ສະພາແຫ່ງຊາດ ພິຈາລະນາຮ່າງກົດໝາຍວ່າດ້ວຍການປະຕິບັດຄຳຕັດສິນຂອງສານ

ພາຍຫລັງທ່ານ ໄພວີ ສີບົວລິພາ ລັດຖະມົນຕີກະຊວງ ຍຸຕິທຳ ໄດ້ສະເໜີຮ່າງກົດໝາຍວ່າດ້ວຍ ການປະຕິບັດຄຳຕັດສິນຂອງສານ ສະບັບປັບປຸງ ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດທີ IX  ໃນຕອນເຊົ້າວັນທີ 15 ພະຈິກນີ້ ບັນດາສະມາຊິກສະພາຕ່າງກໍໄດ້ຄົ້ນຄວ້າ ປະກອບຄຳເຫັນ ໃຫ້ມີເນື້ອໃນຄົບຖ້ວນ ແລະ ສາມາດຮັບຮອງ ເພື່ອນຳໄປຈັດຕັ້ງປະຕິບັດໃຫ້ມີປະສິດທິພາບ. ສຳລັບໂຄງປະກອບ ແລະ ເນື້ອໃນຂອງ ຮ່າງກົດໝາຍສະບັບນີ້ປະກອບມີ 13 ພາກ, 8 ໝວດ ແລະ 115 ມາດຕາ, ໃນນັ້ນເພີ່ມເຂົ້າໃໝ່ 70 ມາດຕາ, ປັບປຸງເນື້ອໃນ 43 ມາດຕາ.

ກົດໝາຍວ່າດ້ວຍ ການປະຕິບັດຄໍາຕັດສິນຂອງສານ ສະບັບທໍາອິດໄດ້ຖືກຮັບຮອງ ແລະ ປະກາດໃຊ້ໃນປີ 2004 ປະກອບມີ 7 ພາກ, 6 ໝວດ ແລະ 51 ມາດຕາ ເຊິ່ງໄດ້ກຳນົດກົງຈັກການຈັດຕັ້ງຢູ່ຂັ້ນສູນກາງ ມີກົມປະຕິບັດຄໍາຕັດສິນຂອງສານ, ສ່ວນຢູ່ຂັ້ນທ້ອງຖິ່ນ ໄດ້ສ້າງຕັ້ງເປັນຫ້ອງການ ແລະ ໜ່ວຍງານປະຕິບັດຄໍາຕັດສິນຂອງສານ. ຕໍ່ມາໃນປີ 2008 ກົດໝາຍສະບັບດັ່ງກ່າວໄດ້ຮັບການປັບປຸງ ແລະ ໄດ້ນຳໃຊ້ມາຈົນເຖິງປັດຈຸບັນ. ຜ່ານການຈັດຕັ້ງປະຕິບັດ ມາເປັນເວລາ 13 ປີ ເຫັນວ່າຫລາຍປະເດັນໄດ້ຮັບການປັບປຸງເຮັດໃຫ້ການປະຕິບັດມີ ຄຸນນະພາບດີຂຶ້ນ ເຮັດໃຫ້ຄໍາຕັດສິນຂອງສານ ທີ່ໃຊ້ໄດ້ຢ່າງເດັດຂາດຈໍານວນຫລວງຫລາຍ ໄດ້ຮັບການຈັດຕັ້ງປະຕິ ບັດຢ່າງມີຜົນສຳເລັດ, ສາມາດເກັບກູ້ໜີ້ສິນມອບໃຫ້ຄູ່ຄວາມ, ເກັບຄ່າອາກອນ, ຄ່າປັບໄໝ ແລະ ຊັບທີ່ສານຕັດສິນຮິບເປັນຂອງລັດ ມອບເຂົ້າງົບປະມານໄດ້ຈໍານວນບໍ່ໜ້ອຍແຕ່ຄຽງຄູ່ກັນນັ້ນ ກໍຍັງມີຫລາຍບັນຫາທີ່ຈະຕ້ອງໄດ້ປັບປຸງ ໃຫ້ສອດຄ່ອງກັບສະພາບຄວາມເປັນຈິງ ຂອງການຂະຫຍາຍຕົວ ທາງດ້ານເສດຖະກິດ-ສັງຄົມ ແລະ ການເພີ່ມຂຶ້ນຂອງຄະດີ.
ທ່ານ ລັດຖະມົນຕີກະຊວງຍຸຕິທຳ ໃຫ້ຮູ້ຕື່ມວ່າ: ການປັບປຸງກົດໝາຍວ່າດ້ວຍການປະຕິບັດຄໍາຕັດສິນຂອງສານ ສ່ວນໃຫຍ່ແມ່ນໄດ້ປັບປຸງໂຄງສ້າງ ແລະ ເນື້ອໃນໃຫ້ສອດຄ່ອງກັບແນວທາງຂອງພັກໃນໄລຍະໃໝ່, ລັດຖະທຳມະນູນ ແລະ ກົດໝາຍທີ່ໄດ້ປັບປຸງໃໝ່ ພ້ອມດຽວກັນນັ້ນ, ກໍໃຫ້ສາມາດເຊື່ອມໂຍງກັບພາກພື້ນ ແລະ ສາກົນ ໂດຍສະເພາະແມ່ນບັນດາປະເທດທີ່ ສປປ ລາວ ໄດ້ເຊັນສັນຍາຊ່ວຍເຫລືອກັນທາງດ້ານກົດໝາຍ ແລະ ຍຸຕິທໍາ.