ພຽງ 3 ເດືອນ ກໍາລັງປ້ອງກັນຄວາມສະຫງົບ ມ້າງຄະດີຢາເສບຕິດໄດ້ກວ່າ 1.100 ເລື່ອງ

ພັນເອກ ບົວພັນ ພວງມະນີ ຮອງຫົວໜ້າກົມໃຫຍ່ຕໍາຫຼວດ, ກະຊວງປ້ອງກັນຄວາມສະຫງົບ ໃຫ້ສຳພາດຕໍ່ນັກຂ່າວໂທລະພາບປ້ອງກັນຄວາມສະຫງົບເມື່ອບໍ່ດົນມານີ້ວ່າ: ພາຍຫລັງສະພາແຫ່ງຊາດ ໄດ້ຮັບຮອງເອົາ 2 ວາລະແຫ່ງຊາດຂອງລັດຖະບານ, ພວກເຮົາກໍໄດ້ຈັດກອງປະຊຸມປຶກສາຫາລືເພື່ອວາງແຜນຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍໄດ້ແຕ່ງຕັ້ງຄະນະຮັບຜິດຊອບຂັ້ນກະຊວງງຢ່າງລະ ອຽດໂດບໃນການຈັດຕັ້ງປະຕິບັດວຽກງານຕົວຈິງນັ້ນ ໄດ້ແບ່ງອອກເປັນ 3 ໄລຍະ ຄື: ໄລຍະທີ 1 ແຕ່ເດືອນກັນຍາ ຫາ ທັນວາ 2021 ເປັນໄລຍະກະກຽມເຜີຍແຜ່ເອກະສານ ແລະ ວຽກງານຕ່າງໆທີ່ກ່ຽວຂ້ອງ, ໄລຍະທີ 2 ແຕ່ເເດືອນມັງກອນ ປີ 2022 ຫາ ເດືອນ ສິງຫາ ປີ 2023 ເປັນໄລຍະຈັດຕັ້ງປະຕິບັດວຽກງານຕົວຈິງຢ່າງຮອບດ້ານ ແລະ ເຕັມຮູບແບບ ແລະ ໄລຍະທີ 3 ແຕ່ເດືອນກັນຍາ ຫາ ເດືອນທັນວາ 2023 ແມ່ນໄລຍະສະຫລຸບຄືນຜົນການຈັດຕັ້ງປະຕິບັດວາລະແຫ່ງຊາດ.

ນັບແຕ່ເດືອນສິງຫາ ຫາ ເດືອນຕຸລາ ປີນີ້, ເຈົ້າໜ້າທີ່ຕໍາຫລວດສະກັດກັ້ນ ແລະ ຕ້ານຢາເສບຕິດ ກະຊວງປ້ອງກັນຄວາມສະຫງົບ ສາມາດມ້າງຄະດີຢາເສບຕິດໃນຂອບເຂດທົ່ວປະເທດໄດ້ 1.106 ເລື່ອງ, ຈັບຜູ້ຕ້ອງຫາໄດ້ 1.562 ຄົນ, ຍິງ 176 ຄົນ, ໃນນັ້ນເປັນຄົນຕ່າງປະເທດ 42 ຄົນ, ຍິງ 2 ຄົນ, ຢຶດຢາບ້າໄດ້ 101.586.361 ເມັດ ເທົ່າກັບ 10.158 ກິໂລກຣາມ, ຢາໄອສ໌ 1.593 ກິໂລກຣາມ, ເຮໂລອິນ 10 ກິໂລກຣາມ, ກັນຊາ 3.036 ກິໂລກຣາມ ແລະ ອື່ນໆ.

ເຖິງວ່າຍັງບໍ່ທັນເຖິງໄລຍະຈັດຕັ້ງ ປະຕິບັດວຽກງານຢ່າງຮອບດ້ານ, ແຕ່ໃນ 3 ເດືອນຜ່ານມາຄື ແຕ່ເດືອນສິງຫາ ຫາ ເດືອນຕຸລາປີນີ້, ເຈົ້າໜ້າທີ່ຕໍາຫລວດສະກັດກັ້ນ ແລະ ຕ້ານຢາເສບຕິດ ສາມາດມ້າງຄະດີຢາເສບຕິດໃນຂອບເຂດທົ່ວປະເທດໄດ້ 1.106 ເລື່ອງ, ໃນນີ້ ຫລາຍກວ່າໝູ່ແມ່ນຢາບ້າທີ່ມີເຖິງ101.586.361 ເມັດເທົ່າກັບ 10.158 ກິໂລກຣາມ. ຂະນະທີ່ປັດຈຸບັນພາຍຫລັງສໍາເລັດການເຜີຍແຜ່ເອກະສານກ່ຽວກັບວາລະແຫ່ງຊາດແລ້ວ, ພວກເຮົາເລັ່ງໃຫ້ອົງການປົກຄອງແຕ່ລະທ້ອງຖິ່ນໃຫ້ຮີບຮ້ອນສ້າງແຜນດໍາເນີນງານຂອງຕົນຢ່າງລະອຽດເພື່ອກ້າວເຂົ້າສູ່ການປະຕິ ບັດວຽກງານຕົວຈິງຢ່າງຮອບດ້ານໃນໄລຍະທີ 2 ໃຫ້ສໍາລັດຕາມຄາດໝາຍທີ່ລັດຖະບານໄດ້ວາງໄວ້.