ແພດອາຟຣິກາໃຕ້ເຜີຍ ຜູ້ຕິດເຊື້ອໂຄວິດສາຍພັນໂອມິຄຣອນ ບໍ່ຄືໂຄວິດທົ່ວໄປ ແຕ່ບໍ່ຮຸນແຮງ

ແພດຊາວອາຟຣິກາໃຕ້ຄົນທຳອິດທີ່ສົ່ງສັນຍານເຕືອນກ່ຽວກັບໂຄວິດສາຍພັນໂອມິຄຣອນເປີດເຜີຍວ່າ: ອາການຂອງຜູ້ທີ່ຕິດເຊື້ອໄວຣັສສາຍພັນໃໝ່ “ຜິດປົກກະຕິ ແຕ່ບໍ່ຮຸນແຮງ”.

ນາງ ແອນເຈລີກ ໂຄເອດຊີ ເປີດເຜີຍຕໍ່ສື່ອັງກິດ The Telegraph ວ່າ: ນາງເລີ່ມຕື່ນຕົວວ່າອາດເກີດໄວຣັສສາຍພັນໃໝ່ເມື່ອເລີ່ມມີຜູ້ຕິດເຊື້ອມາເຂົ້າຮັບການປິ່ນປົວຢູ່ຄລີນິກສ່ວນຕົວຂອງນາງໃນນະຄອນຫລວງພຣິທໍເຣຍຊ່ວງຕົ້ນເດືອນນີ້ ດ້ວຍອາການຂອງໂຄວິດ ແຕ່ບໍ່ຮູ້ທັນທີໃນຕອນນັ້ນ.

ຜູ້ຕິດເຊື້ອເຫລົ່ານີ້ເປັນຄົນໄວໜຸ່ມທີ່ມີພູມຫລັງ ແລະ ຊາດພັນຕ່າງກັນ ພວກເຂົາມາຄລີນິກຂອງນາງດ້ວຍອາການອ່ອນເພຍຂັ້ນຮຸນແຮງ ແລະ ອີກຄົນໜຶ່ງເປັນເດັກອາຍຸ 6 ປີທີ່ມີອັດຕາການເຕັ້ນຂອງຫົວໃຈສູງຫລາຍ. ເຖິງຢ່າງໃດກໍຕາມ, ໃນບັນດາຜູ້ຕິດເຊື້ອເຫລົ່ານີ້ບໍ່ມີໃຜສູນເສຍການຮັບລົດຊາດ ຫລື ກິ່ນ.

“ອາການຂອງຜູ້ຕິດເຊື້ອກຸ່ມນີ້ແຕກຕ່າງກັນຫລາຍ ແລະ ບໍ່ຮຸນແຮງຫລາຍເມື່ອທຽບໃສ່ຜູ້ຕິດເຊື້ອທີ່ຂ້ອຍເຄີຍປິ່ນປົວມາກ່ອນ” ນາງ ໂຄເອດຊີ ແພດທົ່ວໄປທີ່ມີປະສົບການ 33 ປີ ແລະ ປັດຈຸບັນດຳລົງຕຳແໜ່ງປະທານແພດສະມາຄົມແຫ່ງອາຟຣິກາໃຕ້ ຄຽງຄູ່ກັບການເປີດຄລີນິກສ່ວນຕົວ ກ່າວ.

ນາງໄດ້ແຈ້ງຕໍ່ຄະນະກຳມະການທີ່ປຶກສາດ້ານວັກຊີນຂອງອາຟຣິກາໃຕ້ເມື່ອວັນທີ 18 ພະຈິກ ເມື່ອພົບວ່າຄອບຄົວໜຶ່ງເຊິ່ງມີສະມາຊິກ 4 ຄົນ ມີຜົນກວດໂຄວິດເປັນບວກ ໂດຍທັງໝົດມີອາການອ່ອນເພຍຮຸນແຮງ.

ນາງ ໂຄເອດຊີ ກ່າວວ່າ: ຄົນໄຂ້ຂອງນາງປະມານ 20 ກວ່າຄົນປ່ວຍເປັນໂຄວິດສາຍພັນໃໝ່ ໂດຍສ່ວນຫລາຍເປັນຜູ້ຊາຍທີ່ແຂງແຮງ ແຕ່ພັດ “ຮູ້ສຶກເມື່ືອຍຫລາຍ” ແລະ ປະມານເຄິ່ງໜຶ່ງໃນຈຳນວນນີ້ບໍ່ໄດ້ຮັບການສັກວັກຊີນ.

“ເຮົາມີກໍລະນີທີ່ໜ້າສົນໃຈຫລາຍກໍລະນີ ໜຶ່ງຄືເດັກອາຍຸປະມານ 6 ປີ ເຊິ່ງມີອຸນຫະພູມ ແລະ ອັດຕາການເຕັ້ນຂອງຫົວໃຈສູງຫລາຍ ຂ້ອຍຄິດວ່າຄວນໃຫ້ນາງນອນຢູ່ຄລີນິກ ຫລື ບໍ່ ແຕ່ເມື່ອຂ້ອຍຕິດຕາມອາການຂອງນາງໃນອີກ 2 ວັນຕໍ່ມາພັດພົບວ່າອາການຂອງນາງດີຂຶ້ນຫລາຍ” ນາງ ໂຄເອດຊີ ກ່າວ.

ນາງ ໂຄເອດຊີ ໄດ້ບັນລະຍາຍສະຫລຸບໃຫ້ສະມາຄົມການແພດອື່ນໆຂອງອາຟຣິກາເມື່ອວັນເສົາ ໂດຍນາງຢືນຢັນວ່າ: ຄົນໄຂ້ຂອງນາງທຸກຄົນມີສຸຂະພາບແຂງແຮງ ແຕ່ນາງກັງວົນວ່າ ໄວຣັສສາຍພັນໃໝ່ນີ້ອາດສົ່ງຜົນກະທົບຕໍ່ຜູ້ສູງອາຍຸຮຸນແຮງກວ່າຫລາຍ ໂດຍສະເພາະຜູ້ສູງອາຍຸທີ່ມີພະຍາດປະຈຳຕົວເຊັ່ນ: ພະຍາດເບົາຫວານ ຫລື ພະຍາດຫົວໃຈ ແລະ ບໍ່ໄດ້ຮັບການສັກວັກຊີນ.

“ສິ່ງທີ່ເຮົາຕ້ອງກັງວົນໃນຕອນນີ້ຄື ຜູ້ສູງອາຍຸທີ່ບໍ່ໄດ້ຮັບວັກຊີນຕິດເຊື້ອໄວຣັສສາຍພັນໃໝ່ ແລະ ຖ້າພວກເຂົາບໍ່ໄດ້ຮັບການສັກວັກຊີນ ເຮົາຈະເຫັນຄົນຈຳນວນຫລາຍທີ່ມີອາການປ່ວຍຮຸນແຮງ” ນາງກ່າວ.

ທັງນີ້ ອາຟຣິກາໃຕ້ມີປະຊາກອນທີ່ມີອາຍຸຫລາຍກວ່າ 65 ປີຢູ່ພຽງປະມານ 6% ຂອງປະຊາກອນທັງໝົດ ເຊິ່ງໝາຍຄວາມວ່າຜູ້ສູງອາຍຸທີ່ມີຄວາມສ່ຽງຕໍ່ໄວຣັສຫລາຍກວ່າອາດຕ້ອງໃຊ້ເວລາພໍສົມຄວນຈຶ່ງຈະປາກົດ.

ສາຍພັນ B.1.1.529 ເຊິ່ງອົງການອະນາໄມໂລກ (WHO) ຕັ້ງຊື່ວ່າ ໂອມິຄຣອນ ຖືກພົບຄັ້ງທຳອິດໃນບອດສວານາເມື່ອວັນທີ 11 ພະຈິກ ແລະ ປັດຈຸບັນພົບແລ້ວໃນອາຟຣິກາໃຕ້, ອັງກິດ, ອິດສະລາແອນ, ເນເທີແລນ, ຮົງກົງ ແລະ ເບລຢ້ຽມ.

ໂອມິຄຣອນເປັນໄວຣັສໂຄວິດສາຍພັນທີ່ມີການກາຍພັນຫລາຍທີ່ສຸດເທົ່າທີ່ມີການຄົ້ນພົບຈົນເຖິງປັດຈຸບັນ ໂດຍມີການກາຍພັນບ່ອນສ່ວນໂປຣຕີນໜາມຂອງໄວຣັສເຖິງ 32 ຕຳແໜ່ງ. ນັກວິທະຍາສາດກັງວົນວ່າການກາຍພັນດັ່ງກ່າວອາດເຮັດໃຫ້ໄວຣັສສາມາດຫລີກລ່ຽງວັກຊີນ ແລະ ແຜ່ກະຈາຍໄດ້ຢ່າງວ່ອງໄວ.

ນັກວິທະຍາສາດອາຟຣິກາໃຕ້ລະບຸວ່າ: ໂອມິຄຣອນເປັນສາເຫດທີ່ເຮັດໃຫ້ຈຳນວນຜູ້ຕິດເຊື້ອໂຄວິດເພີ່ມຂຶ້ນໃນແຂວງກົວເຕັງ ເຊິ່ງເປັນທີ່ຕັ້ງຂອງນະຄອນຫລວງພຣິທໍເຣຍ ເມືອງຫລວງ ແລະ ໂຈຮັນເນສເບິກ ເຊິ່ງເປັນເມືອງໃຫຍ່ທີ່ສຸດ ແລະ ເປັນສູນກາງເສດຖະກິດ ແລະ ການຄ້າຂອງອາຟຣິກາໃຕ້ ໂດຍຜູ້ຕິດເຊື້ອເພີ່ມຂຶ້ນຈາກປະມານ 550 ຄົນຕໍ່ວັນໃນອາທິດຜ່ານມາ ເປັນເກືອບ 4.000 ຄົນຕໍ່ວັນໃນປັດຈຸບັນ.

ອັງກິດ, ອາເມລິກາ, ສະຫະພາບເອີຣົບ ແລະ ອິດສະລາແອນ ປະກາດຫ້າມເດີນທາງໄປ ແລະ ກັບຈາກອາຟຣິກາໃຕ້ ແລະ ປະເທດໃກ້ຄຽງ ໄດ້ແກ່ ບອດສວານາ, ເອສວາຕີນີ, ເລໂຊໂທ, ໂມຊຳບິກ, ນາມິເບຍ ແລະ ຊິມບັບເວ.

ການຫ້າມເດີນທາງຂອງປະເທດຕາເວັນຕົກສ້າງຄວາມບໍ່ພໍໃຈໃຫ້ຊາວອາຟຣິກາໃຕ້ ເຊິ່ງຮຽກຮ້ອງວ່າພວກເຂົາຖືກລົງໂທດ ທັງໆທີ່ສະຖາບັນວິໄຈຂອງພວກເຂົາສາມາດຄົ້ນພົບໄວຣັສກາຍພັນ ແລະ ເປີດເຜີຍຢ່າງໂປ່ງໃສ.

ອ້າງອີງ:

https://www.telegraph.co.uk/…/south-african-doctor…/