ສິງກະໂປພົບຜູ້ຕິດໂອມິຄຣອນ ພາຍໃນປະເທດຄົນທຳອິດ ຄາດຕິດລະຫວ່າງເຮັດວຽກໃນສະໜາມບິນ

ສິງກະໂປພົບຜູ້ຕິດເຊື້ອໂຄວິດໂອມິຄຣອນຕິດເຊື້ອໃນປະເທດຄົນທຳອິດ ເປັນພະນັກງານສະໜາມບິນ ເຮັດວຽກຄົນລະເທີມິນັລກັບຜູ້ຕິດເຊື້ອທີ່ພົບກ່ອນໜ້າ, ຄາດວ່າຕິດເຊື້ອລະຫວ່າງເຮັດວຽກຊ່ວຍຜູ້ໂດຍສານທີ່ມາກ່ອນເຮືອບິນ.

ວັນທີ 10 ທັນວາ 2021, ເວັບໄຊ The Business Times ສື່ສິງກະໂປ ລາຍງານວ່າ: ກະຊວງສາທາລະນະສຸກສິງກະໂປເປີດເຜີຍຜົນກວດເບື້ອງຕົ້ນຜູ້ຕິດເຊື້ອໂຄວິດ-19 ເມື່ອວັນທີ 9 ທັນວາ ໂດຍພົບຜູ້ຕິດເຊື້ອໂຄວິດສາຍພັນໂອມິຄຣອນເພີ່ມ 2 ຄົນ ໂດຍໜຶ່ງໃນນັ້ນເປັນພະນັກງານຍິງຊາວສິງກະໂປອາຍຸ 24 ປີ ເຮັດວຽກໃນສະໜາມບິນຊາງງີ ບໍ່ມີປະຫວັດເດີນທາງໄປຕ່າງປະເທດ ຖືເປັນຜູ້ຕິດເຊື້ອໂຄວິດສາຍພັນໂອມິຄຣອນໃນປະເທດຄົນທຳອິດຂອງສິງກະໂປ.

ກະຊວງສາທາລະນະສຸກສິງກະໂປລະບຸວ່າ: ພະນັກງານຄົນດັ່ງກ່າວເຮັດວຽກໃນເທີມິນັລ 1 ແລະ 3 ບໍ່ໄດ້ເຮັດວຽກໃນເທີມິນັລ 4 ເຊິ່ງເປັນຈຸດທີ່ຜູ້ຕິດເຊື້ອໂຄວິດສາຍພັນໂອມິຄຣອນ 3 ຄົນທຳອິດເດີນທາງມາເຖິງ. ເຖິງຢ່າງໃດກໍຕາມ, ຈາກການສັນນິຖານເຊື່ອວ່າ: ນາງອາດຕິດເຊື້ອໂອມິຄຣອນຈາກການເຮັດວຽກອຳນວຍຄວາມສະດວກຜູ້ໂດຍສານຕໍ່ເຮືອບິນ.

ລາຍງານລະບຸວ່າ: ຜູ້ຕິດເຊື້ອຄົນນີ້ເຂົ້າຮັບການກວດໂຄວິດເມື່ອວັນທີ 8 ທັນວາຜ່ານມາ ເຊິ່ງເປັນຮອບການກວດປະຈຳອາທິດຂອງພະນັກງານສະໜາມບິນຕາມປົກກະຕິ ກ່ອນຈະພົບເຊື້ອໂຄວິດ ເຮັດໃຫ້ນາງຕ້ອງກັກຕົວຢູ່ເຮືອນຕາມມາດຕະການ ຈົນກະທັ້ງຜົນການກວດສອບຊີ້ວ່າ: ເຊື້ອດັ່ງກ່າວເປັນສາຍພັນໂອມິຄຣອນ ທາງການສິງກະໂປຈຶ່ງຮັບຕົວໄປປິ່ນປົວຢູ່ສູນປ້ອງກັນພະຍາດຕິດເຊື້ອແຫ່ງຊາດແລ້ວ, ສ່ວນຜູ້ທີ່ປະຫວັດໃກ້ຊິດຜູ້ຕິດເຊື້ອຄົນດັ່ງກ່າວ ຕ້ອງກັກຕົວເບິ່ງອາການເປັນເວລາ 10 ວັນໃນສະຖານທີ່ທີ່ຈັດໄວ້ໃຫ້ ແລະ ຕ້ອງຖືກກວດໂຄວິດນຳ.

ອ້າງອີງ:

https://www.businesstimes.com.sg/…/singapore-gets-first…