ຄວາມເຄັ່ງຄຽດ ເຮັດໃຫ້ຜົມຫລົ່ນ ແມ່ນແທ້ບໍ່ ?

ການປ່ຽນແປງຂອງເສັ້ນຜົມ ບໍ່ວ່າຈະເປັນຄວາມໜາ, ຄວາມບາງ ຫລື ການຂາດຫລົ່ນ ມັກຈະປ່ຽນແປງໄປຕາມ ຊ່ວງອາຍຸ ເຊິ່ງປັດໄຈໃນການປ່ຽນແປງ ນອກຈາກອາຍຸແລ້ວກໍຍັງມີປັດໄຈອື່ນໆອີກຫລາຍຢ່າງ ເຊັ່ນ : ຄວາມເຄັ່ງຄຽດ, ຄວາມວິຕົກກັງວົນ, ສານເຄມີ ເປັນຕົ້ນ.

• ຜົມຫລົ່ນເກີດຈາກຫຍັງໄດ້ແດ່ ? ອາການຜົມຫລົ່ນຖືເປັນເລື່ອງປົກກະຕິທີ່ສາມາດເກີດຂຶ້ນໄດ້ກັບທຸກຄົນ ໂດຍປົກກະຕິ ແລ້ວ ໃນ 1 ມື້ ຄົນເຮົາຈະມີຜົມຫລົ່ນໂດຍສະເລ່ຍ 100 ເສັ້ນຕໍ່ມື້, ແຕ່ຈຳນວນເສັ້ນຜົມທີ່ຈະຫລາຍ ຫລື ໜ້ອຍ ຂຶ້ນຢູ່ກັບປັດໄຈຕ່າງໆດັ່ງນີ້ :

1. ອາຍຸ : ໂດຍຫລັງຈາກທ່ານມີອາຍຸຕັ້ງແຕ່ 30 ປີຂຶ້ນໄປ ກໍມັກຈະພົບບັນຫາຜົມຫລົ່ນທັງໃນແມ່ຍິງ ແລະ ຜູ້ຊາຍ, ແຕ່ສ່ວນຫລາຍມັກຈະເກີດອາການຜົມຫລົ່ນໃນຜູ້ຊາຍຫລາຍກ່ວາ.
2. ອາຍຸຂອງເສັ້ນຜົມ : ໂດຍສະເລ່ຍແລ້ວຜົມຂອງຄົນເຮົານັ້ນຈະມີອາຍຸປະມານ 4 ປີ 6 ເດືອນ ເມື່ອເສັ້ນຜົມມີອາຍຸ ຄົບກຳນົດກໍຈະເກີດການຫລຸດຫລົ່ນຕາມທຳມະຊາດ ແລະ ຂຶ້ນມາໃໝ່ພາຍໃນ 6 ເດືອນ.
3. ການຈັດແຕ່ງຊົງຜົມ : ການຈັດແຕ່ງຊົງຜົມບໍ່ໄດ້ໝາຍເຖິງການຈັດຊົງພຽງຢ່າງດຽວ, ແຕ່ຍັງລວມເຖິງການໃຊ້ ຢາສະຜົມ, ການຫວີຜົມ ແລະ ການໃຊ້ນ້ຳມັນບຳລຸງຜົມຕ່າງໆ ເຊິ່ງກິດຈະກຳເຫລົ່ານີ້ລ້ວນເຮັດໃຫ້ເກີດອາການ ຜົມຫລົ່ນໄດ້.
4. ຜົມຫລົ່ນຈາກກຳມະພັນ : ຜົມຫລົ່ນທີ່ເກີດຈາກກຳມະພັນ ຫາກທ່ານມີກຳມະພັນຫົວລ້ານ ບໍ່ໄດ້ໝາຍຄວາມວ່າຈະ ເຮັດໃຫ້ຜົມຂອງທ່ານຫລຸດຫລົ່ນຫລາຍກ່ວາຄົນອື່ນໆ ພຽງແຕ່ອັດຕາໃນການປົ່ງຂອງເສັ້ນຜົມຂອງທ່ານຈະໜ້ອຍ ແລະ ຊ້າກ່ວາປົກກະຕິ ເຮັດໃຫ້ເກີດຜົມບາງ ຫລື ຫົວລ້ານໄດ້ ເຊິ່ງຜົມຫລົ່ນທີ່ເກີດຈາກກຳມະພັນນັ້ນໃນແຕ່ລະບຸກ ຄົນມີຜົມຫລົ່ນບໍ່ເທົ່າກັນ ຂຶ້ນຢູ່ກັບອາຍຸ, ເພດ ແລະ ຮໍໂມນ.
5. ຄວາມເຄັ່ງຄຽດເຮັດໃຫ້ຜົມຫລົ່ນໄດ້ແນວໃດ ? ຄວາມຄຽດນັ້ນເຮັດໃຫ້ຜົມຫລົ່ນໄດ້ ໂດຍສາມາດແບ່ງປະເພດ ຂອງອາການຜົມຫລົ່ນທີ່ເກີດຈາກການມີລະດັບຄວາມເຄັ່ງຄຽດໄດ້ ດັ່ງນີ້ :

• Telogen effluvium ເປັນອາການຜົມຫລົ່ນທີ່ເກີດຈາກການກະຕຸ້ນຈາກຄວາມເຄັ່ງຄຽດ ເມື່ອເກີດຄວາມເຄັ່ງຄຽດ ຫລາຍໆຈະເຮັດໃຫ້ຮາກຜົມເຂົ້າສູ່ໄລຍະພັກກຜ່ອນ ເມື່ອສະຜົມ ຫລື ຫວີຜົມກໍຈະເຮັດໃຫ້ຜົມຫລຸດຫລົ່ນໄດ້ງ່າຍຂຶ້ນ.
• Trichotillomania ເປັນອາການຜົມຫລົ່ນທີ່ເກີດຈາກການຕອບສະໜອງຕໍ່ອາລົມດ້ານລົບ ຫລື ຄວາມເຄັ່ງຄຽດກະຕຸ້ນໃຫ້ທ່ານຮູ້ສຶກຢາດຶງຜົມ ເພາະການດຶງຜົມເປັນການຕອບສະໜອງຂອງຮ່າງກາຍຕໍ່ຄວາມບໍ່ສະບາຍໃຈ ຫລື ຄວາມຮູ້ສຶກດ້ານລົບຢ່າງໜຶ່ງ ເຊັ່ນ : ເຄັ່ງຄຽດ, ເບື່ອ, ຫງຸດຫງິດ ຫລື ຮູ້ສຶກເຫງົາ.
• Alopecia areata ເປັນອາການຜົມຫລົ່ນທີ່ເກີດຈາກຄວາມເຄັ່ງຄຽດຮຸນແຮງ ເຮັດໃຫ້ລະບົບພູມຕ້ານທານຂອງຮ່າງກາຍເຂົ້າໂຈມຕີຮູຂຸມຂົນ ເຮັດໃຫ້ຜົມຫລົ່ນ.
• ຈະເຫັນໄດ້ວ່າຄວາມເຄັ່ງຄຽດກໍເປັນໂຕການໜຶ່ງທີ່ເຮັດໃຫ້ເກີດອາການຜົມຫລົ່ນໄດ້, ແຕ່ບໍ່ແມ່ນອາການທີ່ເກີດຂຶ້ນຢ່າງ ຖາວອນ ແຕ່ທ່ານສາມາດຈັດການຄວາມເຄັ່ງຄຽດ ຫລື ຄວບຄຸມຄວາມເຄັ່ງຄຽດທີ່ເກີດຂຶ້ນໄດ້ ເສັ້ນຜົມຂອງທ່ານກໍຈະ ກັບມາປົ່ງ ແລະ ແຂງແຮງໄດ້, ແຕ່ຫາກທ່ານສັງເກດເຫັນອາການຜົມຫລົ່ນຂອງຕົນເອງນັ້ນ ຫລົ່ນເປັນຈຸດໆ ເປັນຊໍ່ໆ ຫລື ມີອາການຫລົ່ນຫລາຍກ່ວາປົກກະຕິເມື່ອຫວີຜົມ ຫລື ສະຜົມ ຄວນປຶກສາແພດເຖິງອາການທີ່ເກີດຂຶ້ນ ເພາະການ ຫລົ່ນຂອງເສັ້ນຜົມທີ່ຜິດປົກກະຕິເປັນສັນຍານເຕືອນເຖິງບັນຫາບາງຢ່າງໄດ້.