ຜົນເບື້ອງຕົ້ນຂອງວາລະແຫ່ງຊາດ ວ່າດ້ວຍແກ້ໄຂບັນຫາຢາເສບຕິດ ໄດ້ 1.106 ເລື່ອງ ແລະ ຢຶດຢາບ້າ 10 ກວ່າໂຕນ

ໝາກຜົນເບື້ອງຕົ້ນຂອງການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃນໄລຍະ 3 ເດືອນຜ່ານມາ ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດໄດ້ສົມທົບກັບພາກສ່ວນທີ່ກ່ຽວຂ້ອງສາມາດມ້າງຄະດີຢາເສບຕິດ ໃນຂອບເຂດທົ່ວປະເທດໄດ້ 1.106 ເລື່ອງ, ຢຶດຢາບ້າໄດ້ 101.586.361 ເມັດ ເທົ່າກັບ 10.158.63 ກິໂລກຼາມ ແລະ ຢາເສບຕິດປະເພດອື່ນໆຈຳນວນໜຶ່ງ.

ທ່ານ ພັອ  ບົວພັນ ພອງມະນີ ຮອງຫົວໜ້າກົມໃຫຍ່ຕຳຫຼວດ ກະຊວງ ປກສ ໃຫ້ສໍາພາດຕໍ່ສື່ມວນຊົນ ປກສ ໃນວັນທີ 29 ພະຈິກ 2021 ວ່າ: ໝາກຜົນເບື້ອງຕົ້ນໃນການຈັດຕັ້ງປະຕິບັດຂອງວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໃນໄລຍະ 3 ເດືອນຜ່ານມາ (ແຕ່ເດືອນ ສິງຫາ – ເດືອນ ຕຸລາ 2021), ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດໄດ້ສົມທົບກັບພາກສ່ວນທີ່ກ່ຽວຂ້ອງສາມາດມ້າງຄະດີຢາເສບຕິດ ໃນຂອບເຂດທົ່ວປະເທດໄດ້ 1.106 ເລື່ອງ, ຈັບຜູ້ຖືກຫາ ໄດ້ 1.562 ຄົນຍິງ 176 ຄົນ, ຄົນຕ່າງປະເທດ 42 ຄົນ, ຍິງ 2 ຄົນ, ໃນນີ້, ຫວຽດນາມ 20 ຄົນ ຈີນ 5 ຄົນ, ມຽນມາ 10 ຄົນ ຍິງ 1 ຄົນ, ໄທ 6 ຄົນ ຍິງ 1 ຄົນ, ຢຶດຢາບ້າ ໄດ້ 101.586.361 ເມັດ ເທົ່າ ກັບ 10.158,63 ກິໂລກຼາມ, ຢາໄອສ໌ 1,593,07 ກິໂລກຼາມ; ເຮໂລອິນ 10,88 ກິໂລກຼາມ, ກັນຊາ 3.036 ກິໂລກຼາມ, ຢາຝິ່ນ 544,4 ກຼາມ, ຢາອີ 44,4 ກຼາມ, ແປ້ງຝຸ່ນປະສົມຢາເສບຕິດ 21,1 ກິໂລກຼາມ, ຢຶດລົດໃຫຍ່ໄດ້ 32 ຄັນ, ລົດຈັກ 216 ຄັນ, ອາວຸດປືນ 5 ກະບອກ, ລູກປືນ 117 ລຸກ.

ຄະດີເດັ່ນໃນໄລຍະ 3 ເດືອນຜ່ານມາ ມີ 4 ເລື່ອງ ຄື: ໃນວັນທີ 13 ກັນຍາ 2021 ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງຄຳມ່ວນ ຢຶດກັນຊາໄດ້ 32 ເປົ້າ ນ້ຳໜັກ 1,319 ກິໂລກຼາມ ທີ່ຂົນສົ່ງມາດ້ວຍລົດຈຳນວນ 3 ຄົນ, ຈັບຜູ້ຖືກຫາ ໄດ້ 2 ຄົນ.

ໃນວັນທີ 20 ຕຸລາ 2021 ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງ ບໍ່ແກ້ວ ໄດ້ສະກັດກວດກາລົດເປົ້າໝາຍຂົນສົ່ງຢາເສບຕິດມາແຕ່ເມືອງຕົ້ນເຜິ້ງ ມາຮອດເຂດບ້ານອຸດົມ ເມືອງຫວຍຊາຍ ແຂວງບໍ່ແກ້ວ ຜ່ານການກວດຄົ້ນລົດຄັນດັ່ງກ່າວ ພົບຢາບ້າທີ່ຊຸກເຊື່ອງຢູ່ໃນລົດ ແລະ ທ້າຍກະບະລົດມີຈຳນວນ 50 ເປົ້າ 10.000 000 ເມັດ, ນໍ້າໜັກ 1.000 ກິໂລກຼາມ.

ວັນທີ 25 ຕຸລາ 2021 ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດ ແຂວງບໍ່ແກ້ວ ໄດ້ສະກັດກວດກາລົດເປົ້າໝາຍຂົນສົ່ງຢາເສບຕິດ ຢູ່ເຂດບ້ານສີເມືອງງາມ ເມືອງຕົ້ນເຜິ້ງ ແຂວງບໍ່ແກ້ວ, ຜ່ານການກວດຄົ້ນລົດຄັນດັ່ງກ່າວ ພົບຢາບ້າທີ່ຊຸກເຊື່ອງຢູ່ໃນລົດ 3.000 ມັດ ເທົ່າກັບ 6.000.000 ເມັດ ນ້ຳໜັກ 720 ກິໂລກຼາມ.

ວັນທີ 27 ຕຸລາ 2021 ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແຂວງບໍ່ແກ້ວ ສົມ ທົບພາກສ່ວນ ທີ່ກ່ຽວຂ້ອງໄດ້ກວດກາພາຫະນະລົດບັນທຸກ 12 ລໍ້ ຢູ່ເຂດຈຸດກວດກາບ້ານປຸງ ເມືອງຫ້ວຍຊາຍ ແຂວງບໍ່ແກ້ວ, ຜ່ານການກວດຄົ້ນລົດຄັນດັ່ງກ່າວ ພົບຢາບ້າທີ່ຊຸກເຊື່ອງຢູ່ໃນລົດ 262 ເປົ່າມີ 27.832 ມັດ ເທົ່າກັບ 55.664.000 ເມັດ, ຢາໄອສ 1,537 ຫໍ ໜັກ 1.537 ກິໂລກຼາມ, ກັກຜູ້ຖືກຫາ 2 ຄົນ.

ນີ້ແມ່ນຜົນງານລວມຂອງເຈົ້າໜ້າທີ່ ແລະ ພາກ ສ່ວນທີ່ກ່ຽວຂ້ອງ ທີ່ໄດ້ຮ່ວມມືກັນໃນການກວາດລ້າງກຸ່ມແກ໋ງ ອາຊະຍາກຳຢາເສບຕິດຂ້າມຊາດຢູ່ພາຍໃນປະເທດ.