ສປປ ລາວ ໄດ້ຮັບວັກຊີນກັນພະຍາດ ໂຄວິດ-19 ເພີ່ມອີກ 600,000 ກ່ວາໂດສ໌ ຈາກການຊ່ວຍເຫລືອຜ່ານໂຄງການ COVAX Facility
November 29, 2021 - 2:41 PM
ວັນທີ 29 ພະຈິກ 2021 ນີ້ ທີ່ກະຊວງສາທາລະນະສຸກ, ສປປ ລາວ ໄດ້ຮັບວັກຊີນປ້ອງກັນພະຍາດ ໂຄວິດ-19 ຊະນິດ AstraZeneca ຈໍານວນ 600,000 ກ່ວາໂດສ໌ ຈາກການຊ່ວຍເຫລືອໂດຍຜ່ານ COVAX Facility , ເຊີ່ງແມ່ນການຮ່ວມມືກັນລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), ອົງການກາວີ (Gavi) ແລະ ອົງການອະນາໄມໂລກ (WHO), ໂດຍມີ ອົງການຢູນິເຊັບ ເປັນຄູ່ຮ່ວມງານສຳຄັນໃນການຈັດສົ່ງ – ເເລະ ເປັນການຈັດສົ່ງວັກຊີນຊຸດທີ 6 ພາຍໃຕ້ COVAX.
ການຈັດສັນວັກຊີນກັນພະຍາດ ໂຄວິດ-19 ຊຸດໃໝ່ນີ້ປະກອບມີວັກຊີນ AstraZeneca 132,000 ໂດສ໌ ເຊີ່ງເປັນການປະກອບສ່ວນໂດຍກົງຈາກ COVAX Facility,ແລະ ການຊ່ວຍເຫລືອວັກຊີນຊະນິດດຽວກັນຈາກປະເທດ ຟິນແລນ, ສະວີເດນ ແລະ ເນເທີແລນ ໂດຍຜ່ານ COVAX Facility, ເຊິ່ງປະກອບມີ 100,800 ໂດສ໌ ຈາກປະເທດຟິນແລນ, 199,200 ໂດສ໌ ຈາກປະເທດສວີເດນ ແລະ 199,200 ໂດສ໌ ຈາກປະເທດເນເທີແລນ.
ໂອກາດນີ້, ທ່ານ ດຣ. ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກກ່າວວ່າ: “ລັດຖະບານແຫ່ງ ສປປ ລາວ ຍິນດີຕ້ອນຮັບການຈັດສັນວັກຊີນຊຸດໃໝ່ນີ້ຈາກ COVAX Facility ແລະ ຂໍສະເເດງຄວາມຂອບໃຈຕໍ່ລັດຖະບານເເຫ່ງ ຟິນແລນ, ສະວີເດັນ ແລະ ເນເທີແລນ ທີ່ໄດ້ໃຫ້ການປະກອບສ່ວນອັນລໍ້າຄ່າຢ່າງສູງນີ້ແກ່ ສປປ ລາວ ໃນຂະບວນການສັກວັກຊີນກັນພະຍາດໂຄວິດ-19 ຢ່າງຕໍ່ເນື່ອງ, ໂດຍສະເພາະໃນປັດຈຸບັນນີ້ທີ່ພວກເຮົາໄດ້ກໍານົດເປົ້າໝາຍໃໝ່ຂອງການສັກວັກຊີນໃຫ້ໄດ້ 70 ເປີເຊັນ ຂອງປະຊາກອນທັງໝົດໃນທ້າຍປີ 2021 ນີ້”.
ວັກຊີນດັ່ງກ່າວນີ້ເເມ່ນຈະໄດ້ນໍາໃຊ້ເພື່ອໃຫ້ການປ້ອງກັນເເກ່ຜູ້ທີ່ມີຄວາມສ່ຽງສູງຕໍ່ການຕິດເຊື້ອພະຍາດ ໂຄວິດ-19 ຂັ້ນຮ້າຍແຮງ ແຕ່ຍັງບໍ່ທັນໄດ້ຮັບວັກຊີນຄົບເຂັມເທື່ອ. ກຸ່ມບູລິມະສິດສຳລັບການສັກວັກຊີນກັນພະຍາດ ໂຄວິດ-19 ເເມ່ນປະກອບມີ ພະນັກງານສາທາລະນະສຸກແຖວໜ້າ, ຜູ້ສູງອາຍຸ 60 ປີຂຶ້ນໄປ, ຄົນທີ່ມີພະຍາດປະຈໍາໂຕ, ແມ່ຍິງຖືພາ ແລະ ບຸກຄະລາກອນທີ່ສໍາຄັນ ເຊັ່ນ: ຄູສອນ ແລະ ພະນັກງານໃນທົ່ວປະເທດ, ອີງຕາມທີ່ລະບຸໄວ້ໃນ ແຜນປະຕິບັດການສັກວັກຊີນກັນພະຍາດ ໂຄວິດ-19 ແຫ່ງຊາດ.
