ກະຊວງການເງິນ-ກຸ່ມບໍລິສັດລາວໂທລະຄົມມະນາຄົມຮ່ວມມືພັດທະນາລະບົບຊໍາລະພາສີ-ອາກອນຄ່າທໍານຽມ-ຄ່າບໍລິການຜ່ານ M-Money
ວັນທີ 5 ພະຈິກ 2021 ທີ່ກະຊວງການເງິນ, ໄດ້ມີພິທີລົງນາມບົດບັນທຶກຄວາມເຂົ້າໃຈວ່າດ້ວຍການພັດທະນາການຊໍາລະພາສີ-ອາກອນ, ຄ່າທຳນຽມ-ຄ່າບໍລິການ, ເບີກຈ່າຍງົບປະມານແຫ່ງລັດຜ່ານບໍລິການການເງິນດິຈິຕ້ອນ M-Money ແລະ ການນໍາໃຊ້ບໍລິການລະບົບພື້ນຖານໂຄງລ່າງໂທລະຄົມລະຫວ່າງ ກະຊວງການເງິນ ແລະ ກຸ່ມບໍລິສັດ ລາວ ໂທລະຄົມມະນາຄົມ ມະຫາຊົນ.
ການລົງນາມບົດບັນທຶກຄວາມເຂົ້າໃຈໃນຄັ້ງນີ້ກະຊວງການເງິນໂດຍແມ່ນທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ແລະ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ກຸ່ມບໍລິສັດ ລາວ ໂທລະຄົມມະນາຄົມ ມະຫາຊົນ, ໂດຍການໃຫ້ກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແລະ ທ່ານ ສຈ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ມີຄະນະຜູ້ບໍລິຫານທັງສອງຝ່າຍ ແລະ ແຂກທີ່ມີກຽດເຂົ້າຮ່ວມ.
ໃນວາລະດັ່ງກ່າວທ່ານ ບຸນປະເສີດ ສີກຸນລະບຸດ ຫົວໜ້າສະຖາບັນພັດທະນາຂໍ້ມູນຂ່າວສານການເງິນ ໄດ້ມີຄໍາເຫັນ ວ່າ: ເພື່ອເປັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ແຜນພັດທະນາວຽກງານຫັນເປັນທັນສະໄໝ ແລະ ດິຈິຕ້ອນຂອງຂະແໜງການເງິນພາກລັດໃນໄລຍະ 5 ປີ (2021-2025) ກະຊວງການເງິນ ໄດ້ມີແນວທາງນະໂຍບາຍປະຕິຮູບແບບຮອບດ້ານ.ໃນນັ້ນ, ກໍແມ່ນການຊໍາລະພັນທະຜ່ານລະບົບມືຖືທີ່ນອນຢູ່ໃນແຜນຍຸດທະສາດຫັນເປັນທັນສະໄໝຂອງຂະແໜງການເງິນ.
ຕະຫຼອດໄລຍະ 10 ຜ່ານມາກະຊວງການເງິນໃນນາມເປັນຜູ້ຈັດຕັ້ງຜັນຂະຫຍາຍນະໂຍບາຍ ແລະ ທິດທາງດັ່ງກ່າວ ໄດ້ຖືເອົາການຫັນວຽກງານຂະແໜງການເງິນເປັນທັນສະໄໝເປັນບຸລິມະສິດ ໂດຍໄດ້ມີວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025. ກະຊວງການເງິນໄດ້ສຸມໃສ່ປະຕິຮູບ ແລະ ພັດທະນາຂະແໜງການເງິນຢ່າງຮອບດ້ານໃຫ້ເປັນຮູບປະທຳສຸມໃສ່ປັບປຸງນະໂຍບາຍ, ມາດຕະການ ແລະ ກົນໄກເພື່ອເປັນເຄື່ອງມືຄຸ້ມຄອງງົບປະມານແຫ່ງລັດໃຫ້ລວມສູນມີປະສິດທິພາບ, ຫຼຸດຂອດຂັ້ນສິ່ງອຸດຕັນຕ່າງໆ.
ການຊຳລະສະສາງຜ່ານລະບົບມືຖືເປັນອີກໜຶ່ງທາງເລືອກທີ່ເໝາະສົມ, ເຂົ້າເຖິງໄດ້ງ່າຍ ແລະ ມີຄວາມໝາຍຄວາມສຳຄັນເພາະຈະເປັນອີກໂຄງການໜຶ່ງທີ່ສົ່ງເສີມ, ສະໜອງທາງເລືອກ, ອຳນວຍຄວາມສະດວກໃຫ້ແກ່ຜູ້ຊົມໃຊ້,ຫົວໜ່ວຍທຸລະກິດໃນການເຂົ້າເຖິງການບໍລິການຂອງພາກລັດໃນການປະຕິບັດການຊຳລະພັນທະໃຫ້ແກ່ລັດ ແລະ ເບີກຈ່າຍງົບປະມານຕ່າງໆ.
ໂຄງການດັ່ງກ່າວ, ຈະໄດ້ສຸມໃສ່ການຊຳລະຄ່າພາສີ-ອາກອນ, ຄ່າທຳນຽມ, ຄ່າບໍລິການ ແລະ ພັນທະອື່ນໆຜ່ານລະບົບມືຖື (M-Money); ການເບີກຈ່າຍງົບປະມານແຫ່ງລັດຜ່ານລະບົບມືຖື (M-Money); ການນໍາໃຊ້ບໍລິການລະບົບພື້ນຖານໂຄງລ່າງໂທລະຄົມມະນາຄົມເຊັ່ນ: Internet Link, Data Link, Cloud Backup, E-mail Backup, Call Center Service (Help desk), Cyber Security, Big Data, IOT, Cargo Tracking ແລະ ອື່ນໆ ຂອງລາວ ໂທລະຄົມເຂົ້າໃນວຽກງານຂອງກະຊວງການເງິນ ເພື່ອຫັນວຽກງານຂະແໜງການເງິນກ້າວໄປສູ່ລະບົບການເງິນດີຈີຕ້ອນ.
ພ້ອມກັນນັ້ນ, ທ່ານ ທັນສະໄໝ ຊາມຸນຕີ ຜູ້ຊີ້ນໍາວຽກງານ Commercial ລລທ ທັງເປັນຜູ້ອໍານວຍການບໍລິສັດ ລາວໂມບາຍມັນນີ ຈໍາກັດຜູ້ດຽວ ໄດ້ໃຫ້ຮູ້ວ່າ: ປັດຈຸບັນບັນດາ Smart Service ຕ່າງໆໃນເຕັກໂນໂລຊີອຸດສະຫະກຳ 4.0 ໄດ້ມີການພັດທະນາຢ່າງກ້າວກະໂດດຖືກນຳມາໃຊ້ໃນການບໍລິຫານງານບໍ່ວ່າທາງພາກລັດ, ພາກທຸລະກິດ, ເອກກະຊົນ ແລະ ການດຳລົງຊີວິດປະຈຳວັນຂອງຜູ້ຄົນໃນສັງຄົມຫຼາຍຂຶ້ນໂດຍສະເພາະ Smart Payment E-Wallet ກະເປົາເງິນເທິງມືຖືກຳລັງໄດ້ຮັບຄວາມນິຍົມໃນສັງຄົມຢ່າງແຜ່ຫຼາຍ ແລະ ເພື່ອເປັນການຜັນຂະຫຍາຍໃຫ້ເປັນຮູບປະທໍາຕໍ່ແຜນພັດ ທະນາເສດຖະກິດສັງຄົມແຫ່ງຊາດ ຄັ້ງທີ 09 (2021-2025) ຂອງພັກ-ລັດຖະບານການຫັນວຽກງານໄປສະນີໂທລະຄົມ ກາຍເປັນອຸດສະຫະກໍາທັນສະໄໝນໍາໃຊ້ລະບົບພື້ນຖານໂຄງລ່າງໂທລະຄົມມະນາຄົມທີ່ມີຢູ່ ສະໜັບສະໜູນຢ່າງເຕັມສ່ວນການຫັນເປັນລັດຖະບານ Digital ກໍຄືວິໄສທັດຂອງກະຊວງການເງິນໃນການພັດທະນາລະບົບການຊຳລະພາສີ-ອາກອນ, ຄ່າທຳນຽມ-ຄ່າບໍລິການຕ່າງໆ, ການເບີກຈ່າຍງົບປະມານແຫ່ງລັດຜ່ານລະບົບເອເລັກໂຕນິກທີ່ສາມາດຕິດຕາມກວດກາໄດ້ຕະຫຼອດແບບ Near Real time ຜ່ານລະບົບ Standard Payment Gateway ກະເປົາເງີນເທີງມືຖື M-Money ສາມາດໃຫ້ທົ່ວສັງຄົມທຸກຂົງເຂດການຈັດຕັ້ງລັດ, ບໍລິສັດ, ລັດວິສາຫະກິດ ແລະ ເອກກະຊົນຫ້າງຮ້ານຕ່າງໆສາມາດເຂົ້າເຖີງລະບົບການຊໍາລະແລະການຈ່າຍດັ່ງກ່າວໄດ້ຢ່າງງ່າຍສະດວກ ປອດໄພ ໃດ້ມາດຖານສາກົນຫຼຸດຜ່ອນການນຳໃຊ້ເງິນສົດກາຍມາເປັນສັງຄົມ Cashless Society ໃນທີ່ສຸດ.
ການຮ່ວມມືໃນຄັ້ງນີ້ ຖືເປັນອີກບາດກ້າວໜຶ່ງທີ່ສຳຄັນໃນການຫັນການຊຳລະພັນທະຂະແໜງການເງິນໃນຮູບແບບ ໃໝ່ຜ່ານ M-Money ກະເປົາເງິນເທິງມືຖືເຂົ້າໃນວຽກງານຂອງລັດ, ທັງເປັນການສ້າງທ່າແຮງ, ຊຸກຍູ້, ເສີມສ້າງ ແລະ ຜັນຂະຫຍາຍເສດຖະກິດດິຈິຕອນ, ຫຼຸດຜ່ອນການນຳໃຊ້ເງິນສົດເຂົ້າໃນການເກັບລາຍຮັບພາສີອາກອນ ແລະ ລາຍຈ່າຍຂະ ແໜງການເງິນແຫ່ງລັດຂອງກະຊວງການເງິນ, ຊຶ່ງເປັນເຄື່ອງມືທາງດ້ານການເງິນອັນໜຶ່ງທີ່ຈະເພີ່ມທະວີຄວາມເຂັ້ມແຂງ ແລະ ຄວາມໂປ່ງໃສໃຫ້ແກ່ລະບົບຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດ, ເພື່ອຮັບປະກັນການຈັດເກັບລາຍຮັບເຂົ້າງົບ ປະ ມານແຫ່ງລັດໃຫ້ບັນລຸຕາມແຜນການ ລວມເຖີງການເບີກຈ່າຍງົບປະມານແຫ່ງລັດຕ່າໆໃຫ້ມີຄວາມວ່ອງໄວ, ທັນສະໄໝ ແລະ ກວດສອບໄດ້.
