UN ເຜີຍເດັກ 80% ຢູ່ເຢເມນຈຳເປັນຕ້ອງ ໄດ້ຮັບການຊ່ວຍເຫລືອຢ່າງຮີບດ່ວນ
ສະຫະປະຊາຊາດລາຍງານໃນວັນທີ 26 ກໍລະກົດນີ້ວ່າ: ສະພາບສົງຄາມ, ພະຍາດຖອກທ້ອງລະບາດ ແລະ ຄວາມອຶດຫິວ ເຮັດໃຫ້ເດັກ 80% ຢູ່ເຢເມນຈຳເປັນຕ້ອງໄດ້ຮັບການຊ່ວຍເຫລືອຢ່າງຮີບດ່ວນ.
ຜູ້ບໍລິຫານສຳນັກງານໃນສັງກັດສະຫະປະຊາຊາດສາມແຫ່ງຮ່ວມຖະແຫລງຂ່າວຈາກການກວດສອບສະຖານະການຢູ່ເຢເມນເປັນເວລາ 2 ວັນວ່າ: ເດັກຊາວເຢເມນເກືອບ 80% ຈຳເປັນຕ້ອງໄດ້ຮັບການຊ່ວຍເຫລືອສຸກເສີນໂດຍໄວ. ຖະແຫລງການລະບຸວ່າ: ເດັກເກືອບສອງລ້ານຄົນຢູ່ເຢເມນປະສົບບັນຫາຂາດເຂີນອາຫານ ລວມທັງສ່ຽງໄດ້ຮັບເຊື້ອພະຍາດຖອກທ້ອງລະບາດ. ຜູ້ອຳນວຍການອົງການອະນາໄມໂລກ, ໂຄງການທຶນເພື່ອເດັກແຫ່ງສະຫະປະຊາຊາດ ແລະ ໂຄງການອາຫານໂລກ ລົງຢ້ຽມຢາມພື້ນທີ່ລັດຖະບານ ແລະ ພື້ນທີ່ຝ່າຍກະບົດຍຶດຄອງຢູ່ເຢເມນ. ສະຫະປະຊາຊາດຖະແຫລງວ່າ: ກຸ່ມປະເທດຜູ້ບໍລິຈາກລະຫວ່າງປະເທດໃຫ້ສັນຍາວ່າຈະຊ່ວຍເຫລືອ 2.100 ລ້ານໂດລາສະຫະລັດ ໃນກອງປະຊຸມຈັດສັນການຊ່ວຍເຫລືອໃນຕົ້ນປີນີ້, ແຕ່ປາກົດວ່າສາມາດຈັດສັນຕົວຈິງໄດ້ພຽງໜຶ່ງໃນສາມເທົ່ານັ້ນ.
