ຂະແໜງການເງິນຫຼວງພະບາງ-ໄຊຍະບູລີ ຮັບການເຊື່ອມຊຶມວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ

ວັນທີ 7 ທັນວາ 2021 ຜ່ານມາ, ທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ, ພ້ອມດ້ວຍຄະນະໄດ້ເຜີຍແຜ່ເອກະສານກ່ຽວກັບວາລະແຫ່ງຊາດທີ່ຕິດພັບກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ (ຜ່ານລະບົບວີດີໂອທາງໄກ) ໃຫ້ຂະແໜງການເງິນແຂວງຫຼວງພະບາງ ແລະ ແຂວງໄຊຍະບູລີໂດຍການເຂົ້້າຮ່ວມຂອງທ່ານ ນາງ ສິລິພອນ ສຸພັນທອງ ຮອງເຈົ້າແຂວງຫຼວງພະບາງ ແລະ ທ່ານ ສົມຈິດ ຈັນທະວົງ ຮອງເຈົ້້າແຂວງໄຊຍະບູລີ, ມີຫົວໜ້າພະແນກການເງິນຂອງແຂວງ, ພ້ອມດ້ວຍຄະນະພະແນກ, ຂະແໜງການອ້ອມ ຂ້າງແຂວງເຂົ້າຮ່ວມ.

ໂດຍອີງຕາມ ດຳລັດຂອງນາຍົກລັດຖະມົນຕີວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງກະຊວງການເງິນ, ຂໍ້ຕົກລົງ ແບ່ງຄວາມຮັບຜິດຊອບຂອງຄະນະລັດຖະມົນຕີໃນການນຳພາ-ຊີ້ນໍາການຜັນຂະຫຍາຍຈັດຕັ້ງວາລະ ແຫ່ງຊາດ ແລະ ຄຳສັ່ງຂອງນາຍົກລັດຖະມົນຕີ ວ່າດ້ວຍການເພີ່ມທະວີຄຸ້ມຄອງ ແລະ ຕ້ານການຮົ່ວໄຫຼຂອງ ລາຍ ຮັບງົບປະມານເຂົ້າສູ່ວຽກງານຕົວຈິງ.

ໃນກອງປະຊຸມໄດ້ເຜີຍແຜ່ ແລະ ຜັນຂະຫຍາຍເອກະສານຕິດພັບກັບວາລະແຫ່ງຊາດທີ່ຕິດພັນກັບຂະ ແໜງການເງິນໂດຍຜູ້ເຂົ້າຮ່ວມໄດ້ຮັບຟັງ ເປັນຕົ້ນ: ແມ່ນຄໍາສັ່ງວ່າດ້ວຍການເພີ່ມທະວີການຄຸ້ມຄອງ ແລະ ຕ້ານ ການຮົ່ວໄຫຼຂອງລາຍຮັບງົບປະມານ ສະບັບເລກທີ 18/ ນຍ, ຄຳແນະນຳ ວ່າດ້ວຍການຈັດຕັ້ງຜັນຂະຫຍາຍຄຳສັ່ງຂອງນາຍົກລັດຖະມົນຕີ ສະບັບເລກທີ 20/ນຍ, ກ່ຽວກັບການກວດກາ ແລະ ປະຕິບັດມາດຕະການຕໍ່ຜູ້ນຳເຂົ້າ ແລະ ນຳໃຊ້ຍານພາຫະນະທຸກປະເພດ ແບບບໍ່ຖືກຕ້ອງ ສະບັບ 5320/ກງ, ຄໍາແນະນໍາວ່າດ້ວຍການສົ່ງເສີມອຳ ນວຍຄວາມສະດວກດ້ານພາສີອາກອນຕໍ່ຫົວໜ່ວຍນຳເຂົ້າ-ສົ່ງອອກສິນຄ້າ ແລະ ເຄື່ອງຂອງ ສະບັບເລກທີ 4490/ກງ, ແຈ້ງການການຄຸ້ມຄອງ ການນຳເຂົ້ານ້ຳມັນເຊື່ອໄຟ ສະບັບເລກທີ 4491/ກງ, ແຈ້ງການມາດຕະ ການຄຸ້ມຄອງ ແລະ ປະຕິບັດລາຍຈ່າຍງົບປະມານໄລຍະການແຜ່ລະບາດຂອງເຊື້ອພະຍາດໂຄວິດ-19 ສະບັບ ເລກທີ 2084/ກງ.

ພ້ອມກັນນີ້, ທ່ານ ນາງ ສິລິພອນ ສຸພັນທອງ ຮອງເຈົ້າແຂວງຫຼວງພະບາງ ແລະ ທ່ານ ສົມຈິດ ຈັນທະວົງ ຮອງເຈົ້້າແຂວງໄຊຍະບູລີ ຍັງໄດ້ພ້ອມກັນໂອລົມເພີ່ມເຕີມເຊິ່ງຍັງໄດ້ເນັ້ນໜັກໃຫ້ບັນດາພະແນກການ ແລະ ພາກ ສ່ວນຕ່າງໆພາຍໃນແຂວງພ້ອມກັນເອົາໃຈໃສ່ໃນການຮ່ວມມືເປັນເຈົ້າການເກັບລາຍຮັບ ແລະ ຄຸ້ມຄອງລາຍຈ່າຍ ເພື່ອສ້າງເງື່ອນໄຂອຳນວຍຄວາມສະດວກໃນການປະສານສົມທົບກ່ຽວກັບວຽກງານການເງິນຂອງແຂວງ, ພ້ອມນັ້ນໄດ້ເນັ້ນໃຫ້ເອົາໃຈໃສ່ຊອກຫາສ້າງຖານລາຍຮັບທີ່ບົ່ມຊ້ອນ ແລະ ໝັ້ນຄົງນຳອີກດ້ວຍ.