ກອງທັບປົດປ່ອຍປະຊາຊົນຈີນ ຊ່ວຍເຫລືອອຸປະກອນການແພດປ້ອງກັນພະຍາດໂຄວິດ-19 ໃຫ້ກອງທັບປະຊາຊົນລາວ

ໂດຍພື້ນຖານການເສີມຂະຫຍາຍສາຍພົວພັນຄູ່ຮ່ວມຍຸດທະສາດ ໝັ້ນຄົງ ຍາວນານ ບົນຈິດໃຈ 4 ດີລະຫວ່າງ ຈີນລາວ- ລາວຈີນ ສະນັ້ນ ກອງທັບປົດປ່ອຍປະ ເທດຈີນໄດ້ໃຫ້ການສືບຕໍ່ຊ່ວຍເຫຼືອລ້າອຸປະກອນການແພດປ້ອງກັນພະຍາດໂຄວິດ-19 ໃຫ້ກອງທັບປະຊາຊົນລາວຄັ້ງນີ້ມີທັງໝົດ 14 ລາຍການຄື: ເຄື່ອງກວດຫາເຊື້ອພະຍາດໂຄວິດ-19 ຈໍານວນ 403.200 ຊຸດ ຊຸດເກັບກວດເອົາຕົວຢ່າງ 30.000 ຊຸດ ກັບໃສ່ຕົວຢ່າງ 30.000 ກັບ ເຄື່ອງແຍກດີເອັນເອ 5 ຊຸດ ເຄື່ອງກວດ PCR 5 ຊຸດ ນໍ້າຢາກວດຫາເຊື້ອພະຍາດໂຄວິດ-19 ຈໍານວນ 30.000 ຊຸດ ເຄື່ອງຊ່ວຍຫາຍໃຈ 15 ເຄື່ອງ ເຄື່ອງດູດຂີ້ກະເທິ 15 ເຄື່ອງ ເຄື່ອງຕິດຕາມຄົນເຈັບໜັກ 10 ເຄື່ອງ ເຄື່ອງແທກຄື້ນໄຟຟ້າຫົວໃຈ 10 ເຄື່ອງ ເຄື່ອງວັດແທກອົກຊີປາຍມື 20 ເຄື່ອງ ຕູ້ເກັບວັກຊິນຂະໜາດ 650 ລິດ 5 ຕູ້ ຂະໜາດ 390 ລິດ 10 ຕູ້ ແລະ ຕູ້ເກັບວັກຊິນຂະໜາດ 65 ລິດ 30 ຕູ້.

ໄລຍະຜ່ານມາໃນສະພາບການທີ່ເຊື້ອພະຍາດໂຄວິດ-19 ມີການແພ່ລະບາດເປັນວົງກວ້າງໃນທົ່ວສັງຄົມລາວ ພັກ ແລະ ລັດຖະບານກໍຄືປະຊາຊົນຈີນ ໄດ້ໃຫ້ການຊ່ວຍເຫຼືອວັກຊິນຕ້ານພະຍາດໂຄວິດ-19 ໃຫ້ແກ່ ສປປ ລາວ ຈໍານວນ 6.200.000 ໂດສ ພ້ອມນັ້ນກອງທັບປະຊາຊົນຈີນກໍ່ໄດ້ໃຫ້ການຊ່ວຍເຫຼືອວັກຊິນດັ່ງກ່າວໃຫ້ແກ່ກອງທັບປະຊາຊົນລາວ 700.000 ໂດສ ເຊິ່ງເປັນການຊ່ວຍ ເຫຼືອທີ່ລໍ້າຄ່າເຮັດໃຫ້ກອງທັບ ແລະ ປະຊາຊົນລາວບັນດາເຜົ່າສາມາດສ້າງພູມຄຸ້ມກັນ ສະກັດກັ້ນເຊື້ອພະຍາດໂຄວິດ-19 ໄດ້ເປັນຢ່າງດີ ສະແດງໃຫ້ເຫັນເຖິງມູນເຊື້ອແຫ່ງການພົວພັນຮ່ວມມື ຊ່ວຍເຫລືອເຊິ່ງກັນ ແລະ ກັນລະຫວ່າງກອງທັບປົດປ່ອຍປະເທດຈີນ ແລະ ກອງທັບປະຊາຊົນລາວທີ່ໄດ້ມີມາແຕ່ດົນນານ ໂດຍສະເພາະໄລຍະເຮັດການປະຕິວັດຕໍ່ສູ້ປົດປ່ອຍປະເທດຊາດ ກອງທັບປົດປ່ອຍປະຊາຊົນຈີນກໍ່ໄດ້ໃຫ້ການຊ່ວຍເຫລືອດ້ານວັດຖຸອຸປະກອນຕ່າງໆ ປະກອບສ່ວນເຮັດໃຫ້ກອງທັບປະຊາຊົນລາວເຮັດໄດ້ສໍາເລັດໜ້າທີ່ຢ່າງສະຫງ່າງາມ ປີ 1992 ສອງກອງທັບລາວ ແລະ ຈີນ ໄດ້ເປີດການພົວພັນຮ່ວມມື ແລກປ່ຽນບົດຮຽນທາງດ້ານການທະຫານນໍາກັນ ກອງທັບປົດປ່ອຍຈີນໄດ້ສືບຕໍ່ໃຫ້ການຊ່ວຍເຫລືອແກ່ກອງທັບປະຊາຊົນລາວດ້ານວິຊາການວັດຖຸເຕັກນິກ ອາວຸດຍຸດໂທປະກອນອື່ນໆເປັນຈໍານວນຫລວງຫລາຍ.