46 ປີ ນໍ້າໃຈວັນຊາດທີ 2 ທັນວາ ໝັ້ນຍືນ!
ບົດນຳ
ຊາດລາວແມ່ນຊາດໜຶ່ງທີ່ມີປະຫວັດສາດມາຢ່າງຍາວນານຫລາຍພັນປີ ແລະ ມີມູນເຊື້ອທີ່ສະຫງ່າອົງອາດຕໍ່ສູ້ຕ້ານການຮຸກຮານຂອງສັດຕູຈາກພາຍນອກ ແລະ ສ້າງສາພັດທະນາ ໂດຍສືບທອດມູນເຊື້ອອັນອົງອາດຂອງບັນພະບູລຸດ, ປະຊາຊົນລາວບັນດາເຜົ່າພາຍໃຕ້ການນໍາພາຂອງພັກປະຊາຊົນປະຕິວັດລາວ ໄດ້ສາມັກຄີກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງຂອງພວກຈັກກະພັດລ່າເມືອງຂຶ້ນທັງແບບເກົ່າ ແລະ ໃໝ່ ຈົນສາມາດປົດປ່ອຍປະເທດຊາດໄດ້ຢ່າງມີໄຊແລ້ວ ສະຖາປະນາເປັນປະເທດສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ເຊິ່ງລັດປະຊາທິປະໄຕ ປະຊາຊົນ ແມ່ນລັດທີ່ເກີດຈາກການຕໍ່ສູ້ເສຍສະລະອັນໃຫຍ່ຫລວງຂອງປະຊາຊົນລາວບັນດາເຜົ່າ, ແມ່ນລັດທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ.
ວັນທີ 2 ທັນວາ ແມ່ນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງ ປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ. ຜ່ານຍ່ານທາງມາ 46 ປີທີ່ເປັນຍ່ານທາງແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ພັກເຮົາໄດ້ສູ້ຊົນປະຕິບັດແຜນນະໂຍບາຍສ້າງເສດຖະກິດເອກະລາດ, ເປັນເຈົ້າຕົນເອງຕາມທິດສັງຄົມນິຍົມ, ໄດ້ປຸກລະດົມປະຊາຊົນເຂົາຮ່ວມໃນສະໜາມຮົບຜະລິດກະສິກໍາ, ປ່າໄມ້ ໂດຍການນໍາໃຊ້ເຕັກນິກໃໝ່ເຂົ້າສູ່ ການຜະລິດ, ສ້າງຊົນລະປະທານ ເຮັດກະເສດສຸມ, ນາແຊງ ເຊິ່ງເປັນການສ້າງປັດໄຈໃໝ່ໃຫ້ແກ່ການສືບຕໍ່ຂະຫຍາຍ ຜະລິດກະສິກໍາ – ປ່າໄມ້. ຂະນະດຽວກັນກໍ່ໄດ້ຟື້ນຟູການຜະລິດຂອງໂຮງຈັກ, ໂຮງງານແຕ່ລະຂະໜາດເຊັ່ນ: ໂຮງງານໄຟຟ້າ, ນ້ຳປະປາ, ສ້ອມແປງກົນຈັກພື້ນຖານໂຮງເລື່ອຍ ແລະ ປຸງແຕ່ງໄມ້, ໂຮງງານຜະລິດເບຍ, ນ້ຳຫວານ, ໂຮງງານຕໍ່າແຜ່ນ ແລະ ອື່ນໆ. ດ້ານສັງຄົມ, ພັກຖືສໍາຄັນ ແລະ ເອົາໃຈໃສ່ປະຕິບັດນະໂຍບາຍສາມັກຄີລະຫວ່າງເຜົ່າ, ຊັ້ນຄົນເພດໄວ ແລະ ສາສະໜາໃນວົງຄະນະຍາດແຫ່ງຊາດ ບົນພື້ນຖານພັນທະພາບກໍາມະກອນ – ຊາວກະສິກອນພາຍໃຕ້ການນໍາພາຂອງພັກ, ປະຕິບັດສິດສະເໝີພາບຂອງພົນລະເມືອງ. ເອົາໃຈໃສ່ຂະຫຍາຍ ການສຶກສາ ແລະ ບໍາລຸງວັດທະນະທໍາ, ລຶບລ້າງຄວາມບໍ່ຮູ້ໜັງສື, ຍົກລະດັບຄວາມຮູ້ຂອງປະຊາຊົນໃຫ້ສູງຂຶ້ນ, ເສີມຂະຫຍາຍວັດທະນະທໍາອັນດີງາມຂອງຊາດ.
ພາຍໃຕ້ການນໍາພາຂອງພັກປະຊາຊົນປະຕິວັດລາວ ທີ່ເປັນແກນນໍາໃນລະບົບການເມືອງປະຊາທິ ປະໄຕ ປະຊາຊົນ, ລະບົບການເມືອງຂອງລະບອບປະຊາທິປະໄຕ ປະຊາຊົນ ແຕ່ລະຂັ້ນໄດ້ຮັບງານປັບປຸງ ບູລະນະຢ່າງໜັກແໜ້ນ, ເຂັ້ມແຂງ; ຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮັບການປົກປັກຮັກສາໄວ້ຢ່າງໝັ້ນຄົງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ.
ດ້ານເສດຖະກິດ ມີບາດກ້າວຂະຫຍາຍຕົວຕໍ່ເນື່ອງ ເສດຖະກິດສະເລ່ຍເພີ່ມຂຶ້ນແຕ່ລະໄລຍະເຊັ່ນ: 1990 ສະເລ່ຍ 4,8% ຕໍ່ປີ, 2005 ໄດ້ 6,2%, , 2015 ບັນລຸໄດ້ 7, 8%, ປີ 2021 ຄາດຄະເນຈະຂະຫຍາຍຕົວຢູ່ໃນລະດັບ 3,0% ຍ້ອນການລະບາດຂອງພະຍາດໂຄວິດ-19 ທີ່ແກ່ຍາວ. GDP ສະເລ່ຍຕໍ່ຫົວຄົນ ກໍເພີ່ມຂຶ້ນ ເຊັ່ນ: ປີ 1985 ໄດ້ 114 ໂດລາສະຫະລັດ, ປີ2020 ໄດ້ 2.742 ໂດລາສະຫະລັດ ແລະ 2021 ໄດ້ 2.649 ໂດລາ ສະຫະລັດ.
ປີ 2021 ຄາດວ່າຈະສາມາດບັນລຸຄົບມາດຖານສ້າງຄອບຄົວທຸກຍາກພົ້ນທຸກ ໄດ້ 13.079 ຄອບຄົວ ຂອງຈໍານວນຄອບຄົວທັງໝົດໃນທົ່ວປະເທດ, ບ້ານທຸກຍາກຍັງເຫລືອ 1.351 ບ້ານ (2021 ຈະສາມາດສ້າງຜ່ານພົ້ນທຸກ ໄດ້ 237 ບ້ານ) ຂອງຈໍານວນບ້ານທັງໝົດໃນທົ່ວປະເທດ, ສໍາລັບເມືອງທຸກຍາກ ຍັງ 23 ເມືອງ. ຂະແໜງການໂຍທາທິການ ແລະ ຂົນສົ່ງ ໄດ້ສຳເລັດໂຄງການທາງດ່ວນ ນະຄອນຫລວງວຽງຈັນ-ວັງວຽງ ມີຄວາມຍາວ 109 ກິໂລແມັດ ແລະ ໄດ້ເປີດນໍາໃຊ້ ຢ່າງເປັນທາງການ ໃນວັນທີ 2 ທັນວາ 2020. ການກໍ່ສ້າງທາງລົດໄຟລາວ-ຈີນ ແຕ່ບໍ່ເຕັນ ແຂວງຫລວງນ້ຳທາ ຫານະຄອນຫລວງວຽງຈັນ ກໍກຽມເປີດນຳໃຊ້ຢ່າງເປັນທາງການໃນວັນທີ 3 ທັນວານີ້.
ໃນ 2021 ຂະແໜງການສາທາລະນະສຸກ ໄດ້ສຸມໃສ່ຈັດຕັ້ງປະຕິບັດການບໍລິການສັກວັກຊິນກັນ ພະຍາດໂຄວິດ-19 ໂດຍວາງຄາດໝາຍ ໃຫ້ບັນລຸຫລາຍກວ່າ 50% ຂອງປະຊາກອນໃນທົ່ວປະເທດ ນອກນີ້ໃນທົ່ວປະເທດບໍ່ມີກໍລະນີເສຍຊີວິດຈາກພະຍາດໄຂ້ຍຸງລາຍ. ວຽກຖະແຫລງຂ່າວເປັນວຽກໜຶ່ງທີ່ສໍາຄັນ ໂດຍພັກ ແລະ ລັດໄດ້ເອົາໃຈໃສ່ຊີ້ນໍາ – ນໍາພາ ເປັນແຕ່ລະໄລຍະຢ່າງເປັນປົກກະຕິ ເຮັດ ໃຫ້ວຽກງານດັ່ງກ່າວຂະຫຍາຍຕົວທັງຈໍານວນ ແລະ ຄຸນນະພາບ. ສ່ວນດ້ານອື່ນໆ ກໍມີບາດກ້າວຂະຫຍາຍຕົວ.
ແນວໃດກໍດີເຖິງວ່າມີຂໍ້ສະດວກທີ່ເປັນພື້ນຖານຫລາຍດ້ານ ແຕ່ກໍມີຄວາມຫຍຸ້ງຍາກນາໆປະການ ຍ້ອນເງື່ອນໄຂຕ່າງໆ ເຊິ່ງລວມມີທັງການຜະເຊີນກັບກົນອຸບາຍມ້າງເພທໍາລາຍ ນະໂຍບາຍໃໝ່ ຂອງພວກອິດທິກໍາລັງປໍລະປັກ ແລະ ພວກຄົນບໍ່ດີ ທັງປະສົບໄພພິບັດທໍາມະຊາດ ຢ່າງຕໍ່ເນື່ອງ. ສິ່ງສໍາຄັນກໍາລັງການຜະລິດ ແລະ ພື້ນຖານໂຄງລ່າງກໍຄືວັດຖຸເຕັກນິກ ໃນທຸກຂົງເຂດ ວຽກງານ ຍັງຢູ່ໃນລັກສະນະປະຖົມປະຖານ ກວມອັດຕາສ່ວນຫລາຍ. ທັງນີ້ເນື່ອງຈາກພັກໄດ້ມີຄວາມສະດຸ້ງໄວ ແລະ ຫັນປ່ຽນການນໍາພາຂອງຕົນ ໃຫ້ສອດຄ່ອງກັບສະພາບຄວາມເປັນຈິງ ຂອງປະເທດຊາດ ແລະ ສາກົນ ໂດຍການວາງແນວ ທາງປ່ຽນແປງໃໝ່ຮອບດ້ານທີ່ມີຫລັກການ ທັງມີການປັບປຸງບູລະນະຢ່າງບໍ່ຢຸດຢັ້ງ.
ເພື່ອສືບຕໍ່ຮັກສາ ແລະ ເສີມຂະຫຍາຍມູນເຊື້ອອັນດີງາມ ຂອງພັກ, ປະຕິບັດໜ້າທີ່ປົກປັກຮັກສາ ປະເທດຊາດ ແລະ ໝາກຜົນຂອງການປະຕິວັດໄວ້ໃຫ້ໝັ້ນຄົງ; ພວກເຮົາຕ້ອງໄດ້ສ້າງບາດລ້ຽວໃໝ່ໃຫ້ ແກ່ການສ້າງ ແລະ ເສີມຂະຫຍາຍລະບອບປະຊາທິປະໄຕ ປະຊາຊົນ ຕາມຈຸດໝາຍສັງຄົມນິຍົມຢ່າງໜັກແໜ້ນ, ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີ ປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລ.
