ສະພາປະຊາຊົນແຂວງອຸດົມໄຊ ເອົາໃຈໃສ່ແກ້ໄຂຄຳຮ້ອງທຸກປະຊາຊົນໄດ້ເປັນຈຳນວນຫລາຍ

ໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ທີ່ພວມດຳເນີນຢູ່ໃນປັດຈຸບັນນີ້, ທ່ານ ນາງ ຄຳພອນ ພິມມະຈັນ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 4 ອຸດົມໄຊ ໄດ້ໃຫ້ສຳພາດຕໍ່ສື່ມວນຊົນວ່າ: ນັບແຕ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ຈົນມາຮອດປັດຈຸບັນສະພາປະຊາຊົນແຂວງອຸດົມໄຊ ສາມາດຈັດຕັ້ງປະຕິບັດວຽກງານສຳຄັນຫລາຍດ້ານຫລາຍດ້ານເປັນຕົ້ນແມ່ນ: ການກໍ່ສ້າງ ແລະ ການຊົດເຊີຍໃຫ້ປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟຄວາມໄວສູງ ລາວ-ຈີນ ຢູ່ບັນດາຈຸດຕ່າງໆ ແລະ ການຂຸດຄົ້ນແຮ່ທາດຂອງ ບໍລິສັດຂຸດຄົ້ນຄໍາ, ບໍລິສັດ ລາວ-ຊິນຫຼົງ ບຸກເບີກອຸດສາຫະກໍາບໍ່ແຮ່  ແລະ ການ ຂຸດຄົ້ນແຮ່ຄໍາຕົກຂ້ອນ ຂອງບໍລິສັດ NKB ກໍ່ສ້າງເຄຫາສະຖານ ແລະ ຂົວທາງ ຈໍາກັດ ຢູ່ເມືອງປາກແບງ, ການປູກກ້ວຍຫອມຂອງນັກລົງທຶນຊາວຈີນ ຢູ່ເມືອງຮຸນ, ການກໍ່ສ້າງບ້ານ ເຈື່ອນຂອງໂຄງການພັດທະນາແຄມນໍ້າກໍເທດສະບານ ເມືອງໄຊ, ຕິດຕາມກວດກາການກໍ່ສ້າງ ເສັ້ນທາງ ແລະ ການຈັດຕັ້ງປະຕິບັດໜ້າທີ່ຢູ່ຄ້າຍຂຸມຂັງ-ດັດສ້າງ ໃນແຂວງ ຈຳນວນ 15 ຈຸດ.

ພ້ອມນີ້ ຍັງເອົາໃຈໃສ່ໃຫ້ຄໍາປຶກສາຄວາມຮູ້ທາງດ້ານກົດໝາຍ ແລະ ຮັບຄໍາຮ້ອງຂໍຄວາມເປັນທໍາຈາກປະຊາຊົນ ທັງຫມົດ 62 ເລື່ອງ ໃນນັ້ນມີຄະດີອາຍາ 12 ເລື່ອງ, ແພງ 23 ເລື່ອງ ແລະ ບໍລິຫານ 27 ເລື່ອງ.