ຍອດຂາຍລົດຍົນໄຟຟ້າຢູ່ຈີນເພີ່ມຂຶ້ນ 123% ຂຶ້ນເປັນອັນດັບໜຶ່ງຂອງໂລກ ຍອດຂາຍ 782.000 ຄັນ
ພີດັບບລິວຊີ ແລະ ສະແທຣດທີຈີແອນ ເຜີຍຜົນສຶກສາລະບຸ ໄຕມາດທີ 3 ປີ 2021 ຍອດຂາຍລົດຍົນໄຟຟ້າຊະນິດໃຊ້ແບັດເຕີຣີ (BEV) ໃນຕະຫລາດຫລັກ 14 ແຫ່ງຂອງໂລກ ເພີ່ມຂຶ້ນ 123% ເມື່ອທຽບໃສ່ປີຕໍ່ປີ ໂດຍຈີນນຳເປັນອັນດັບໜຶ່ງ ດ້ວຍຍອດຂາຍ 782.000 ຄັນ ເພີ່ມຂຶ້ນ 190% ເຮັດໃຫ້ລົດຍົນປະເພດນີ້ມີສ່ວນແບ່ງຕະຫລາດຈີນເພີ່ມຕໍ່ເນື່ອງ.
ສຳນັກຂ່າວຊິນຮົວລາຍງານວ່າ: ການເຕີບໃຫຍ່ຂອງຍອດຂາຍລົດຍົນໄຟຟ້າຊະນິດໃຊ້ແບັດເຕີຣີໃນເອີຣົບ ຂະຫຍາຍຕົວຊ້າລົງເມື່ອທຽບໃສ່ໄຕມາດກ່ອນໆ ໂດຍໃນໄຕມາດດັ່ງກ່າວ ຕະຫລາດໃຫຍ່ທີ່ສຸດ 5 ແຫ່ງຂອງເອີຣົບ ໄດ້ແກ່ ເຢຍລະມັນ, ອັງກິດ, ອິຕາລີ, ຝຣັ່ງ ແລະ ສະເປນ ມີຍອດຂາຍຈົດທະບຽນລົດຍົນປະເພດນີ້ 53% ເມື່ອທຽບໃສ່ປີຕໍ່ປີ.
ລົດຍົນໄຟຟ້າທຸກປະເພດໃນເອີຣົບ ເຊິ່ງລວມທັງລົດຍົນໄຮບຣິດແບບປັກອິນ (PHEV) ແລະ ລົດຍົນໄຮບຣິດ ມີສ່ວນແບ່ງຕະຫລາດເພີ່ມຂຶ້ນຢ່າງວ່ອງໄວ ແລະ ໃກ້ເຖິງລະດັບດຽວກັບຂອງລົດຍົນເຄື່ອງຈັກສັນດາບ ໂດຍຜົນການສຶກສາຊີ້ວ່າລົດຍົນໄຟຟ້າຄອງສ່ວນແບ່ງຕະຫລາດໃນຕະຫລາດໃຫຍ່ທີ່ສຸດ 5 ແຫ່ງຂອງເອີຣົບເພີ່ມຂຶ້ນຈາກ 8% ໃນປີ 2019 ມາເປັນ 38% ໃນປັດຈຸບັນ.
ຂະນະທີ່ຍອດຂາຍລົດຍົນໄຟຟ້າໃນອາເມລິກາ ພັດເຕີບໃຫຍ່ຊ້າກວ່າພາກພື້ນອື່ນໆ ໂດຍພົບວ່າ 91,6% ຂອງຜູ້ຊື້ຍັງເລືອກລົດຍົນເຄື່ອງຈັກສັນດາບ. ຂະນະທີ່ລົດຍົນລະບົບຟູລໄຮບຣິດມີຍອດຂາຍເປັນອັນດັບໜຶ່ງໃນລົດຍົນໄຟຟ້າ ໂດຍມີສ່ວນແບ່ງຕະຫລາດ 5,1%.
ສ່ວນຢູ່ເຢຍລະມັນ ລົດຍົນໄຮບຣິດຍັງຄອງອິດທິພົນໃນຕະຫລາດ ດ້ວຍສ່ວນແບ່ງຕະຫລາດ 16,6%. ຂະນະທີ່ລັດຖະບານຂອງເຢຍລະມັນ ພະຍາຍາມຫລຸດປະລິມານການປ່ອຍແກັສກາກບອນ ຈຶ່ງມອບເງິນສະໜັບສະໜູນສຳລັບການຊື້ລົດຍົນໄຟຟ້າສູງສຸດ 9.000 ເອີໂຣ.
ອ້າງອີງ:
ສຳນັກຂ່າວຊິນຮົວ
