ຄຳເວົ້າ ເມສຊີ ມີພະລັງ, ເລວານດອບສະກີ ມີໂອກາດຄວ້າບັນລົງດໍຢ້ອນຫລັງ

ປາສກາລ ແຟເຣ ບກ. ວາລະວານ ຟຣ໊ອງ ຟຸດບອລ ຍອມຮັບຕອນນີ້ພວມປຶກສາຫາລືກັບທຸກຝ່າຍທີ່ກ່ຽວຂ້ອງການມອບລາງວັນບັນລົງ ດໍ ຢ້ອນຫລັງໃຫ້ກັບ ໂຣເບີດ ເລວານດອບສະກີ ດາວຍິງສະໂມສອນ ບາເຢິນ ມິວນິກ ຫລັງປະທັບໃຈກັບຄຳເວົ້າຂອງ ລີໂອເນລ ເມສຊີ ທີ່ຍ້ອງຍໍດາວຍິງໂປແລນ ສຳລັບຜົນງານອັນດີເດ່ັນໃນປີ 2020.

ປາສຄາລ ເຟີເຣ ບັນນາທິການວາລະສານບານເຕະຟຣ້ອງ ຟຸດບອລ  ຍອມຮັບວ່າຜູ້ຈັດພິທີມອບລາງວັນ ບັນລົງດໍ (Ballon d’Or) ກໍາລັງພິຈາລະນາທີ່ຈະມອບ “ບານຄຳ” ຍ້ອນຫລັງໃຫ້ກັບ ໂຣເບີດ ເລວານດອຟສະກີ ກອງໜ້າໂຕເກ່ັງຂອງ “ເສືອໃຕ້” ບາເຢິນ ມິວນິກ.

ດາວຍິງຊາວໂປແລນ ສ້າງຜົນງານໄດ້ຢ່າງດີເລີດໃນປີ 2020 ໂດຍຍິງປະຕູຊ່ວຍໃຫ້ ບາເຢິນ ຄວ້າໄດ້ເຖິງ 5 ລາຍການ, ແຕ່ໜ້າເສຍດາຍໄລຍະນັ້ນ, ການລະບາດຂອງເຊື້ອໄວຣັສໂຄວິດ-19 ເຮັດໃຫ້ ຟຣ໊ອງ ຟຸດບອລ ຕັດສິນໃຈຍົກເລີກການຈັດງານ. ແລະບໍ່ມີການມອບລາງວັນອັນຊົງກຽດນີ້.

ແນວໃດກໍຕາມ, ໃນພິທີມອບລາງວັນ Ballon d’Or 2021 ທີ່ ລີໂອເນລ ເມສຊີ ຊະນະໄປຄອງ ແລະ ເປັນສະໄຫມທີ 7 ຂອງລາວ, ລາວໄດ້ສະແດງຄວາມຊົມເຊີຍເລວານດອບສະກີ ທີ່ສ້າງຜົນງານໄດ້ຢ່າງຫນ້າເຫລືອເຊື່ອເມື່ອປີຜ່ານມາ ແລະ ສົມຄວນໄດ້ຮັບ “ບານຄຳ” ໄປຄອບຄອງ.

ຈາກ​ຄຳເວົ້າດ່ັງກ່າວເຮັດໃຫ້ ແຟເຣ ຍອມຮັບ​ວ່າ ປັດຈຸ​ບັນ​ໄດ້ມີການ​ຫາລື ກັບ​ທຸກ​ພາກສ່ວນ​ທີ່​ກ່ຽວຂ້ອງ​ກັບລາງວັນລາງວັນນີ້. ເພື່ອພິຈາລະນາມອບ Ballon d’Or ຍ້ອນຫລັງໃຫ້ກັບ ເລວອນດອບສະກີ  ” ສິ່ງທີ່ ເມສຊີ ເວົ້າ, ມັນດີຫຼາຍ. ແລະ ສະຫລາດຫລັກແຫລມ ຂ້ອຍຄິດວ່າພວກເຮົາບໍ່ຄວນຮີບຮ້ອນໃນການຕັດສິນໃຈ ພວກເຮົາມີເວລາທີ່ຈະຄິດກ່ຽວເລື່ອງນີ້.”

“ໃນເວລາດຽວກັນ, ພວກເຮົາຄວນເຄົາລົບປະຫວັດສາດຂອງ Ballon d’Orທີ່ອ້າງອີງໃສ່ຜົນຂອງການລົງຄະແນນສຽງ. ພວກເຮົາບໍ່ແນ່ໃຈວ່າ ເລວານດອບສະກີ ຈະໄດ້ຮັບລງວັນ Ballon d’Or ໃນປີກາຍນີ້ ຫລືບໍ່ ພວກເຮົາບໍ່ສາມາດຮູ້ໄດ້ ເພາະວ່າບໍ່ມີການລົງຄະແນນສຽງ, ແຕ່ເພື່ອຄວາມຊື່ສັດ ເລວານດອບສະກີ ມີໂອກາດດີທີ່ຈະຊະນະລາງວັນໃນປີກາຍນີ້,” ແຟເຣ ກ່າວ.