ຄົ້ນພົບແລ້ວ ຫຼັກຖານຂອງການມີນໍ້າຈໍານວນຫຼາຍເທິງດວງຈັນ
ຂ່າວໃຫມ່ທີ່ສຸດຂອງວົງການດາລາສາດໃນໄລຍະນີ້ ຄົງຈະບໍ່ມີຂ່າວໃດດັງໄປກວ່າການທີ່ນັກວິທະຍາສາດຫາກໍຈະຮູ້ຂ່າວວ່າ ຄວາມຈິງແລ້ວ ດວງຈັນ ອາດຈະມີນໍ້າຢູ່ຫຼາຍກວ່າທີ່ເຮົາເຄີຍເຂົ້າໃຈ ແລະ ເນື່ອງຈາກນໍ້າ ເປັນປັດໄຈສໍາຄັນໃນການດໍາລົງຢູ່ຂອງສິ່ງມີຊີວິດ ການຄົ້ນພົບນໍ້າເທິງດາວດວງໃດ ຈຶ່ງເປັນເລື່ອງທີ່ໜ້າຕື່ນເຕັ້ນສະເໝີ ອາດໝາຍຄວາມເຖິງດາວດວງນັ້ນເຄີຍມີສິ່ງທີ່ມີຊີວິດອາໄສຢູ່ ຫຼື ເຮົາສາມາດໄປອາໄສຢູ່ບ່ອນນັ້ນໄດ້.
ຢ້ອນກັບໄປໃນປີ 2008 ນັກວິທະຍາສາດຮູ້ວ່າມີນໍ້າຢູ່ດວງຈັນ ແຕ່ດ້ວຍຄວາມທີ່ດວງຈັນ ບໍ່ມີຊັ້ນບັນຍາກາດ ແລະ ຍັງບໍ່ມີສະໜາມແມ່ເຫຼັກປົກຄຸມ ເຮັດໃຫ້ຖ້າມີນໍ້າເທິງພື້ນຜິວຂອງດວງຈັນ ມັນຈະລະເຫີຍກາຍເປັນອາຍໄປທັງໝົດ ເມື່ອຖືກແຜດເຜົາດ້ວຍແສງຕາເວັນ. ແຕ່ແນວໃດກໍດີ ການທີ່ບໍ່ມີນໍ້າປາກົດຢູ່ເທິງພື້ນຜິວຂອງດວງຈັນ ກໍບໍ່ໄດ້ໝາຍຄວາມວ່າ ໃຕ້ຊັ້ນຫີນຂອງດວງຈັນຈະບໍ່ມີນໍ້າ ແລະ ຈາກຜົນການວິໄຈຫລ້າສຸດ ທີ່ນັກວິທະຍາສາດເຮັດກັບກ້ອນຫີນຈາກດວງຈັນ ທີ່ມີການນໍາກັບມາໂລກຈາກພາລະກິດ Apollo 15 ແລະ Apollo 17 ພວກເຂົາໄດ້ພົບນໍ້າໃນປະລິມານເລັກນ້ອຍຢູ່ໃນຫີນ ເຮັດໃຫ້ມີການຄາດຄະແນວ່າ ໃຕ້ຊັ້ນຫີນຂອງດວງຈັນອາດຈະມີນໍ້າຢູ່ໃນປະລິມານຫຼາຍ.
ນັກວິທະຍາສາດສໍາຫລວດດວງດາວ ແລະ ວັດຖຸຕ່າງໆ ໃນອະວະກາດດ້ວຍການກວດຈັບແສງ ໂດຍເຄື່ອງມືທີ່ເອີ້ນວ່າ Orbital spectrometers ສາມາດວັດແທກແສງທີ່ສະທ້ອນມາຈາກດາວເຄາະ ຫຼື ດວງຈັນ ແລະ ວິເຄາະຄ່າຄວາມຍາວຂອງຄື້ນແສງ (Wavelengths) ລວມເຖິງການກວດສອບຄຸນສົມບັດການດູດຊຶມ ຫຼື ການສະທ້ອນແສງຂອງຜິວດາວ ເຮັດໃຫ້ນັກວິທະຍາສາດພໍຈະຄາດເດົາໄດ້ວ່າ ເທິງພື້ນຜິວຂອງດວງດາວເປັນທາດ ຫຼື ສານປະກອບຮູບແບບໃດ ແຕ່ບັນຫາກໍຄື Spectrometers ຂ້ອນຂ້າງອ່ອນໄຫວກັບຄວາມຮ້ອນ ແລະ ພື້ນຜິວດວງຈັນໃນໄລຍະທີ່ແສງຕາເວັນສ່ອງ ນັ້ນກໍມີຄວາມຮ້ອນສູງຫຼາຍ ເຮັດໃຫ້ມັນບໍ່ສາມາດກວດຫານໍ້າເທິງດວງຈັນໄດ້ຢ່າງມີປະສິດທິພາບ.
ໂດຍທີມນັກວິໄຈ ໄດ້ເປີດເຜີຍລາຍລະອຽດກ່ຽວກັບການພົບນໍ້າໃນຫີນຂອງດວງຈັນ ຜ່ານວາລະສານ Nature Geoscience ພວກເຂົາເຮັດການສໍາຫລວດຕົວຢ່າງຫີນຂອງດວງຈັນທີ່ໄດ້ຈາກໂຄງການ Apollo ເຊິ່ງຂໍ້ມູນທີ່ນໍາມາເຜີຍແຜ່ ໄດ້ໃຫ້ລາຍລະອຽດກ່ຽວກັບລະດັບອຸນຫະພູມ ແລະ ແຜນທີ່ເທິງດວງຈັນຂອງຈຸດທີ່ເກັບຕົວຢ່າງຫີນ ເຊິ່ງສິ່ງເຫຼົ່ານີ້ເປັນຂໍ້ມູນສໍາຄັນ ທີ່ຊ່ວຍແກ້ໄຂບັນຫາເລື່ອງການກວດຈັບຄວາມຮ້ອນຈາກ Orbital spectrometers ແລະ ເຮັດໃຫ້ການອ່ານຂໍ້ມູນຈາກດາວທຽມຂອງອິນເດຍທີ່ມີຊື່ວ່າ Chandrayaan-1 ທີ່ໂຄຈອນຢູ່ຮອບດວງຈັນ ມີຄວາມແໝ້ນຢໍາຫຼາຍຂຶ້ນ.
ແຜນຜັງການເດີນທາງ ແລະ ການໂຄຈອນສໍາຫລວດດວງຈັນຂອງດາວທຽມອິນເດຍທີ່ມີຊື່ວ່າ Chandrayaan-1
ເຊິ່ງຜົນຜະລິດທີ່ໄດ້ຈາກການປັບປຸງຂໍ້ມູນການປັບປຸງຂໍ້ມູນການສໍາຫລວດໃຫມ່ ນັ້ນໜ້າຕື່ນເຕັ້ນສຸດໆ ທີມນັກວິທະຍາສາດພົບຮ່ອງຮອຍຂອງນໍ້າປາກົດໃນຫຼາຍໆຈຸດ ເຊິ່ງອາດຈະເກີດຈາກການລະເບີດຂອງພູເຂົາໄຟ ໂດຍທ່ານ Ralph Milliken ເຊິ່ງເປັນຫົວໜ້າທີມວິໄຈ ກ່າວວ່າ ການກະຈາຍຕົວຂອງແຫຼ່ງນໍ້າໃຕ້ພື້ນຜິວດວງຈັນ ຄືເປັນເລື່ອງທີ່ມີຄວາມສໍາຄັນຫຼາຍ ແລະ ຄາດວ່າບໍລິເວນທີ່ຄົ້ນພົບນໍ້າໃນຊັ້ນຫີນນີ້ ຄືແຫຼ່ງພູເຂົາໄຟໃນອະດີດ ແລະ ເມື່ອເບິ່ງຕາມແຜນພາບດ້ານລຸ່ມນີ້ ໂຊນທີ່ເປັນສີເຫຼືອງ ແລະ ສີແດງ ຄືຈຸດທີ່ມີນໍ້າໃນປະລິມານຫຼາຍ.
