ອັດຕາການສູບຢາຂອງໄວໜຸ່ມລາວ ປີ 2015 ເພີ່ມຂຶ້ນ 27,9 %
ການສຳຫລວດລະດັບຊາດ ກ່ຽວກັບການສູບຢາ ສະແດງໃຫ້ເຫັນວ່າ ອັດຕາການສູບຢາຂອງຄົນລາວ ຍັງສືບຕໍ່ເພີ່ມຂຶ້ນຈາກ 25,5% ໃນປີ 2012 ເປັນ 27,9% ໃນປີ 2015 ແລະ ການສໍາຫລວດໃນໄວໜຸ່ມອາຍຸ 13-15 ໃນປີ 2016 ພົບວ່າ ຊາວໜຸ່ມ ນໍາໃຊ້ຢາສູບໄຟຟ້າເພີ່ມຂຶ້ນ. ໃນນັ້ນ, ເພດຊາຍ 5% ແລະ ເພດຍິງ 3.7%. ໃນຂະນະທີ່ທົ່ວໂລກມີຄົນຕາຍຍ້ອນພະຍາດທີ່ເກີດຈາກຢາສູບປະມານ 8 ລ້ານຄົນຕໍ່ປີ ແລະ ຖ້າຂາດມາດຕະການຄວບຄຸມຢາສູບທີ່ມີປະສິດທິຜົນ ຈະສືບຕໍ່ເພີ່ມຂຶ້ນເປັນ 10 ລ້ານຄົນຕໍ່ປີ ພາຍໃນປີ 2030.
ສໍາລັບ ສປປ ລາວ ມີຄົນເສຍຊີວິດປະ ມານ 6.700 ຄົນຕໍ່ປີ ປະມານ 18 ຄົນຕໍ່ມື້ (ຂໍ້ມູນຈາກ WHO), ລາຍງານໂດຍທ່ານ ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ໃນວັນທີ 12 ພະ ຈິກ 2021 ໃນກອງປະຊຸມສະ ໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX.
ທ່ານ ດຣ ບຸນແຝງ ພູມມະໄລສິດ ໃຫ້ຮູ້ຕື່ມວ່າ: ອີງຕາມການສຶກສາຄ່າໃຊ້ຈ່າຍລະດັບຊາດ ປີ 2009 ຂອງການປິ່ນປົວພຽງ 3 ພະຍາດ ທີ່ເກີດຈາກຢາສູບຄື: ເສັ້ນເລືອດໃນສະໝອງຕີບ-ຕັນ-ແຕກ, ປອດອຸດຕັນຊ້ຳເຮື້ອ ແລະ ມະ ເຮັງປອດ ທີ່ເຂົ້ານອນໂຮງໝໍພຽງເທື່ອດຽວ ຈະມີມູນຄ່າຫລາຍກວ່າ 28 ຕື້ກີບ ເທົ່າກັບ 0.80% ຂອງລາຍຮັບແຫ່ງ ຊາດ ຫລື 22% ຂອງຄ່າໃຊ້ຈ່າຍວຽກງານສາທາລະນະສຸກ ໃນ ສປປ ລາວ, ໃນນີ້ 77% ແມ່ນຄອບຄົວ ເປັນຜູ້ຈ່າຍ, 21% ແມ່ນລັດຖະບານ, ສ່ວນອົງການປະກັນສຸຂະພາບ ຈ່າຍໃຫ້ພຽງ 2% ເທົ່ານັ້ນ.
ປີ 2010 ອົງການ UNDP ແລະ WHO ຄິດໄລ່ຄ່າໃຊ້ຈ່າຍທາງກົງ ແລະ ທາງອ້ອມ ໃນການປິ່ນປົວພະຍາດ ທີ່ເກີດຈາກການສູບຢາໃນລາວ ສູງເຖິງ 350 ລ້ານໂດລາ/ປີ ປະມານ 2,3% ຂອງ GDP. ເພື່ອຮັບປະກັນການຈັດຕັ້ງປະຕິບັດ ກົດໝາຍວ່າດ້ວຍການຄວບຄຸມຢາສູບ (ສະບັບປັບປຸງ) ໃຫ້ມີປະສິດທິພາບ ແລະ ປະສິດທິຜົນ ຂະແໜງການສາທາລະນະສຸກ ຕ້ອງໄດ້ສົມ ທົບກັບພາກສ່ວນທີ່ກ່ຽວຂ້ອງ ເຊັ່ນ: ຂະແໜງການອຸດສາ ຫະກຳ ແລະການຄ້າ, ປ້ອງກັນຄວາມສະຫງົບ, ການເງິນ, ຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ສຶກສາ ທິການ ແລະ ກິລາ, ອົງການປົກຄອງຂັ້ນທ້ອງຖິ່ນ ແລະ ພາກສ່ວນອື່ນໆທີ່ກ່ຽວຂ້ອງ ເພື່ອຈັດຕັ້ງປະຕິບັດກົດໝາຍ ສະບັບປັບປຸງນີ້. ພ້ອມກັນນັ້ນ, ກະຊວງສາທາລະນະສຸກ ກໍຕ້ອງລາຍງານ ສະພາບການເຄື່ອນໄຫວວຽກງານຄວບຄຸມຢາສູບ ໃຫ້ລັດຖະບານ ຢ່າງເປັນປົກກະຕິ.
ນອກຈາກນີ້, ບັນດາອົງການລັດ ທີ່ມີສ່ວນຮັບຜິດຊອບໃນວຽກງານຄວບຄຸມຢາສູບ ຕ້ອງໄດ້ເອົາໃຈໃສ່ ບັງຄັບໃຊ້ກົດໝາຍ ຕາມຂອບເຂດຄວາມຮັບຜິດຊອບຂອງຕົນຢ່າງຈິງຈັງ, ຊຸກຍູ້ພາກສ່ວນທີ່ຂຶ້ນກັບການຈັດຕັ້ງ ຂອງຕົນ ເຄື່ອນໄຫວຕາມກົດໝາຍກຳນົດໄວ້ຢ່າງເຂັ້ມງວດ ທັງເປັນເຈົ້າການໂຄສະນາເຜີຍແຜ່ເນື້ອໃນ ຂອງກົດໝາຍສະບັບດັ່ງກ່າວ ທີ່ພົວພັນກັບຂອບເຂດຄວາມຮັບຜິດຊອບຂອງຕົນ ນັບທັງສູນກາງ ແລະ ທ້ອງຖິ່ນ ຢ່າງເປັນປົກກະຕິ.
