ຮອຍອັນ ຕົ້ນແບບເມືອງທຳອິດໃນຫວຽດນາມ ປະກາດເລີກຂາຍ ບໍລິໂພກຊີ້ນໝາ-ແມວ ສ້າງພາບພົດເມືອງທ່ອງທ່ຽວຊັ້ນນຳ

ຮອຍອັນ ເມືອງທ່ອງທ່ຽວຍອດນິຍົມຂອງຫວຽດນາມໃຫ້ຄຳໝັ້ນຈະເລີກຂາຍ, ບໍລິໂພກຊີ້ນໝາ ແລະ ແມວ ຕົ້ນແບບເປັນເມືອງທຳອິດຂອງປະເທດທີ່ປະຊາຊົນບາງສ່ວນເບິ່ງວ່າສັດເຫລົ່ານີ້ເປັນອາຫານອັນເລີດຫລູ.

ວັນທີ 10 ທັນວາ 2021, ສຳນັກຂ່າວເດິສເຕຣດທາມ (The Straits Times) ລາຍງານວ່າ: ຫວຽດນາມມີການບໍລິໂພກຊີ້ນໝາຫລາຍເປັນອັນດັບ 2 ຮອງຈາກຈີນ ໂດຍໃນແຕ່ລະປີມີໝາຖືກນຳມາບໍລິໂພກປະມານ 5 ລ້ານໂຕ, ຂະນະທີ່ບາງຄົນຍັງມີຄວາມເຊື່ອວ່າ: ຊີ້ນໝາເປັນອາຫານທີ່ຊ່ວຍຂັບໄລ່ສິ່ງອັບປະມົງຄຸນ.

ຜູ້ບໍລິຫານເມືອງຮອຍອັນ ເຊິ່ງເຄີຍເປັນທ່າເຮືອການຄ້າທີ່ເກົ່າແກ່ໃນອະດີດ ແລະ ເປັນເມືອງມໍລະດົກໂລກຂອງຫວຽດນາມ ໄດ້ລົງນາມໃນຂໍ້ຕົກລົງກັບກຸ່ມສິດທິສັດ ໂຟຣ໌ ພໍ ອິນເຕີເນຊັນແນລ (Four Paws International) ໃຫ້ຄຳໝັ້ນວ່າ: ຈະຢຸດການຂາຍ ແລະ ບໍລິໂພກຊີ້ນໝາ ແລະ ແມວໃນເຂດເມືອງຮອຍອັນ.

“ເຮົາຕ້ອງການຊ່ວຍສົ່ງເສີມສະຫວັດດິພາບສັດຜ່ານການກຳຈັດພະຍາດຫວໍ້, ຢຸດການຄ້າຂາຍຊີ້ນໝາ ແລະ ແມວ ແລະ ເຮັດໃຫ້ເມືອງຮອຍອັນເປັນຈຸດໝາຍປາຍທາງຊັ້ນນຳສຳລັບການທ່ອງທ່ຽວ” ທ່ານ ຫງວຽນ ເຖີ ຮຸງ ຮອງນາຍົກເທດສະມົນຕີເມືອງຮອຍອັນກ່າວ.

ທ່ານ ຈູລີ ແຊນເດີ ຕົວແທນຂອງກຸ່ມໂຟຣ໌ ພໍ ອິນເຕີເນຊັນແນລ ໄດ້ສະແດງຄວາມຍ້ອງຍໍຕໍ່ການຕັດສິນໃຈຂອງທາງການເມືອງຮອຍອັນ ໂດຍລະບຸວ່າ: ນີ້ເປັນໄລຍະເວລາອັນໜ້າຍິນດີທີ່ຈະຖືກຍົກເປັນແບບຢ່າງໃຫ້ເມືອງອື່ນໆຂອງຫວຽດນາມຕໍ່ໄປ.

ກ່ອນໜ້ານີ້, ໂຟຣ໌ ພໍ ອິນເຕີເນຊັນແນລ ໄດ້ມີການສຳຫລວດຄວາມຄິດເຫັນລະດັບປະເທດຕໍ່ການບໍລິໂພກຊີ້ນໝາ ແລະ ແມວໃນຫວຽດນາມ ພົບວ່າ: ມີຜູ້ຮ່ວມຕອບແບບສຳຫລວດພຽງ 6,3% ເທົ່ານັ້ນທີ່ບໍລິໂພກສັດສີ່ຕີນເຫລົ່ານີ້, ຂະນະທີ່ 88% ຂອງຜູ້ຕອບແບບສຳຫລວດ ສະໜັບສະໜູນການຫ້າມບໍລິໂພກ.

ເຖິງວ່າຄວາມນິຍົມໃນການບໍລິໂພກຊີ້ນໝາ ແລະ ແມວຢູ່ຫວຽດນາມກຳລັງຫລຸດລົງເລື້ອຍໆ ເນື່ອງຈາກປະຊາຊົນມີລາຍໄດ້ເພີ່ມຂຶ້ນ ແລະ ຜູ້ທີ່ມີຖານະດີກໍເລີ່ມຈະເອົາສັດເຫລົ່ານີ້ມາເປັນສັດລ້ຽງໃນເຮືອນ, ແຕ່ສຳລັບນະຄອນຫລວງຮ່າໂນ້ຍ ຊີ້ນໝາຍັງຫາຊື້ໄດ້ຢ່າງງ່າຍດາຍ ທ່າມກາງຄວາມກັງວົນຂອງກຸ່ມພິທັກສະຫວັດດິພາບສັດ.

ໃນປີ 2018 ທາງການນະຄອນຫລວງຮ່າໂນ້ຍໄດ້ປຸກລະດົມໃຫ້ປະຊາຊົນຍົກເລີກບໍລິໂພກຊີ້ນໝາ ເນື່ອງຈາກເປັນການທຳລາຍພາບພົດທີ່ມີຊື່ສຽງຂອງເມືອງ ແລະ ສ່ຽງຕໍ່ການຕິດເຊື້ອຫວໍ້ ເຊິ່ງເປັນອັນຕະລາຍເຖິງຂັ້ນເສຍຊີວິດ.

ເຖິງຢ່າງໃດກໍຕາມ, ຍັງມີປະຊາຊົນບາງສ່ວນທີ່ນິຍົມບໍລິໂພກຊີ້ນໝາຢູ່ “ຂ້າພະເຈົ້າຄິດວ່າ ຄວນມີການຫ້າມບໍລິໂພກຊີ້ນໝາ ມັນຄືວັດທະນະທຳຂອງເຮົາ” ຊາວຮ່າໂນ້ຍຄົນໜຶ່ງກ່າວກັບນັກຂ່າວ.

ອ້າງອີງ:

https://www.straitstimes.com/…/vietnamese-tourist-city…