ກັກໂຕບຸກຄົນທີ່ນໍາເອົາເຄື່ອງດື່ມທີ່ມີທາດເຫຼົ້າ ແລະ ຫຼິ້ນການພະນັນ(ໄພ້) ໃນໂຮງໝໍພາກສະໜາມ

ພັທ ພອນທິບ ພັນທະວົງ ຫົວໜ້າກອງພັນປ້ອງກັນເຄື່ອນທີ່ ນວ ໃຫ້ຮູ້ວ່າ:

ໃນວັນທີ 22 ພະຈິກ 2021 ກໍາລັງກອງພັນປ້ອງກັນເຄື່ອນທີ່ ນວ ໄດ້ເຂົ້າຄຸມຕົວ ທ້າວ ສຸລິເດດ ອາຍຸ 31 ປີ ຢູ່ໂຮງໝໍພາກສະໜາມດົງໂດກ ທີ່ຜູ້ກ່ຽວໄດ້ເຂົ້າໄປປິ່ນປົວ ແລະ ໄດ້ສ້າງຄວາມບໍ່ສະຫງົບຢູ່ ເຊິ່ງຜູ້ກ່ຽວໄດ້ລະເມີດຂໍ້ຫ້າມຂອງໂຮງໝໍທີ່ໄດ້ກໍານົດໄວ້.

ຜູ້ກ່ຽວໄດ້ເຂົ້າໄປປິ່ນປົວຢູ່ໂຮງໝໍດັ່ງກ່າວ ແຕ່ວັນທີ 11 ພະຈິກ 2021 ພໍຮອດວັນທີ 21 ພະຈິກ ກໍໄດ້ສ້າງຄວາມບໍ່ສະຫງົບ ໂດຍການນໍາເອົາເຄື່ອງດື່ມທີ່ມີທາດເຫຼົ້າ ເຂົ້າໄປດື່ມຢູ່ໃນໂຮງໝໍ, ຫຼິ້ນການພະນັນ(ໄພ້) ນອກຈາກນີ້ ຍັງອາລະວາດ ແລະ ພະຍາຍາມທໍາຮ້າຍຮ່າງກາຍ ພະນັກງານ ທີ່ປະຈໍາຢູ່ໂຮງໝໍດັ່ງກ່າວ ປັດຈຸບັນ ໄດ້ນໍາຕົວຜູ້ກ່ຽວໄປໂຮງໝໍພາກສະໜາມຫຼັກ 27.

ກອງບັນຊາການ ປກສ ນວ ຂໍສະແດງຄວາມຊົມເຊີຍຕໍ່ກໍາລັງ ປ້ອງກັນເຄື່ອນທີ່ ນວ ໃນການລົງແກ້ໄຂເຫດການຄັ້ງນີ້ ເຖິງວ່າຈະມີຄວາມສ່ຽງໃນການຕິດເຊື້ອພະຍາດ ໂຄວິດ-19 ກໍ່ຕາມ ນອກຈາກນີ້ ຂໍຮຽກຮ້ອງມາຍັງຜູ້ທີ່ກັກກັນຢູ່ບັນດາສູນຕ່າງໆ ແລະ ຜູ້ທີ່ກໍາລັງປິ່ນປົວຢູ່ໂຮງໝໍ ໃຫ້ເອົາໃຈໃສ່ປະຕິບັດມາດຕະການ ທີ່ສູນ ແລະ ໂຮງໝໍວາງອອກ ຢ່າງເຂັ້ມງວດ ເພື່ອພ້ອມກັນຢັບຢັ້ງ ແລະ ປ້ອງກັນບໍ່ໃຫ້ພະຍາດດັ່ງກ່າວແຜ່ລະບາດອອກເປັນວົງກວ້າງ.