ລະວັງ! ກຸ່ມຄົນບໍ່ຫວັງດີ ຊັກຊວນ ຮ່ວມເຮັດທຸລະກິດ ຫລື ລົງທຶນ ມາໃນຮູບແບບ ປະຊຸມອອນລາຍ

ປັດຈຸບັນພວກບໍ່ຫວັງດີ, ຕົ້ມຕຸນມັນຕ່າງຈາກແຕ່ກ່ອນທີ່ມັກໃຊ້ໂຮງແຮມ ເປັນບ່ອນໂຄສະນາຊວນເຊື່ອ, ກົງກັນຂ້າມພວກເຂົາຈະຫັນມາ ເຮັດທຸກຢ່າງຜ່ານທາງອອນລາຍ, ເພື່ອສາມາດລົບລີກກົດຫມາຍໄດ້ງ່າຍ ແລະ ຜູ້ເປັນຫົວໂປ້ໂຕການພັດບໍ່ໄດ້ຢູ່ພາຍໃນປະເທດລາວ, ບໍ່ໄດ້ຈົດທະບຽນດຳເນີນທຸລະກິດໃນລາວ ແລະ ບໍ່ມີໂຕຕົນ. ໃນສະພາບການແຜ່ລະບາດຂອງພະຍາດໂຄວິດ-19 ໄປທົ່ວທຸກມູມໂລກ ເປັນສາເຫດເຮັດໃຫ້ສະພາບເສດຖະກິດຫລາຍປະເທດປະສົບບັນຫາ, ຍ້ອນບາງໂຮງຈັກໂຮງງານໄດ້ຢຸດການຜະລິດ ລວມທັງປະເທດເຮົາກໍເຊັ່ນດຽວກັນ, ເຮັດໃຫ້ຄົນຈຳນວນຫລາຍບໍ່ມີວຽກເຮັດງານທຳ, ຂາດລາຍໄດ້ ທີ່ມາໃຊ້ຈ່າຍໃນສິ່ງທີ່ຈຳເປັນໃນຊີວິດປະຈຳວັນ, ເຮັດໃຫ້ພວກຄົນບໍ່ດີດັ່ງກ່າວເຂົ້າມາສວຍໃຊ້ໂອກາດ ດ້ວຍການໂຄສະນາຊວນເຊື້ອຕ່າງໆນາໆ ຜ່ານທາງສື່ອອນລາຍ, ພວກເຂົາຈະເຮັດແບບມີການຈັດຕັ້ງເປັນທີມ, ເປັນກຸ່ມແບ່ງວຽກກັນເຮັດຢ່າງເປັນຂະບວນການໃນລັກສະນະ ຄ້າຍໆຮູບແບບຕ່ອງໂສ້ ເຊັ່ນ: ການສ້າງກຸ່ມໃດໜຶ່ງຂຶ້ນມາແລ້ວຈະມີການແນະນຳການລົງທຶນເປັນຈຳນວນໜ້ອຍ ແຕ່ໄດ້ຮັບຜົນຕອບແທນສູງ ແລະ ສາມາດສ້າງລາຍຮັບຕໍ່ວັນເປັນເງິນຈຳນວນຫລາຍ ຫາກິນໄດ້ຕະຫລອດຊີວິດ, ພວກເຂົາເຮັດທຸກວິທີທາງໃຫ້ຄົນຫລົງເຊື້ອຕົກເຂົ້າໄປໃນວັງວຽນຂອງພວກເຂົາ. ຮູບແບບຂອງທຸລະກິດຂອງເຂົາເຈົ້າແມ່ນມັກຈະເປັນປະເພດເຂົ້າມາຂາຍສິນຄ້າ ຫລາຍປະເພດ ຫລາຍລາຍການ ໂຄສະນາວ່າສາມາດສ້າງລາຍໄດ້ໃຫ້ໂຕເອງໃນແຕ່ລະວັນເປັນເງິນຈຳນວນຫລາຍ, ແຕ່ການຂາຍສິນຄ້າເປັນພຽງລາຍໄດ້ສຳຮອງເທົ່ານັ້ນສຳລັບຄົນທີ່ເຂົ້າມາເປັນສະມາຊິກແລ້ວ ລາຍໄດ້ຫລັກໆແມ່ນເນັ້ນໃຫ້ສະມາຊິກເລົ່ານັ້ນໄປລະດົມຄົນມາເປັນລູກທີມ ຫລື ເປັນສະມາຊິກຕໍ່ໆໄປ, ເມື່ອສາມາດຊອກສະມາຊິກເພີ່ມໄດ້ກໍຈະໄດ້ເງິນເປີເຊັນຈາກເງິນລົງທຶນຂອງສະມາຊິກເຂົ້າມາໃໝ່ຕໍ່ໄປເລື້ອຍໆ ຈົນກ່ວາເຮົາຈະຫາສະມາຊິກບໍ່ໄດ້ ລາຍໄດ້ກໍຈະຢຸດໃນມື້ນັ້ນທັນທີ ເມື່ອຮອດຈຸດອີ່ມໂຕແລ້ວ ຜູ້ທີ່ຕັ້ງໂຕເອງວ່າເປັນຕົວແທນຂອງບໍລິສັດ, ເປັນສາຂາຂອງທຸລະກິດ ແລະ ອື່ນໆກໍຈະຄ່ອຍໆມິດຫາຍໄປຢ່າງບໍ່ມີເຫດຜົນ.

ຄົນສ່ວນຫລາຍທີ່ຕົກເປັນເຫຍື້ອແມ່ນຄິດວ່າເງິນຈຳນວນໜ້ອຍດຽວຖືວ່າເປັນການສ່ຽງໂຊກກໍແລ້ວກັນ, ບາງທີມີໂອກາດໄດ້ແທ້
ກໍຈະເປັນການລົງທຶນທີ່ດີ. ແຕ່ຖ້າເຮົາມາລອງຄິດວ່າການລົງທຶນໜ້ອຍໆນັ້ນມັນສ້າງລາຍຮັບໃຫ້ເຂົາຫລາຍຊ້ຳໃດ ຖ້າການສູນເສຍເງິນຂອງຫລາຍໆຄົນມາລວມກັນກໍຈະເປັນລາຍໄດ້ມາຫາສານໃຫ້ກັບຜູ້ລິເລີ່ມຕັ້ງກຸ່ມຂຶ້ນມາເພື່ອຕົ້ມຕຸນໃນຂະບວນການດັ່ງກ່າວ.

ມື້ນີ້ຜູ້ຂຽນຈະລອງຄິດໄລ່ຫລີ້ນໆເປັນໂຕເລກອອກໃຫ້ເບິ່ງພໍປະມານຄ້າວໆວ່າ: ເງິນລົງທຶນເລີ່ມຕົ້ນເຂົ້າໄປເປັນສະມາຊິກ ຕົກຢູ່ຜູ້ລະ 9 ແສນກີບ, ເບິ່ງແລ້ວເປັນຈຳນວນເງິນບໍ່ຫລາຍເນາະ, ແຕ່ສົມມຸດວ່າມີຄົນຫລົງເຊື້ອເຂົ້າໄປລົງທຶນແຕ່ມື້ເລີ່ມຕົ້ນຈົນຮອດມື້ປິດໂຕ ປະມານຈັກ 20.000 ຄົນ X 900.000 ກີບ/ຄົນ = 18 ຕື້ກີບ ພຸ້ນເດີ! ນີ້ແມ່ນຈຳນວນເງິນມະຫາສານທີ່ສ້າງຮັ່ງຄູນມີໃຫ້ກັບພວກຕົ້ມຕຸນພວກນີ້. ດັ່ງນັ້ນພວກເຮົາຕ້ອງມີສະຕິຊຶ່ງຜ່ານມາຢູ່ປະເທດເຮົາກໍມີການສ້າງກຸ່ມຕົ້ມຕຸນຕົວະຍົົວະຫລອກລວງໃຫ້ຫລົງເຊື້ອແບບນີ້ເກີດຂື້ນມາແລ້ວ ຫລາຍກໍລະນີ, ມີທັງຈົນທະບຽນຖືກຕ້ອງ ແລະ ບໍ່ຖືກຕ້ອງ ເຊັ່ນ: ສີວິໄລ ສິນເຊື່ອ, ພີເອັສ, ເອເຊຍ ສິນເຊື່ອ, ແມັກກີ ແລະ ອຶ່ນໆ.

ວິທີທີ່ກຸ່ມແຊລູກໂສ້ມັກໃຊ້ໃນເບື້ອງຕົ້ນພວກເຂົາຈະຊວນເຮົາເຂົ້າຮ່ວມກຸ່ມທາງອອນລາຍຮັບຟັງການບັນລະຍາຍຈາກຫົວໜ້າທີມໃນກຸ່ມກ່ອນເພື່ອທຳຄວາມຮູ້ຈັກ ແລະ ຫລັງຈາກນັ້ນຈະມາການຈັດສາກຖ່າຍຮູບຄູ່ກັບເງິນມາໂຊ, ຖ່າຍຮູບມີເງິນໂອນເຂົ້າບັນຊີແຕ່ລະວັນສູງເຖິ່ງສິບຊາວລ້ານຕໍ່ວັນອອກມາໂຊວ່າເປັນລາຍໄດ້ຈາກການເຂົ້າເປັນສະມາຊິກລົງທຶນ, ຖ່າຍຮູບຄູ່ເຮືອນໃຫຍ່ເຮືອນງາມ, ຖ່າຍຮູບຄູ່ລົດຫຍີ່ຫໍ່ຕ່າງໆທີ່ມີລາຄາສູງ ແລະ ອີກຫລາຍຢ່າງທີ່ຖືກຈັດສາກຂຶ້ນຢ່າງຄືກຄື້ນ, ແລະ ຕາມມາດ້ວຍໂຄສະນາຫລາຍຮູບແບບມີໂປຣໂມຊັນນັ້ນນີ້ ພ້ອມທັງເລັ່ງລັດໃຫ້ເຮົາເກີດຄວາມຕັດສິນໃຈ ແລະ ອຶ່ນໆ ເພື່ອເປັນການຊັກຊວນລອກລໍ້ໃຫ້ເຂົ້າເປັນສະມາຊິກເຂົ້າ ແລະ ຮ່ວມລົງທຶນ ແລ້ວກໍຈະຕົກເປັນເຫຍື່ອຂອງພວກເຂົາໄປຢ່າງສົມບູນ.