ລັດຖະບານຫລາຍປະເທດ ອອກຄຳເຕືອນພົນລະເມືອງ ຫລີກເວັ້ນພື້ນທີ່ຕອນໂຕ້ຂອງຟີລິບປິນ
ລັດຖະບານຂອງຫລາຍປະເທດເຂດຕາເວັນຕົກອອກຄຳເຕືອນພົນລະເມືອງຫລີກເວັ້ນການເດີນທາງໄປພື້ນທີ່ທາງຕອນໃຕ້ຂອງຟີລິບປິນ ໂດຍລະບຸວ່າ: ໄພຄຸກຄາມຈາກກຸ່ມກໍ່ການຮ້າຍ ແລະ ການລັກພາຕົວເພີ່ມຂຶ້ນ.
ອັງກິດ, ການາດາ ແລະ ອົດສະຕຣາລີ ອອກຄຳເຕືອນຫລ້າສຸດໃນອາທິດນີ້, ພາຍຫລັງປະທານາທິບໍດີ ໂຣດຣິໂກ ດູເຕີເຕ ຂອງຟີລິບປິນ ປະກາດຂະຫຍາຍປະຕິບັດການທາງທະຫານຢູ່ພື້ນທີ່ເກາະມິນດາເນົາທາງຕອນໃຕ້ໄປຈົນຮອດທ້າຍປີນີ້ ເພື່ອປາບປາມກຸ່ມຕິດອາວຸດ. ລັດຖະບານການາດາອອກຖະແຫລງການເຕືອນບໍ່ໃຫ້ພົນລະເມືອງເດີນທາງໄປພື້ນທີ່ຕ່າງໆຢູ່ເກາະມິນດາເນົາ ຍົກເວັ້ນເມືອງດາເວົາ ເມືອງໃຫຍ່ຂອງເກາະດັ່ງກ່າວ. ຂະນະທີ່ລັດຖະບານອັງກິດອອກຄຳເຕືອນວ່າກຸ່ມກໍ່ການຮ້າຍມີທ່າອ່ຽງໂຈມຕີທຸກພື້ນທີ່ໃນຟີລິບປິນ ລວມທັງນະຄອນຫລວງມະນິລາ, ແຕ່ໄພຄຸກຄາມຮ້າຍແຮງທີ່ສຸດຄືບໍລິເວນຕອນໃຕ້ຂອງປະເທດ ແລະ ລັດຖະບານອົດສະຕຣາລີອອກຄຳເຕືອນທຳນອງດຽວກັນກັບອັງກິດ ແລະ ການາດາ. ສະຖານທູດອາເມລິກາປະຈຳນະຄອນຫລວງມະນິລາອອກຖະແຫລງການວ່າ: ມີຂໍ້ມູນທີ່ເຊື່ອຖືໄດ້ວ່າກຸ່ມກໍ່ການຮ້າຍຍັງວາງແຜນຈະກໍ່ເຫດລັກພາຕົວຢູ່ເກາະປາລາວັນ, ເຊບູ ແລະ ໂບຮອສ ໃນປີນີ້ນຳອີກ.
ຄຳເຕືອນຫລ້າສຸດຈາກປະເທດຕ່າງໆ ສະທ້ອນໃຫ້ເຫັນເຖິງຄວາມກັງວົນທີ່ເພີ່ມຂຶ້ນວ່າ: ກຸ່ມລັດອິດສະລາມ ຫລື IS ພວມແຜ່ຂະຫຍາຍອິດທິພົນຫລາຍຂຶ້ນຢູ່ເກາະມິນດາເນົາ.
