ສວນພຶກສາແຫລ່ງທ່ອງທ່ຽວໃໝ່ທີ່ໜ້າສົນໃຈ

          ເຊົ້າວັນທີ 23 ມີນານີ້, ທ່ານ ພູວົງ ພະມີສິດ ເຈົ້າຂອງຮ້ານຂາຍຄຳພູວົງ ໄດ້ເປີດສວນພຶກສາ ເປັນແຫລ່ງທ່ອງທ່ຽວ ແລະ ສະຖານທີ່ພັກຜ່ອນຂອງມວນຊົນ ໂດຍສະເພາະບັນດາຄອບຄົວຊາວນະຄອນຫລວງວຽງຈັນ, ຊຶ່ງສວນດັ່ງກ່າວຕັ້ງຢູ່ເຂດບ້ານດ່ານຊີ, ເມືອງນາຊາຍທອງ, ຫ່າງຈາກນະຄອນຫລວງວຽງຈັນໄປທາງເລກທີ 13 ເໜືອ, ປະມານ 20 ກິໂລແມັດ, ຊຶ່ງມີເນື້ອທີ່ທັງໝົດ 15 ເຮັກຕາ, ໃນນັ້ນ ຈະປະກອບມີ: ຮ້ານອາຫານ, ສວນດອກໄມ້ຫລາກຫລາຍຊະນິດ, ມູນຖ່າຍຮູບທີ່ຖືກຕົບແຕ່ງຢ່າງປານີດ ແລະ ສວຍງາມທີ່ສຸດ, ສວນໝາກໄມ້ຫລາຍຊະນິດເຊັ່ນ: ສະຕໍເບີລີ, ແຄນຕາລຸກ ແລະ ອື່ນໆ, ພ້ອມຍັງມີສວນຜັກປອດສານພິດ, ຕູບນ້ອຍແຄມນ້ຳໄວ້ຄອຍພັກຜ່ອນຫລາຍຕູບ ແລະ ອື່ນໆທີ່ໃຫ້ຄວາມສະດວກສະບາຍແກ່ຜູ້ໄປທ່ຽວ, ທັງມີລົດພາເລາະທ່ຽວຊົມໄດ້ທຸກພື້ນທີ່ ແລະ ຈະມີກິດຈະກຳຕ່າງໆທີ່ແຕກຕ່າງກັນໃນແຕ່ລະວັນໃຫ້ຊົມອີກດ້ວຍ.

ທ່ານ ພູວົງ ໃຫ້ຮູ້ວ່າ: ພຽງ 1 ປີເທົ່ານັ້ນໃນການປັບປຸງ ແລະ ຕົບແຕ່ງພື້ນທີ່ເປົ່າຫວ່າງແຫ່ງນີ້ ໃຫ້ກາຍເປັນສວນພຶກສາທີ່ສວຍງາມ, ອຸດົມສົມບູນໄປດ້ວຍສີຂຽວອ້ອມຮອບ, ປັດຈຸບັນ ການຕົບແຕ່ງແມ່ນຍັງບໍ່ທັນສຳເລັດຮຽບຮ້ອຍດີເທົ່າທີ່ຄວນ, ແຕ່ສາມາດຮັບຮອງແຂກໄດ້ຈຳນວນໜຶ່ງ ແລະ ຄາດວ່າກ່ອນບຸນປີໃໝ່ລາວນີ້ ຈະເປີດໃຫ້ບໍລິການຢ່າງເຕັມຮ້ອຍ, ເພື່ອໃຫ້ຊາວນະຄອນຫລວງວຽງຈັນ ກໍຄືແຂກພາຍໃນ ແລະ ຕ່າງປະເທດ ສາມາດເຂົ້າມາທ່ຽວຊົມສວນພຶກສາແຫ່ງນີ້ຢ່າງມີຄວາມສຸກ ແລະ ຕື່ນຕາຕື່ນໃຈໄປກັບກິດຈະກຳຕ່າງໆທີ່ພວກເຮົາກຽມໄວ້ໄດ້ຢ່າງແນ່ນອນ. ຄາດວ່າຈະເກັບຄ່າເຂົ້າຊົມຄົນລະ 15 ພັນກີບ ແລະ ເດັກນ້ອຍຄົນລະ 5 ພັນກີບ, ສ່ວນນັກຮຽນ, ນັກສຶກສາ ແມ່ນຈະຫລຸດລາຄາພິເສດ, ເພື່ອນຳເອົາເງິນຈຳນວນດັ່ງກ່າວ ໄປປັບປຸງ ແລະ ບູລະນະສວນໃຫ້ມີຄວາມງົດງາມຕະຫລອດໄປ.