ພະຍາດໂຄວິດ-19 ບໍ່ຮູ້ວ່າຈະສິ້ນສຸດລົງເມື່ອໃດ ໂດຍຫລາຍປະເທດປະກາດຍອມຮັບທີ່ຈະຢູ່ຮ່ວມນຳມັນ

ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວມຄຸມພະຍາດຕິດຕໍ່ ລາຍງານວັນທີ 25 ພະຈິກ 2021 ນີ້ວ່າ: ມາຮອດມື້ນີ້ໂຕເລກລາຍງານຜູ້ຕິດເຊື້ອໃໝ່ໃນ ສປປ ລາວ ກໍຍັງບໍ່ມີທ່າອ່ຽງຫລຸດລົງ ເຊິ່ງສັງເກດເຫັນວ່າ ບັນດາແຂວງທີ່ບໍ່ເຄີຍມີລາຍງານຕິດເຊື້ອມາກ່ອນກໍໄດ້ມີການຕິດເຊື້ອເພີ່ມຂຶ້ນເປັນຕົ້ນແມ່ນແຂວງຫົວພັນ, ຜົ້ງສາລີ , ສຳລັບແຂວງທີ່ຕິດເຊື້ອຫລາຍກ່ວາໝູ່ ກໍຍັງແມ່ນແຂວງທີ່ເຄີຍລາຍງານມາກ່ອນໜ້ານີ້ເຊັ່ນ: ນະຄອນຫລວງວຽງຈັນ, ຫລວງພະບາງ, ແຂວງວຽງຈັນ.

ປັດຈຸບັນ  ພະຍາດລະດູການເຊັ່ນ ໄຂ້ຫວັດ ກໍຈະມັກພົບ ແລະ ຫລາຍຄົນອາດຈະບໍ່ຄຳນຶງວ່າຕົນເອງອາດຈະຕິດເຊື້ອໂຄວິດ ແລະ ກໍບໍ່ໄດ້ໄປກວດຫາເຊື້ອ, ໂຕເລກທີ່ລາຍງານນີ້ແມ່ນມາຈາກການກວດຊອກຫາເຊື້ອໃນບຸກຄົນທີ່ມີອາການ ຫລື ຜູ້ທີ່ມີປະຫວັດການສຳຜັດໃກ້ຊິດ ແຕ່ພວກເຮົາຮູ້ກັນແລ້ວວ່າຈຳນວນໜຶ່ງອາດຈະຕິດເຊື້ອ ແລະ ບໍ່ມີອາການ ດັ່ງນັ້ນຈຶ່ງບໍ່ໄດ້ໄປກວດຊອກຫາເຊື້ອ ແລະ ເມື່ອມີອາການກໍໄປກວດຕາມຈຸດບໍລິການເກັບຕົວຢ່າງທີ່ທາງການໄດ້ກຳນົດໄວ້ ຫລື ຈຳນວນໜຶ່ງກໍໄປຊື້ເຄື່ອງກວດມາກວດດ້ວຍຕົນເອງ, ດັ່ງນັ້ນ ພວກເຮົາຕ້ອງໄດ້ຍົກສູງສະຕິລະວັງຕົວວ່າຄົນອ້ອມຂ້າງເຮົາອາດຈະຕິດເຊື້ອ ແລະ ໂອກາດຕົນເອງຈະຕິດເຊື້ອຈາກບຸກຄົນດັ່ງກ່າວໄດ້ຖ້າເຮົາຫາກລະເລີງປະຕິບັດມາດຕະການປ້ອງກັນຕົນເອງ.

ໃນມໍ່ໆນີ້ ທ່ານ Dr. Tedros Adhanom Ghebreyesus, ອຳນວຍການໃຫຍ່ອົງການອະນາໄມໂລກ ໄດ້ອອກມາຖະແຫຼງວ່າໃນປັດຈຸບັນຫລາຍປະເທດແມ່ນມີຄວາມເຂົ້າໃຈທີ່ບໍ່ຖືກຕ້ອງວ່າ ການລະບາດໂຄວິດ-19 ໃກ້ຈະສິ້ນສຸດແລ້ວ ແລະ ເຂົ້າໃຈວ່າຜູ້ທີ່ໄດ້ສັກວັກຊິນຄົບແມ່ນສາມາດປ້ອງກັນຈາກການຕິດເຊື້ອພະຍາດໂຄວິດ-19 ໄດ້ແຕ່ຄວາມເປັນຈີງແລ້ວການລະບາດໃນຄັ້ງນີ້ບໍ່ຮູ້ວ່າຈະສີ້ນສຸດລົງເມື່ອໃດ, ຫລາຍປະເທດປະກາດຍອມຮັບທີ່ຈະຢູ່ຮ່ວມນຳພະຍາດໂຄວິດ-19 ແລະ ຜູ້ທີ່ໄດ້ຮັບຊີນແລ້ວ ໃຫ້ສືບຕໍ່ໃຫ້ມີຄວາມລະມັດລະວັງ ເພື່ອບໍ່ໃຫ້ຕົນເອງຕິດເຊື້ອເປັນສຳຄັນ ແລະ ກັນບໍ່ໃຫ້ເຮົາເອົາເຊື້ອໄປແພ່ໃຫ້ຄົນອື່ນທີ່ຢູ່ອ້ອມຂ້າງ ຫລື ຕໍ່ຄົນທີ່ເຮົາຮັກ ແລະ ເຄົາລົບອີກດ້ວຍ ແລະ ຫວັງວ່າພວກເຮົາບໍ່ຢາກເຫັນວັນນັ້ນເກີດຂຶ້ນກັບເຮົາ ຫລື ຄອບຄົວ ແລະ ໝູ່ເພື່ອນເຮົາ.

ປັດຈຸບັນ ມີລາຍງານພົບຜູ້ຕິດເຊື້ອສ່ວນໃຫ່ຍໃນບັນດາປະເທດໃນເອີຣົບ ທີ່ໄດ້ກຳລັງກາຍເປັນຈຸດສູນກາງຂອງການລະບາດຮອບໃໝ່ໃນຄັ້ງນີ້ ແລະ ອົງການອະນາໄມໂລກໄດ້ເຕືອນຕື່ມອີກວ່າ “ມາຮອດປັດຈຸບັນບໍ່ມີປະເທດໃດໆໃນໂລກແມ່ນລອດຈາກການລະບາດຮອບໃໝ່ຄັ້ງນີ້ໄດ້ເທື່ອ ເຖິງວ່າທ່າອ່ຽງຂອງການລະບາດຈະຫລຸດລົງກໍຕາມ” .

ດັ່ງນັ້ນຈຶ່ງຂໍຮຽກຮ້ອງໃຫ້ທຸກຄົນສືບຕໍ່ໃສ່ຜ້າປິດປາກ-ດັງ ແລະ ການຮັກສາໄລຍະຫ່າງ ລວມທັງການລ້າງມືດ້ວຍແຈວທີ່ມີທາດເຫລົ້າຂ້າເຊື້ອອີກດ້ວຍ.