ກະຊວງ ຖວທ ສະເໜີປັບປຸງກົດໝາຍວ່າດ້ວຍມໍຣະດົກແຫ່ງຊາດ
ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ສະເໜີປັບປຸງກົດໝາຍວ່າດ້ວຍມໍຣະດົກແຫ່ງຊາດ ໂດຍເພີ່ມເຂົ້າໃໝ່ 3 ພາກ, 20 ມາດຕາ, ປັບປຸງ 25 ມາດຕາ, ຮັກສາ 51 ມາດຕາ ແລະ ໃນນີ້, ມີ 6 ມາດຕາກໍານົດໃຫ້ມີລະບຽບການຕ່່າງຫາກ ເພື່ອໃຫ້ແທດເໝາະກັບສະພາບການພັດທະນາເສດຖະກິດ-ສັງຄົມ ໃນເງື່ອນໄຂທີ່ມີການເຊື່ອມໂຍງພາກພື້ນ ແລະ ສາກົນ.
ໃນວັນທີ 13 ພະຈິກ 2021 ນີ້, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ໄດ້ສະເໜີຮ່າງກົດໝາຍວ່າດ້ວຍມໍຣະດົກແຫ່ງຊາດ ສະບັບປັບປຸງ ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ທ່ານ ລັດຖະມົນຕີກະຊວງ ຖວທ ໄດ້ກ່າວວ່າ: ໄລຍະຜ່ານມາ, ວຽກງານ ຄຸ້ມຄອງ ແລະ ປົກປັກຮັກສາ ມໍຣະດົກຂອງຊາດ ໄດ້ຮັບການຈັດຕັ້ງປະຕິບັດ ໃຫ້ຢູ່ພາຍໃຕ້ ລັດຖະບັນຍັດ ປະທານປະເທດ ວ່າດ້ວຍການອະນຸລັກມໍຣະດົກແຫ່ງຊາດທາງ ດ້ານວັດທະນະທໍາ, ປະຫວັດສາດ ແລະ ທໍາມະຊາດ ສະບັບເລກທີ 03/ສປປ, ລົງວັນທີ 20/6/1997. ຫຼັງຈາກນັ້ນ. ກົດໝາຍວ່າດ້ວຍມໍຣະດົກແຫ່ງຊາດ ສະບັບເລກທີ 08/ສພຊ, ລົງວັນທີ 9/11/2005 ໄດ້ຖືກສ້າງຂຶ້ນ ຊຶ່ງເປັນກົດໝາຍສະບັບທໍາອິດ ນໍາໃຊ້ເຂົ້າໃນການຄຸ້ມຄອງມໍຣະດົກແຫ່ງຊາດ ແລະ ໄດ້ມີການປັບປຸງ ກົດໝາຍສະບັບດັ່ງກ່າວໃນປີ 2013 ຊຶ່ງເປັນສະບັບນໍາໃຊ້ປັດຈຸບັນ. ຜ່ານການຈັດຕັ້ງປະຕິບັດກົດຫມາຍສະບັບປັດຈຸບັນ ເຫັນວ່າມີທັງດ້ານດີ ແລະ ຂໍ້ຄົງຄ້າງ ລວມທັງ ສິ່ງທ້າທ້າຍ ແລະ ຄວາມຫຍຸ້ງຍາກຫຼາຍຢ່າງ ເຊັ່ນ: ຍັງມີເນື້ອໃນບໍ່ຮັດກຸມ, ບໍ່ຈະແຈ້ງເທົ່າທີ່ຄວນ ແລະ ຍັງບໍ່ທັນແທດເໝາະກັບສະພາບຄວາມເປັນຈິງຂອງສັງຄົມ; ບໍ່ທັນສອດ ຄ່ອງກັບບັນດາເນື້ອໃນຂອງສົນທິສັນຍາສາກົນ ໃນຂະບວນວິວັດຂອງການເຊື່ອມໂຍງກັບສາກົນ ແລະ
ພາກພື້ນ, ໂດຍສະເພາະແມ່ນສົນທິສັນຍາວ່າດ້ວຍການເກືອດຫ້າມ, ສະກັດກັ້ນ, ການນໍາເຂົ້າ-ສົ່ງອອກ ແລະ ປ່ຽນ ໂອນກໍາມະສິດ ຊັບສິນທາງວັດທະນະທໍາ ທີ່ຜິດກົດໝາຍ ຫຼື (ສົນທິສັນຍາສາກົນ 1970) ແລະ ສົນທິສັນຍາ ສາກົນ ວ່າດ້ວຍຊັບສິນທາງວັດທະນະທໍາ ທີ່ຖືກລັກລອບ ຫຼື ສົ່ງອອກຜິດກົດໝາຍ ຫຼື (ສົນທິສັນຍາສາກົນ 1995) ຊຶ່ງ ສປປ ລາວ ໄດ້ໃຫ້ສັດຕະຍາບັນ ເຂົ້າເປັນພາຄີຂອງສົນທິສັນຍາດັ່ງກ່າວ ໃນທ້າຍປີ 2015. ດັ່ງນັ້ນ, ຈຶ່ງມີຄວາມຈໍາເປັນຕ້ອງໄດ້ປັບປຸງ ກົດໝາຍວ່າດ້ວຍມໍຣະດົກແຫ່ງຊາດ ສະບັບນຳໃຊ້ປັດຈຸບັນ.
ຮ່າງກົດໝາຍສະບັບປັບປຸງນີ້, ປະກອບມີທັງໝົດ XIII ພາກ, 12 ໝວດ ແລະ 96 ມາດຕາ; ໃນນັ້ນ, ໄດ້ເພີ່ມໃໝ່ 3 ພາກ ຄື ພາກທີ 6, ພາກທີ 7 ແລະ ພາກທີ 8, ໂດຍເພີ່ມເຂົ້າໃໝ່ 20 ມາດຕາ, ປັບປຸງຄືນ 25 ມາດຕາ ແລະ ຮັກສາເດີມ 51 ມາດຕາ; ໃນນີ້, ມີ 6 ມາດຕາ ທີ່ກໍານົດໃຫ້ມີເປັນລະບຽບການຕ່າງຫາກເປັນຕົ້ນ: ມາດຕາ 74 ໄດ້ຜັນຂະຫຍາຍເປັນ ດໍາລັດ ຂອງລັດຖະບານວ່າ ດ້ວຍກອງທຶນມໍຣະດົກແຫ່ງຊາດ ໃນ ປີ 2014; 4 ມາດຕາ ນະໂຍບາຍຂອງລັດກ່ຽວກັບວຽກງານມໍຣະດົກແຫ່ງຊາດ ແມ່ນໄດ້ກະກຽມເປັນຮ່າງດໍາລັດ ຂອງລັດຖະບານ ຫຼື ຮ່າງຂໍ້ຕົກລົງຂອງ ທ່ານ ລັດຖະມົນຕີ ແລ້ວ; ມາດຕາ 21 (ປັບປຸງ) ຈະໄດ້ກໍານົດລະບຽບການຕ່າງຫາກ ສໍາລັບເງື່ອນໄຂ, ມາດຕະການ ແລະ ຂັ້ນຕອນການຈັດລະດັບມໍຣະດົກແຫ່ງຊາດ ແຕ່ລະລະດັບ; ມາດຕາ 34 (ປັບປຸງ) ຈະໄດ້ກຳນົດລະບຽບການຕ່າງຫາກ ສໍາລັບຮູບແບບ, ຂັ້ນຕອນການອະນຸຍາດ ລວມທັງສິດ ແລະ ພັນທະ ຂອງຜູ້ຈໍາລອງແບບຂອງມໍຣະດົກ; ມາດຕາ 68 (ໃໝ່) ຈະກໍານົດລະບຽບການຕ່າງຫາກ ສໍາລັບການດໍາເນີນການຂຸດຄົ້ນມໍຣະດົກແຫ່ງຊາດ; ມາດຕາ 78 (ປັບປຸງ) ກໍຈະໄດ້ມີລະບຽບການຕ່າງຫາກ ສຳລັບການຈັດຕັ້ງ ແລະ ການເຄື່ອນໄຫວຂອງຄະນະກຳມະການຄຸ້ມຄອງມໍຣະດົກແຫ່ງຊາດ ຂັ້ນສູນກາງ; ສໍາລັບ ມາດຕາ 65 ຊຶ່ງເປັນມາດຕາໃໝ່ ຈະໄດ້ກະກຽມຄົ້ນຄວ້າສ້າງເປັນນິຕິກໍາໃຕ້ກົດໝາຍ.
ທ່ານ ລັດຖະມົນຕີກະຊວງ ຖວທ ກ່າວອີກວ່າ: ເມື່ອກົດໝາຍວ່າດ້ວຍມໍຣະດົກແຫ່ງຊາດ ສະບັບປັບປຸງ ໄດ້ຖືກຮັບຮອງ ແລະ ປະກາດໃຊ້ແລ້ວ, ຄາດວ່າຈະເຮັດໃຫ້ມີຄວາມເປັນເອກະພາບໃນການຈັດ ຕັ້ງປະຕິບັດຂອບເຂດທົ່ວປະເທດ ຕໍ່ກັບວຽກງານຄຸ້ມຄອງ ແລະ ປົກປັກຮັກສາມໍລະດົກແຫ່ງຊາດ ເພື່ອຮັກສາໄວ້ຊຶ່ງຄຸນຄ່າ ຂອງມໍຣະດົກແຫ່ງຊາດທາງດ້ານວັດທະນະທໍາ, ປະຫວັດສາດ ແລະ ທໍາມະຊາດ ໃຫ້ມີຄວາມຍືນຍົງຕະຫຼອດໄປ; ປ້ອງກັນຜົນກະທົບໃນທາງລົບ ທີ່ອາດຈະເກີດຂື້ນ ຕໍ່ມໍຣະດົກແຫ່ງຊາດ ຈາກການພັດທະນາ ບັນດາໂຄງການກໍ່ສ້າງພື້ນຖານໂຄງລ່າງທາງດ້ານເສດຖະກິດ-ສັງຄົມ; ຕ້ານ, ສະກັດກັ້ນ ແລະ ຈໍາກັດ ການລັກລອບຄ້າຂາຍວັດຖຸບູຮານ ອັນລໍ້າຄ່າທີ່ຫາຍາກ ແລະ ຊັບສົມບັດທີ່ມີຄຸນຄ່າສູງທາງດ້ານວັດທະນະທໍາ, ປະຫວັດສາດຂອງຊາດ ດ້ວຍການຂຶ້ນທະບຽນ ແລະ ປົກປັກຮັກສາໄວ້ໃຫ້ເປັນສົມບັດອັນລໍ້າຄ່າຂອງຊາດສືບຕໍ່ໄປ; ສາມາດທວງຄືນເອົາວັດຖຸບູຮານ ທີ່ເປັນມໍລະດົກຂອງຊາດ ກັບຄືນປະເທດ ຕາມສົນທິສັນຍາສາກົນວ່າດ້ວຍການເກືອດຫ້າມ, ປ້ອງກັນການນໍາເຂົ້າ-ສົ່ງອອກ ແລະ ໂອນກໍາມະສິດ ຊັບສິນທາງວັດທະນະທໍາ ແບບຜິດກົດໝາຍ, ສົນທິສັນຍາສາກົນວ່າດ້ວຍຊັບສົມບັດວັດທະນະທໍາ ທີ່ຖືກລັກ ຫຼື ຖືກສົ່ງອອກ ແບບຜິດກົດໝາຍ ແລະ ບັນດາສົນທິສັນຍາ ສາກົນອື່ນ; ອໍານວຍຄວາມສະດວກໃຫ້ປະຊາຊົນລາວບັນດາເຜົ່າໄດ້ພ້ອມກັນປົກປັກຮັກສາ, ຊື່ນຊົມ ແລະ ຮັບຮູ້ຂໍ້ມູນກ່ຽວກັບມໍຣະດົກແຫ່ງຊາດຂອງຕົນ ແລະ ປະກອບ ສ່ວນເຂົ້າໃນການສ້າງສາ, ພັດທະນາຊີວິດ ການເປັນຢູ່ຂອງປະຊາຊົນລາວບັນດາເຜົ່າ ແລະ ສຶກສາອົບຮົມຄວາມຮັກຊາດແພງເຊື້ອ ນັບມື້ນັບດີຂຶ້ນ.
