ການຜະລິດສິນຄ້າສົ່ງຂາຍໃຫ້ ສປຈີນ ເປັນວິທີທີ່ຈະເຮັດໃຫ້ລາວເຮົາພົ້ນທຸກໄດ້
ໂດຍ: ທິດກໍ່າ
ທິດກໍ່າໄດ້ເຫັນແຫລ່ງຂ່າວວ່າ: ສປປ ລາວເຮົາ ກຽມສົ່ງອອກພືດຕະກຸນໝາກກ້ຽງໄປຂາຍໃຫ້ ສປ ຈີນ ເຊິ່ງພິທີລົງນາມເຊັນອານຸສັນຍາໄດ້ຈັດຂຶ້ນໃນວັນທີ 5 ພະຈິກ 2021 ທີ່ຜ່ານມາ ຢູ່ນະຄອນຫລວງວຽງຈັນ.
ໃນພິທີລົງນາມຄັ້ງນີ້ ຝ່າຍລາວໂດຍແມ່ນທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້ ແລະ ຝ່າຍຈີນແມ່ນທ່ານ ນີ ຢົວເຟິ່ງ ລັດຖະມົນຕີອົງການບໍລິຫານພາສີແຫ່ງ ສປ ຈີນ (GACC) ໃນຈຳນວນສິນຄ້າທີ່ລົງນາມດ້ວຍກັນນີ້ ມັນບໍ່ສະເພາະແຕ່ໝາກກ້ຽງເປືອກໜາ ຍັງມີໝາກພຸກ ແລະ ໝາກນາວເຫລືອງອີກດ້ວຍ.
ອີງຕາມການໃຫ້ຂໍ້ມູນຂອງທ່ານ ສຸລາພອນ ອິນທະວົງ ຫົວໜ້າກົມປູກຝັງ ໃຫ້ຮູ້ວ່າ: ໃນປີ 2021 ລາວເຮົາມີຜະລິດຕະພັນພືດຕະກູນໝາກກ້ຽງທົ່ວປະເທດ 3.620 ເຮັກຕາ, ຜົນຜະລິດ 57.500 ໂຕນ ໃນນີ້ເນື້ອທີ່ຜະລິດສິນຄ້າເພື່ອສົ່ງອອກ 2.500 ເຮັກຕາ ເທົ່າກັບ 70% ຜົນຜະລິດປະມານ 50.000 ກວ່າໂຕນ ກວມເອົາເນື້ອທີ່ 9 ແຂວງເຊັ່ນ: ຫລວງນ້ຳທາ, ບໍ່ແກ້ວ, ໄຊຍະບູລີ, ຫລວງພະບາງ, ນະຄອນຫລວງວຽງຈັນ, ບໍລິຄຳໄຊ, ສະຫວັນນະເຂດ, ຈຳປາສັກ ແລະ ແຂວງອັດຕະປື.
ເມື່ອເຫັນແຫລ່ງຂ່າວອອກມາແບບນີ້ແລ້ວ ກໍຮູ້ສຶກປາບປື້ມດີໃຈນຳ ຖືວ່າເປັນມິິຕິໃໝ່ ແລະ ປັດໄຈໃໝ່ຂອງຊາວກະສິກອນທີ່ເຮັດໜ້າທີ່ການປູກ, ການລ້ຽງ. ໃນຂັ້ນຕໍ່ໄປນີ້ ເຮົາຄິດວ່າພືດຜັກ ແລະ ໝາກໄມ້ຊະນິດຕ່າງໆທີ່ຈະສົ່ງໄປຂາຍໃຫ້ຈີນມີຫລວງຫລາຍ ແລະ ເຂົາຈະຊື້ແບບບໍ່ອັ້ນ ຂໍພຽງແຕ່ວ່າເຮົາຈະຜະລິດໄດ້ຫລາຍສໍ່າໃດ ແລະ ມີຄຸນນະພາບ ຫລື ບໍ່. ໃນສອງສາມປີຜ່ານມາ ທິດກໍ່າ ໄດ້ໄປຊີມໝາກກ້ຽງສົດໆແຖວກາສີ, ວັງວຽງ ແລະ ເຂດບ້ານນ້ຳຊານ ເມືອງລ້ຽງແຈ້ງ ແຂວງໄຊສົມບູນ ເຫັນວ່າລົດຊາດສົ້ມໆຫວານໆຫອມ ແລະ ນຸ້ມນວນດີ. ອັນພິເສດກໍແມ່ນບໍ່ມີສານເຄມີເຈືອປືນ, ແຕ່ໃນການຜະລິດປູກຝັງນີ້ ສ່ວນໃຫຍ່ຍັງເປັນຂອງປະຊາຊົນທີ່ຜະລິດຂາຍປ້ອນຕະຫລາດພາຍໃນ ຍັງບໍ່ທັນຜະລິດເປັນສິນຄ້າສົ່ງອອກຢ່າງຫລວງຫລສຍເທື່ອ.
ແຕ່ແນວໃດກໍຕາມ, ໃນເມື່ອມີໂອກາດໄດ້ມາເຖິງພວກເຮົາແລ້ວຕ້ອງພ້ອມກັນຜະນຶກກຳລັງດ້ານນີ້ໃຫ້ກາຍເປັນແຫລ່ງລາຍຮັບອັນມະຫາສານຂອງຊາດ ແລະ ຂອງປະຊາຊົນ ອີກບໍ່ດົນເສັ້ນທາງລົດໄຟ ລາວ-ຈີນ ກໍຈະໄດ້ເປີດໃນໄວໆນີ້ ໝາກກ້ຽງ, ໝາກພຸກ ແລະ ໝາກໄມ້ຊະນິດອື່ນໆແຖວກາສີວັງວຽງກໍຈະສຸກເຫລືອງເຮືອງເຮື່ອຕາມສະຖານນີລົດໄຟຄວາມໄວສູງ ນັບທັງສົ່ງໄປຂາຍໃຫ້ຈີນ ຖືວ່ານັບແຕ່ເວລານັ້ນໄປ ຊາວສວນໝາກກ້ຽງກໍຈະມີເງິນເຕັມຖົງໃນແຕ່ລະວັນແຕ່ລະເດືອນ ແລະ ແຕ່ລະປີເພີ່ມຂຶ້ນ ສາມາດພົ້ນທຸກໃນແຕ່ລະຄອບຄົວແຕ່ລະບ້ານຕາມແນວທາງນະໂຍບາຍຂອງພັກ ແລະ ລັດຖະບານວາງອອກ.
