9ເດືອນຜ່ານມາ ການສົ່ງອອກຢາງພາລາ ສ້າງມູນຄ່າ 7 ຕື້ 600 ລ້ານກີບ

ອີງຕາມການລາຍງານຈາກ ທ່ານ ສີເມືອງ ອິນທະວົງ ຫົວໜ້າຫ້ອງການອຸດສາຫະກຳ ແລະ ການຄ້າເມືອງຊຽງຮ່ອນ ແຂວງໄຊຍະບູລີ ໃຫ້ຮູ້ວ່າ: ການສົ່ງອອກຢາງພາລາຢູ່ເມືອງຊຽງຮ່ອນ ຈາກໜ່ວຍງານຜ່ານປະຕູດຽວ ຂອງເມືອງ ໃນໄລຍະ 9 ເດືອນ 2021 ຜ່ານມາ ສາມາດສົ່ງອອກຢາງພາລາໄດ້ຈໍານວນ 1.170 ໂຕນ ສາມາດສ້າງມູນຄ່າໄດ້ທັງໝົດ 7 ຕື້ 600 ລ້ານກວ່າກີບ, ປີ 2020 ຜ່ານມາ ສາມາດສົ່ງອອກຢາງພາລາໄດ້ 770 ໂຕນ ສ້າງມູນຄ່າໄດ້ 1 ຕື້ 910 ລ້ານກີບ ທຽບໃສ່ປີຜ່ານມາເພີ່ມຂຶ້ນ 400 ໂຕນ ແລະ ໄດ້ກຳນົດແຜນ 3 ເດືອນທ້າຍປິຕໍ່ໜ້າ ຄາດວ່າການສົ່ງອອກຢາງພາລາ ຈະບັນລຸໄດ້ອີກ 390 ໂຕນ ມູນຄ່າ 253 ລ້ານກີບ.

ເມືອງ ຊຽງຮ່ອນ ມີເນື້ອທີ່ປູກຢາງພາລາທັງໝົດ 5.036 ເຮັກຕາ ໃນນັ້ນເນື້ອທີ່ໆໄດ້ປາດແລ້ວ 3.830 ເຮັກຕາ ໂດຍມີການລົງທຶນປູກຂອງ ບໍລິສັດ 3.714 ເຮັກຕາ ແລະ ປະຊາຊົນປູກເອງ ຈໍານວນ ເນື້ອທີ່ 1.320 ເຮັກຕາ.

ໃນປີ 2021 ນີ້ ຫ້ອງການ ກະສິກຳ ແລະ ປ່າໄມ້ ຍັງໄດ້ຊຸກຍູ້ສົ່ງເສີມໃຫ້ຊາວກະສິກອນຂຶ້ນແຜນປູກຕື່ມຈຳນວນ 200 ກວ່າເຮັກຕາ ທັງໝົດນີ້ກໍເພື່ອປະຕິບັດຕາມຕາມແຜນພັດທະນາເສດຖະກິດ-ສັງຄົມ ຂອງເມືອງ ຕິດພັນກັບການຊຸກຍູ້ສົ່ງເສີມຊາວກະສິກອນຢູ່ພາຍໃນເມືອງປູກພືດເປັນສິນຄ້າ ສ້າງລາຍຮັບເຂົ້າຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ ແລະ ເຮັດໃຫ້ເມືອງຫລຸດພົ້ນອອກຈາກເມືອງທຸກຍາກໃນໄວໆນີ້.