ຈີນ ເຕືອນປະຊາຊົນພ້ອມຮັບມືກັບອາກາດໜາວໄວກວ່າປົກກະຕິ
November 8, 2021 - 10:38 AM
ຕາມຂ່າວຈາກ ນະຄອນຫລວງ ປັກກິ່ງ,ວັນທີ 7 ພະຈິກ, ສຳນັກງານ ອຸຕຸນິຍົມ ວິທະຍາແຫ່ງຊາດຈີນ ອອກປະກາດ ເຕືອນໄພສະພາບອາກາດປ່ຽນແປງໃນລະດັບ ສີສົ້ມ ເຊິ່ງເປັນລະດັບຮອງຈາກສູງສຸດ ເນື່ອງຈາກຫິມະໄລຍະທຳອິດຂອງລະດູໜາວປີນີ້ມາໄວ ແລະ ຫລາຍກວ່າປົກກະຕິ ໂດຍປະລິມານຫິມະຕົກສະສົມໃນບາງພື້ນທີ່ທາງພາກເໜືອ ຂອງຈີນ ສູງເຖິງ 45 ມີລິແມັດ ພາຍໃນໄລຍະເວລາ 24 ຊົ່ວໂມງ ຖືວ່າມາໄວກວ່າປົກກະຕິ ເຖິງ 23 ວັນ.
ດັ່ງນັ້ນ ເຈົ້າໜ້າທີ່ທາງການໄດ້ມີຄຳເຕືອນ ໃຫ້ປະຊາຊົນ ຫລີກລ້ຽງ ອອກນອກເຄຫາສະຖານ ຖ້າບໍ່ຈຳເປັນ ເນື່ອງຈາກອຸນຫະພູມ ມີແນວໂນ້ມ ຫລຸດລົງຕ່ຳສຸດ ໃນຮອບໜຶ່ງທົດສະວັດ ລວມທັງ ພາກຕາເວັນອອກ ລົງໄປຈົນເຖິງ ພາກໃຕ້ ນັບແຕ່ ນະຄອນຊຽງໄຮ້ ໄປຈົນເຖິງ ເມືອງກວ່າງໂຈວ ໄດ້ຮັບຕຳເຕືອນ ໃຫ້ລະມັດ ລະວັງ ສະພາບ ອາກາດ ໜາວແຮງ ເຊັ່ນກັນ.
