ່ວັນທີ່ 13 ທັນວາ 2021ເປັນຕົ້ນໄປ ແລະ ໃຫ້ເອົາໃຈໃສ່ປະຕິບັດຕາມໂມງເວລາຕາມລະບຽບວາງອອກຢ່າງເຂັ້ມງວດ.

3. ໃນກໍລະນີພະນັກງານ-ກໍາມະກອນ ລັດວິສາຫະກິດໄຟຟ້າລາວ ບຸກຄົນໃດຫາກຄິດວ່າຕົນຢູ່ໃນກຸ່ມສ່ຽງ ແມ່ນໃຫ້ແຈ້ງຕໍ່ຝ່າຍທີ່ຕົນຂຶ້ນກັບເພື່ອຮັບຊາບ ພ້ອມທັງໄປກວດຫາເຊື້ອ ແຕ່ບໍ່ອະນຸຍາດໃຫ້ພັກກັກຕົວຈົນກວ່າ ຈະມີເອກະສານຢັ້ງຢືນຈາກຄະນະສະເພາະກິດ ຫຼື ແພດຫມໍທີ່ກ່ຽວຂ້ອງຈິ່ງສາມາດກັກຕົວໄດ້ ໃນການກັກຕົວແມ່ນບໍ່ໃຫ້ເກີນ 05 ວັນ. ຫລັງຈາກນັ້ນ ໃຫ້ໄປກວດຫາເຊື້ອຄືນໃໝ່ ຫາກບໍ່ພົບເຊື້ອແມ່ນໃຫ້ເຂົ້າປະຈໍາການເປັນປົກກະຕິ. ສໍາລັບບຸກຄົນໃດທີ່ຕິດເຊື້ອພະຍາດໂຄວິດ ແລະ ໄດ້ຮັບການຮັກສາຄົບຕາມທີ່ຄະນະສະເພາະກິດກໍານົດແລ້ວ ແມ່ນອະນຸຍາດໃຫ້ສືບຕໍ່ພັກກັກຕົວເພີ່ມອີກ 7 ວັນ ຕາມລະບຽບຂອງຄະນະສະເພາະກິດກໍານົດໄວ້.

4. ໃນກໍລະນີຫາກມີ ພະນັກງານ-ກໍາມະກອນ ຂອງລັດວິສາຫະກິດໄຟຟ້າລາວ ບຸກຄົນໃດຫາກສວຍໃຊ້ໂອກາດ ເປັນຕົ້ນແມ່ນການປະຕິບັດໂມງເວລາໄປ-ມາ (ມາຊ້າ-ເມືອໄວ ຫລື ຂາດການ) ແມ່ນມອບໃຫ້ບ່ອນທີ່ຜູ້ກ່ຽວ ສັງກັດເປັນຜູ້ສຶກສາອົບຮົມຜູ້ກ່ຽວ ພ້ອມທັງໃຫ້ຂຽນໃບສໍາຫລວດ ແລະ ຫລັງຈາກນັ້ນໃຫ້ປະກອບເອກະສານ ສົ່ງໃຫ້ຝ່າຍຈັດຕັ້ງ ແລະ ບໍລິຫານ ເພື່ອສັງລວມໄວ້ເປັນຂໍ້ມູນ.
ມອບໃຫ້ພາກສ່ວນທີ່ກ່ຽວຂ້ອງເປັນເຈົ້າການ ໃນການຕິດຕາມ ແລະ ລາຍງານການເຄື່ອນໄຫວຂອງພະນັກງານ-ກໍາມະກອນ ພາຍໃນສັງກັດຕົນຢ່າງໃກ້ຊິດພ້ອມທັງລາຍງານໃຫ້ ຝ່າຍຈັດຕັ້ງ ແລະ ບໍລິຫານ ເພື່ອຮັບຊາບທຸກໆ ທ້າຍອາທິດ.

5. ໃຫ້ແຕ່ລະພາກສ່ວນແຈ້ງພະນັກງານພາຍໃນສັງກັດຂອງຕົນ ຜູ້ທີ່ບໍ່ທັນໄດ້ຜ່ານການສັກຢາປ້ອງກັນພະຍາດໂຄວິດ19 ໃຫ້ຮີບຮ້ອນໄປສັກຢາເພື່ອປ້ອງກັນການຕິດເຊື້ອຢູ່ບັນດາໂຮງຫມໍ ຫຼື ແຕ່ລະຈຸດທີ່ມີການສັກຢາປ້ອງກັນພະຍາດໂຄວິດ19.

6. ພະນັກງານ-ກໍາມະກອນ ລັດວິສາຫະກິດໄຟຟ້າລາວ ທີ່ຕິດເຊື້ອພະຍາດໂຄວິດ ຫລື ຢູ່ໃນກຸ່ມສ່ຽງທີ່ເກີດຈາກການລະເມີດມາດຕະການປ້ອງກັນທີ່ທາງສະເພາະກິດວາງອອກ ເປັນຕົ້ນການຊຸມແຊວສັງສັນ, ການເດີນທາງໄປໃນເຂດທີ່ມີການກໍານົດຫ້າມ (ຮ້ານນວດ, ຮ້ານສະປາ, ສວນອາຫານ ແລະ ສະຖານທີ່ອື່ນໆ ທີ່ຄະນະສະເພາະກິດກໍານົດໄວ້) ໃນເວລາປິ່ນປົວກໍລະນີດັ່ງກ່າວຖືວ່າຜູ້ກ່ຽວຂາດການໂດຍບໍ່ມີເຫດຜົນ.

7. ໃຫ້ແຕ່ລະພາກສ່ວນລາຍງານລະອຽດກ່ຽວກັບບຸກຄົນທີ່ຕິດເຊື້ອ ແລະ ຢູ່ໃນກຸ່ມສ່ຽງແຕ່ລະກໍລະນີ ຕໍ່ຄະນະສະເພາະກິດ ຟຟລ ຮັບຊາບໂດຍດ່ວນ. ສໍາລັບບັນດາສາຂາທີ່ຂຶ້ນກັບຝ່າຍລະບົບຈໍາໜ່າຍ, ບັນດາພະແນກ ລະບົບສົ່ງພາກ ທີ່ຂຶ້ນກັບຝ່າຍຄຸ້ມຄອງລະບົບສົ່ງ ໃຫ້ລາຍງານສະພາບການໃນແຕ່ລະວັນໃຫ້ຄະນະສະເພາະກິດຮັບຊາບ ທຸກວັນກ່ອນເວລາ 14:00ໂມງ.
8. ໃຫ້ທຸກພາກສ່ວນຖືເອົາວຽກງານການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດພະຍາດໂຄວິດ19 (COVID-19) ເປັນປັດໃຈສໍາຄັນຫນຶ່ງ ຄືດັ່ງວຽກງານວິຊາສະເພາະ ບໍ່ໃຫ້ມີການຖືເບົາ ຊຶ່ງຈະເກີດຜົນຕໍ່ ການແຜ່ລະບາດຂອງເຊື້ອພະຍາດດັ່ງກ່າວ.
ດັ່ງນັ້ນ, ຈຶ່ງຂໍແຈ້ງມາຍັງບັນດາທ່ານ ເພື່ອຮັບຊາບ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ