ຍີ່ປຸ່ນກຽມປິດຊາຍແດນ ບໍ່ຮັບຊາວຕ່າງປະເທດທັງໝົດເຂົ້າປະເທດ ຢ້ານອັນຕະລາຍໂອມິຄຣອນ
ນາຍົກລັດຖະມົນຕີ ຟູມິໂອະ ຄິຊິດະ ຂອງຍີ່ປຸ່ນ ເປີດເຜີຍຕໍ່ສື່ໃນວັນທີ 29 ພະຈິກວ່າ: ຍີ່ປຸ່ນຈະປິດຊາຍແດນ ບໍ່ຮັບຊາວຕ່າງປະເທດທີ່ເຂົ້າມາໃໝ່ ເຊິ່ງລວມທັງນັກເດີນທາງທີ່ຈະເຂົ້າໄປເຮັດທຸລະກິດ ແລະ ນັກສຶກສາ ຫລື ພະນັກງານຝຶກງານຊາວຕ່າງປະເທດ ໂດຍເລີ່ມແຕ່ວັນທີ 30 ພະຈິກ ເພື່ອປ້ອງກັນການລະບາດຂອງເຊື້ອໂຄວິດສາຍພັນໂອມິຄຣອນ ທີ່ກຳລັງສ້າງຄວາມກັງວົນໃນຫລາຍປະເທດ.
“ນີ້ເປັນມາດຕະການປ້ອງກັນ ແລະ ມາດຕະການສຸກເສີນ ເພື່ອຫລີກລ່ຽງສະຖານະການຮ້າຍແຮງທີ່ສຸດ” ທ່ານ ຄິຊິດະ ກ່າວຕໍ່ນັກຂ່າວຢູ່ສຳນັກງານນາຍົກລັດຖະມົນຕີ.
ຂະນະທີ່ມາດຕະການດັ່ງກ່າວຈະບໍ່ສົ່ງຜົນກະທົບຕໍ່ຊາວຕ່າງປະເທດຜູ້ມີຖິ່ນອາໄສຢູ່ຍີ່ປຸ່ນ ທີ່ເດີນທາງກັບເຂົ້າປະເທດ ແລະ ພົນລະເຮືອນສັນຊາດຍີ່ປຸ່ນ, ແຕ່ຖ້າເດີນທາງມາຈາກ 14 ປະເທດທີ່ຢືນຢັນວ່າພົບຜູ້ຕິດເຊື້ອໂຄວິດສາຍພັນໂອມິຄຣອນ ຈະຕ້ອງກັກຕົວໃນສະຖານທີ່ກັກຕົວທີ່ລັດຖະບານຈັດກຽມໄວ້.
ທ່ານ ຄິຊິດະ ເນັ້ນວ່າ: ມາດຕະການຫ້າມຕ່າງປະເທດເຂົ້າປະເທດນັ້ນ ເປັນພຽງມາດຕະການຊົ່ວຄາວ ຈົນກວ່າຜູ້ຊ່ຽວຊານຈະຮູ້ວ່າໂຄວິດສາຍພັນນີ້ຮ້າຍແຮງສໍ່າໃດ.
“ນີ້ເປັນມາດຕະການພິເສດໃນປັດຈຸບັນ ຈົນກວ່າເຮົາຈະຮູ້ຂໍ້ມູນກ່ຽວກັບສາຍພັນໂອມິຄຣອນຫລາຍກວ່ານີ້” ທ່ານ ຄິຊິດະ ກ່າວ. ພ້ອມຮຽກຮ້ອງໃຫ້ປະຊາຊົນຢ່າງແຕກຕື່ນ ແລະ ໃສ່ຜ້າປິດປາກ-ດັງ ແລະ ຮັກສາໄລຍະຫ່າງ. ຂະນະທີ່ໃຫ້ຄວາມໝັ້ນໃຈວ່າ: ຍີ່ປຸ່ນເປັນໜຶ່ງໃນປະເທດທີ່ມີອັດຕາການສັກວັກຊີນສູງທີ່ສຸດ.
ສຳລັບໄວຣັສໂຄວິດສາຍພັນໂອມິຄຣອນນັ້ນ ຄາດວ່າອາດແຜ່ລະບາດໄດ້ງ່າຍກວ່າສາຍພັນອື່ນໆ, ແຕ່ຍັງບໍ່ມີຂໍ້ມູນແນ່ນອນວ່າສາມາດຫລີກລ່ຽງພູມຕ້ານທານວັກຊີນໄດ້ ໂດຍອົງການອະນາໄມໂລກ ຫລື WHO ຈັດໃຫ້ໄວຣັສສາຍພັນນີ້ຢູ່ໃນກຸ່ມສາຍພັນທີ່ໜ້າກັງວົນ.
ທັງນີ້ ອາຟຣິກາໃຕ້ເປັນປະເທດທຳອິດທີ່ພົບຜູ້ຕິດເຊື້ອໂຄວິດສາຍພັນໂອມິຄຣອນ ແລະ ຈົນເຖິງປັດຈຸບັນມີຫລາຍປະເທດທີ່ຢືນຢັນແລ້ວວ່າພົບຜູ້ຕິດເຊື້ອເຊັ່ນກັນເຊັ່ນ: ບອດສວານາ, ອົດສະຕຣາລີ, ເບລຢ້ຽມ, ອັງກິດ, ເດນມາກ, ເຢຍລະມັນ, ອິດສະລາແອນ, ອິຕາລີ, ເນເທີແລນ, ຝຣັ່ງ, ການາດາ ແລະ ຮົງກົງ.
ສ່ວນຍີ່ປຸ່ນນັ້ນ, ທ່ານ ຄິຊິດະ ເຜີຍວ່າ: ເຈົ້າໜ້າທີ່ລັດຖະບານກຳລັງສືບສວນກໍລະນີຜູ້ຕິດເຊື້ອຄົນໜຶ່ງທີ່ເດີນທາງມາຈາກນາມິເບຍ ເຊິ່ງກວດພົບວ່າຕິດເຊື້ອໂຄວິດ ແຕ່ຍັງຢູ່ລະຫວ່າງການກວດສອບ ເພື່ອຢືນຢັນວ່າເປັນສາຍພັນໂອມິຄຣອນ ຫລື ບໍ່.
ອ້າງອີງ:
- https://www.japantimes.co.jp/news/2021/11/29/national/japan-omicron-entry-restrictions/
- https://www3.nhk.or.jp/nhkworld/en/news/20211129_24/
