ລັດຈະສະໜອງທຶນກວ່າ 100 ລ້ານໂດລາ ຊຸກຍູ້ການຜະລິດພາຍໃນ ແລະ ສົ່ງອອກ
ນັບແຕ່ທ້າຍປີ 2021 ເປັນຕົ້ນໄປ ລັດຖະບານຈະສະໜອງທຶນຫລາຍກວ່າ 100 ລ້ານໂດລາສະຫະລັດ ເຂົ້າໃນລະບົບທະນາຄານ ແລະ ກອງທຶນພັດທະນາບາງແຫ່ງ ທີ່ນອນໃນແຜນການຂອງລັດຖະບານກໍານົດໄວ້ ເພື່ອຊຸກຍູ້ການຜະລິດພາຍໃນ ແລະ ສົ່ງເສີມການສົ່ງອອກໃຫ້ຫລາຍຂຶ້ນ, ພ້ອມທັງຕິດຕາມຢ່າງໃກ້ຊິດ ຕໍ່ທ່າອ່ຽງການເໜັງຕິງຂອງລະບົບການເງິນທັງຢູ່ພາຍໃນ ແລະ ຕ່າງປະເທດທີ່ໄດ້ຮັບຜົນກະທົບຈາກການແພ່ລບາດຂອງພະຍາດໂຄວິດ-19 ເພື່ອກໍານົດນະໂຍບາຍດ້ານການເງິນ-ເງິນຕາ ແລະ ຊອກຫາມາດຕະການຮັບມືແກ້ໄຂທີ່ເໝາະສົມ.
ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ກ່າວໃນກອງປະຊຸມສະ ໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ອັດລົງໃນກາງເດືອນພະຈິກ ນີ້ວ່າ: ໃນໄລຍະທ້າຍປີ 2021, ປະເທດເຮົາຈະຍັງສືບຕໍ່ປະເຊີນກັບສິ່ງທ້າທາຍຫລາຍດ້ານຈາກປັດໄຈ ເປັນຕົ້ນແມ່ນການແຂງຄ່າຂອງເງິນຕາຕ່າງປະເທດສະກຸນຫລັກ ຕາມທ່າອ່ຽງການຟື້ນຕົວເສດຖະກິດທີ່ດີຂຶ້ນ, ການເພີ່ມຂຶ້ນຂອງລາຄານໍ້າມັນດິບ, ອັດຕາເງິນເຟີ້, ອັດຕາດອກເບ້ຍຢູ່ສາກົນ. ໃນຂະນະທີ່ເສດຖະກິດພາຍໃນປະເທດເຮົາ ມີຫລາຍແຮງກົດດັນ ແລະ ຍັງຕ້ອງການເວລາໃນການຟື້ນຕົວ.
ແນວໃດກໍຕາມ ເພື່ອຮັບປະກັນໃຫ້ບັນລຸຕາມແຜນການໃນທ້າຍປີ 2021, ພາຍໃຕ້ການຊີ້ນໍາຂອງລັດຖະບານ, ຂະແໜງທະນາຄານ ຈະສືບຕໍ່ຈັດຕັັ້ງປະຕິບັດນະໂຍບາຍເງິນຕາ ຕາມທິດຊຸກຍູ້ການຂະຫຍາຍຕົວຂອງເສດຖະກິດ ດ້ວຍການສືບຕໍ່ຊຸກຍູ້ການສະໜອງແຫລ່ງທຶນ ເພື່ອຊຸກຍູ້ການຜະລິດ ແລະ ສົ່ງເສີມການສົ່ງອອກ ຕາມແຜນການກໍານົດໄວ້, ສະໜອງແຫລ່ງທຶນໃຫ້ແກ່ທະນາຄານນະໂຍບາຍ, ປະກອບແຫລ່ງທຶນໃຫ້ແກ່ກອງທຶນພັດທະນາໄຊສົມບູນ ຜ່ານກະຊວງການເງິນ. ສ່ວນກົນໄກການຈັດຕັ້ງປະຕິບັດນີ້, ແມ່ນຈະເພີ່ມທະວີການປະສານສົມທົບລະຫວ່າງພາກລັດ ແລະ ເອກະຊົນ ເພື່ອເກັບກໍາຂໍ້ມູນ ແລະ ສະພາບຜູ້ຜະລິດຕົວຈິງ, ສະພາບທ່າແຮງຕົວຈິງ ແລະ ຄວາມຕ້ອງການແຫລ່ງທຶນຕົວຈິງ. ໂດຍສະເພາະໂຄງ ການສິນເຊື່ອເພື່ອການຜະລິດ-ສົ່ງອອກກະແສໄຟຟ້າ, ໂຄງການສິນເຊື່ອເພື່ອການຜະລິດສິນຄ້າສົ່ງອອກ, ໂຄງການສິນເຊື່ອເພື່ອການຜະລິດສິນຄ້າທົດແທນການນໍາເຂົ້າ, ໂຄງການສິນເຊື່ອດອກເບ້ຍຕໍ່າ ແລະ ວົງເງິນບໍ່ສູງຫລາຍສໍາລັບບຸກຄົນ ແລະ ນິຕິບຸກຄົນ ທີ່ເຮັດການຜະລິດຕົວຈິງລະດັບນ້ອຍ ແລະ ສະໜອງແຫລ່ງທຶນ ໃຫ້ແກ່ກອງທືນສົ່ງເສີມທຸລະກິດຂະໜາດກາງ ແລະ ນ້ອຍ (SMEs) ອື່ນໆ, ເຊິ່ງຈະນໍາໃຊ້ແຫລ່ງທຶນ ຈາກທະນາຄານພັດທະນາແຫ່ງຊາດຈີນ (CDB) ຄາດວ່າຈະສາມາດເບີກຖອນ ເງິນງວດທໍາອິດຈໍານວນ 100 ລ້ານໂດລາສະຫະລັດ ພາຍໃນເດືອນມີນາ 2022, ແຫລ່ງຈາກທະນາຄານໂລກ, ຈາກກອງທຶນສົ່ງເສີມການເຂົ້າເຖິງແຫລ່ງທຶນຂອງ ສປປ ລາວ (LAFF), ແຫລ່ງທຶນເງິນຝາກຂອງທະນາຄານທຸລະກິດ ທີ່ຄາດວ່າຈະມີທ່າອ່ຽງເພີ່ມຂຶ້ນ, ພາຍຫລັງການເປີດນໍາໃຊ້ໂຄງ ການທາງລົດໄຟລາວ-ຈີນ, ສະພາບການແຜ່ລະບາດຂອງພະຍາດໂຄວິດ-19 ຢູ່ໃນລະດັບທີ່ຄວບຄຸມໄດ້ດີຂຶ້ນ ລວມເຖິງການປັບປຸງກົນໄກການຄຸ້ມຄອງລາຍຮັບທີ່ເປັນເງິນຕາຕ່າງປະເທດ ທີ່ຮັດກຸມຫລາຍຂຶ້ນ.
ໄປຄຽງຄູ່ກັນນີ້, ກໍສືບຕໍ່ກໍານົດອັດຕາແລກປ່ຽນຕາມກົນໄກໃໝ່ທີ່ໄດ້ປັບປຸງ ໄປຄຽງຄູ່ກັບການປັບ ປຸງລະບົບການຕິດຕາມສະພາບອັດຕາແລກປ່ຽນ ແລະ ການຊື້-ຂາຍເງິນຕາຕ່າງປະເທດ ຂອງທົ່ວລະບົບໃຫ້ມີຄວາມຊັດເຈນ ແລະ ຄົບຖ້ວນຫລາຍຂຶ້ນ, ເພືື່ອເຮັດໃຫ້ສ່ວນຕ່າງລະຫວ່າງອັດຕາແລກ ປ່ຽນເງິນກີບທຽບເງິນໂດລາ ຂອງອັດຕາທາງການ ແລະ ຂອງອັດຕາຕະຫລາດນອກລະບົບແຄບເຂົ້າກວ່າລະດັບປັດຈຸບັນ (ວັນທີ 31 ຕຸລາ 2021 ຢູ່ໃນລະດັບ 13,36% ສໍາລັບອັດຕາແລກປ່ຽນເງິນກີບທຽບເງິນໂດລາສະຫະລັດ ແລະ ຕໍ່າກວ່າ 1% ສໍາລັບອັດຕາແລກປ່ຽນເງິນກີບທຽບເງິນບາດ).
ນອກນີ້, ຈະດໍາເນີນມາດຕະການຕໍ່ບຸກຄົນ, ນິຕິບຸກຄົນ ທີ່ເຄືື່ອນໄຫວແລກປ່ຽນເງິນຕາ ແລະ ເຄື່ອນໄຫວທຸລະກິດດ້ານການເງິນຮູບແບບອື່ນໆ ທີ່ບໍ່ຖືກລະບຽບກົດໝາຍ, ເອົາໃຈໃສ່ຕິດຕາມກວດກາກົນໄກການຄຸ້ມຄອງລະຫວ່າງທະນາຄານທຸລະກິດ ແລະ ຮ້ານແລກປ່ຽນເງິນຕາ ທີ່ເປັນຕົວແທນໃຫ້ໄປຕາມລະບຽບການວາງອອກ, ປັບປຸງນິຕິກໍາ ກ່ຽວກັບການຄຸ້ມຄອງເງິນຕາຕ່າງປະເທດ ເພື່ອສະໜັບສະໜູນການປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ເປັນຕົ້ນ: ຄຸ້ມຄອງການເຄື່ອນໄຫວແລກປ່ຽນເງິນຕາ, ການເປີດບັນຊີ ແລະ ການນໍາໃຊ້ບັນຊີເງິນຕາຕ່າງປະເທດ, ການຄຸ້ມຄອງລາຍຮັບເປັນເງິນຕາຕ່າງປະເທດ, ໂດຍສະເພາະການຄຸ້ມຄອງລາຍຮັບຈາກການສົ່ງອອກສິນຄ້າ ໃນໂຄງການທົດລອງຂຸດຄົ້ນ ແລະ ສົ່ງອອກແຮ່ທາດ ຜ່ານບັນຊີຄຸ້ມຄອງສະ ເພາະ ເພື່ອໃຫ້ເງິນຕາຕ່າງປະເທດລວມສູນ ຢູ່ລະບົບທະນາຄານຫລາຍຂຶ້ນ.
ທ່ານຜູ້ວ່າການທະນາຄານແຫ່ງ ສປປ ລາວ ກ່າວຕື່ມວ່າ: ນອກຈາກວຽກງານທີ່ກ່າວມານັ້ນ ແລ້ວ, ຍັງກະກຽມຄວາມພ້ອມດ້ານນິຕິກໍາ ແລະ ພື້ນຖານໂຄງລ່າງດ້ານການຊໍາລະ ເພື່ອຮອງຮັບການສະໜອງການບໍລິການດ້ານການເງິນ ຢູ່ຂົງເຂດສະຖານນີລົດໄຟລາວ-ຈີນ ແລະ ຫົວໜ່ວຍບໍລິການ ອື່ນໆ ທີ່ຕິດພັນກັບໂຄງການທາງລົດໄຟດັ່ງກ່າວອີກດ້ວຍ. ສ່ວນໃນປີ 2022 ລັດຖະບານ ໄດ້ກໍານົດຄາດໝາຍດ້ານເງິນຕາ ຄື: ການຂະຫຍາຍຕົວຂອງປະລິມານເງິນ M2 ໃຫ້ຂະຫຍາຍຕົວໃນລະດັບບໍ່ເກີນ 22% ທຽບໃສ່ປີຜ່ານມາ, ຊຶ່ງຖືວ່າສູງກວ່າຄາດໝາຍທີ່ໄດ້ກໍານົດໃນ ປີ 2021 ແລະ 2-3 ປີຜ່ານມາ ທີ່ເຄີຍໃຫ້ຂະຫຍາຍຕົວຢູ່ໃນລະດັບບໍ່ເກີນ 20% ທຽບໃສ່ປີຜ່ານມາ. ຂະນະທີ່ໄດ້ກໍານົດຄາດໝາຍອັດຕາເງິນເຟີ້ ໃຫ້ຢູ່ໃນລະດັບບໍ່ເກີນ 5-7%, ຊຶ່ງການກໍານົດທັງສອງຄາດໝາຍແມ່ນສອດ ຄ່ອງກັບແນວທາງນະໂຍບາຍຂອງລັດຖະບານ ທີ່ຕ້ອງການສົ່ງເສີມການຂະຫຍາຍຕົວຂອງເສດຖະກິດ ແລະ ຮັກສາສະຖຽນລະພາບດ້ານລາຄາ ແລະ ດ້ານເງິນຕາໃຫ້ໄປຄວບຄູ່ກັນ.
ນອກນີ້, ເພື່ອຮັບປະ ກັນບໍ່ໃຫ້ສ້າງແຮງກົດດັນຕໍ່ລະດັບລາຄາ, ອັດຕາເງິນເຟີ້ ທະນາຄານແຫ່ງ ສປປ ລາວ ຈະພະຍາຍາມຄຸ້ມຄອງການນໍາໃຊ້ສິນເຊື່ອໃຫ້ມີປະສິດທິຜົນເຂົ້າສູ່ຂະແໜງການຜະລິດ, ບໍ່ເພີ່ມແຮງກົດດັນໃຫ້ຄວາມຕ້ອງການບໍລິໂພກສູງຂຶ້ນແບບບໍ່ສົມດຸນ ເພື່ອຮັບປະກັນໄດ້ທັງສະເຖຍລະພາບທາງດ້ານລາຄາ ແລະ ຊຸກຍູ້ການຂະຫຍາຍຕົວຂອງເສດຖະກິດ ໃຫ້ໄປຕາມຈັງຫວະວາງໄວ້.
