ປະທານປະເທດ ຊີ້ນຳອົງການແນວລາວສ້າງຊາດສຸມໃສ່ 6 ວຽກງານສຳຄັນ

ໃນໂອກາດເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ໃນຕອນເຊົ້າວັນທີ 26 ພະຈິກນີ້ທີ່ຫໍປະຊຸມແຫ່ງຊາດ, ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ໃຫ້ກຽດໂອ້ລົມຕໍ່ກອງດັ່ງກ່າວ,

ເພື່ອໃຫ້ທິດຊີ້ນໍາຄະນະກໍາມະການສູນກາງແນວລາວສ້າງຊາດສະໄໝທີ XI ໃຫ້ສຸມໃສາ 6 ວຽກຕົ້ນຕໍຄ:

1. ຕັ້ງໜ້າເສີມຂະຫຍາຍບົດບາດ ຂອງແນວລາວສ້າງຊາດ ໃນການເຕົ້າໂຮມຄວາມສາມັກຄີເປັນປຶກແຜ່ນຂອງຊາດ, ເຊີດຊູສະຕິເປັນເຈົ້າ ແລະ ຄວາມຮັບຜິດຊອບຂອງຄົນລາວຕໍ່ຊາຕາກໍາຂອງປະເທດຊາດ.
2. ສືບຕໍ່ຍົກລະດັບຄວາມສາມາດ ນຳພາສຶກສາອົບຮົມຍົກລະດັບຄວາມຕື່ນຕົວເຂົ້າຮ່ວມ ການປະຕິບັດກົນໄກຂອງລະບອບປະຊາທິປະໄຕປະຊາຊົນ ໃຫ້ເຂັ້ມແຂງ, ຮັບປະກັນສິດເປັນເຈົ້າຂອງປະຊາຊົນ, ຄວາມເປັນປະຊາທິປະໄຕ ແລະ ຍຸດຕິທຳໃນສັງຄົມບົນພື້ນຖານເຄົາລົບນັບຖືທຸກໆແນວທາງນະໂນບາຍພັກ ແລະ ລະບຽບກົດໝາຍຂອງລັດໃຫ້ເຂັ້ມງວດ,ໃຫ້ປະຊາຊົນມີສ່ວນຮ່ວມເຂົ້າໃຍການປຶກສາຫາລື, ກວດກາ ແລະ ໃຫ້ປະຊາຊົນໄດ້ຮັບຜົນປະໂຫຍດເຮັດໄດ້ແນວນີ້, ຈຶ່ງເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ເກີດໝາກຜົນ ແລະ ເປັນຮູບປະທໍາຕົວຈິງ; ພ້ແມນີ່ກໍເແາໃຈໃສາຕ້ານບັນດາປັດໄຈໜໍ່ແໜງ, ສວຍໃຊ້ສາສະໜາ, ບັນຫາສິດທິມະນຸດ, ບັນຫາປະຊາທິປະໄຕແບບຈອມປອມ ເຂົ້າມ້າງຄວາມສາມັກຄີປອງດອງຂອງປະຊາ ຊົນ ເພື່ອຫັນເອົາແນວຄິດ ຂອງຄົນລາວເຜົ່າຕ່າງໆ ໄປສູ່ຄວາມແຕກແຍກ, ແບ່ງຊັ້ນວັນນະ, ແບ່ງເຜົ່າ ແລະ ອື່ນໆ.

3. ຕ້ອງຍົກສູງບົດບາດຕິດຕາມ, ກວດກາຂອງແນວລາວສ້າງຊາດໃຫ້ແຂງແຮງ ໂດຍຜ່ານຄໍາເຫັນ-ຄໍາສະເໜີຂອງປະຊາຊົນບັນດາເຜົ່າ ຕໍ່ການຈັດຕັ້ງປະຕິບັດແນວທາງນະໂຍບາຍຂອງພັກໃນແຕ່ລະໄລຍະທັງຕິດຕາມ, ກວດກາການເຄື່ອນໄຫວ ຂອງອົງການອໍານາດລັດຂອງສູນກາງ ແລະ ທ້ອງຖິ່ນ, ເບິ່ງແຍງດູແລ ແລະ ຕິດຕາມກວດກາການປະຕິບັດໜ້າທີ່ ຂອງຜູ້ທີ່ປະຊາຊົນເລືອກມາໃຫ້ເປັນຜູ້ຮັບໃຊ້ຊາດ, ຮັບໃຊ້ປະຊາຊົນນັ້ນວ່າ ເປັນຜູ້ບໍລິສຸດຜຸດຜ່ອງ ຫລື ບໍ່, ເປັນຜູ້ຈົ່ງຮັກພັກດີຕໍ່ພັກ, ຕໍ່ປະເທດ ແລະ ມີນໍ້າໃຈຮັບໃຊ້ປະຊາຊົນ ຫລື ບໍ່, ຖ້າເຫັນຜູ້ທີ່ດີ, ຜູ້ທີ່ເດັ່ນກໍ່ຕ້ອງສະໜັບສະໜູນ, ອູ້ມຊູຊ່ວຍເຫລືອ ແລະ ຖືໄດ້ວ່າເປັນຜູ້ທີ່ປະຊາຊົນໃຫ້ຄວາມເຊື່ອໝັ້ນ, ເຄົາລົບນັບຖື, ແຕ່ຖ້າເຫັນຜູ້ທີ່ອ່ອນ ກໍຕ້ອງກໍ່ສ້າງຊ່ວຍເຫລືອຕໍານິຕິຊົມໄດ້, ແຕ່ຖ້າເຫັນຜູ້ກະທໍາຜິດກໍສາມາດສະເໜີໃຫ້ຜູ້ມີໜ້າທີ່, ມີສິດອໍານາດແກ້ໄຂຢ່າງທັນການ, ບໍ່ປະປ່ອຍໃຫ້ເປັນຊ່ອງວ່າງໃຫ້ແກ່ຄົນບໍ່ດີເອົາເປັນຂໍ້ອ້າງເພື່ອສ້າງຄວາມແຕກແຍກໃນສັງຄົມເຮົາ.

4. ອົງການແນວໂຮມແຕ່ລະຂັ້ນ ຕ້ແງສືບຕໍ່ປັບປຸງແບບແຜນ ແລະ ກົນໄກ ການເຄື່ອນໄຫວເຮັດວຽກຂອງຕົນໃຫ້ຄ່ອງຕົວ ແລະ ສາມາດຮັບປະກັນປະສິດທິຜົນຂອງການປະຕິບັດໜ້າທີ່ການເມືອງເປັນຕົ້ນ ກົນໄກການເຄື່ອນໄຫວເຮັດວຽກ ລະຫວ່າງຄະນະກໍາມະການສູນກາງແນວລາວສ້າງຊາດກັບຂັ້ນທ້ອງຖິ່ນ-ຮາກຖານ ແລະ ກັບບັນດາອົງການພາຄີອົງການແນວໂຮມແຕ່ລະຂັ້ນໃຫ້ມີຄວາມຄ່ອງຕົວ.

5. ຄະນະກໍາມະການສູນກາງແນວລາວສ້າງຊາດຊຸດໃໝ່ ທີ່ໄດ້ຮັບຮອງເອົານີ້ຈົ່ງເພີ່ມທະວີຄວາມສາມັກຄີພາຍໃນ ແລະ ເຮັດວຽກຮ່ວມມືສາກົນ ແລະ ເປີດກວ້າງສາຍພົວພັນການທູດປະຊາຊົນຕາມແນວທາງການຕ່າງປະເທດຂອງພັກ-ລັດເຮົາ, ຮັດແໜ້ນສາຍພົວພັນມິດຕະພາບ ແລະ ການຮ່ວມມືກັບອົງການແນວໂຮມ ແລະ ອົງການຈັດຕັ້ງປະຊາຊົນ ຂອງບັນດາປະເທດເພື່ອນມິດທີ່ມີມູນເຊື້ອ, ປະເທດເພື່ອນບ້ານໃກ້ຄຽງ, ປະເທດເພື່ອນມິດອື່ນໆ, ອົງການຈັດຕັ້ງສາກົນ ເພື່ອຍາດແຍ່ງການສະໜັບສະໜູນຊ່ວຍ ເຫລືອ ປະກອບສ່ວນເຂົ້າໃນໂຄງການພັດທະນາເສດຖະກິດ-ສັງຄົມ ປະເທດເຮົາໃຫ້ເຕີບໃຫຍ່ຂະຫຍາຍຕົວ.

6. ສືບຕໍ່ສ້າງເງື່ອນໄຂ ແລະ ຊຸກຍູ້ສິ່ງອໍານວຍຄວາມສະດວກຕ່າງໆ ໃຫ້ແກ່ພີ່ນ້ອງເຊື້ອສາຍລາວທີ່ຢູ່ຕ່າງປະເທດ ທີ່ຍັງຮັກເຊື້ອແພງຊາດໄດ້ອວ່າຍໜ້າມາຫາປະເທດຊາດທີ່ເປັນບ້ານເກີດເມືອງນອນຂອງຕົນ ເພື່ອຮ່ວມກັນສ້າງສາພັດທະນາປະເທດເທົ່າທີ່ມີເງື່ອນໄຂ ແລະ ຄວາມສາມາດຂອງຕົນ ເພື່ອຮ່ວມກັບປະຊາຊົນພາຍໃນປະເທດສ້າງສາພັດທະນາຊາດບ້ານເມືອງໃຫ້ຈະເລີນຮຸ່ງເຮືອງຕໍ່ໄປ.