ໄຟເຊີ ກຽມແຈກສູດຢາ ປິ່ນປົວໂຄວິດ ‘ແພກໂລວິດ’ ຫວັງກະຈາຍເຖິງປະເທດທຸກຍາກ

ໄຟເຊີເຈລະຈາກັບອົງກອນສິດທິບັດຢາຮ່ວມ (MPP) ກຽມແຈກສູດຢາ ‘ແພກໂລວິດ’ ໃຫ້ປະເທດຕ່າງໆຜະລິດເອງ ຫວັງຊ່ວຍປະເທດທຸກຍາກສາມາດເຂົ້າເຖິງຢາໄດ້ຢ່າງເທົ່າທຽມ.

ວັນທີ 6 ພະຈິກ 2021, ອົງກອນສິດທິບັດຢາຮ່ວມ (MPP) ເຊິ່ງໄດ້ຮັບການສະໜັບສະໜູນຈາກອົງການສະຫະປະຊາຊາດ (UN) ເປີດເຜີຍຕໍ່ສຳນັກຂ່າວຣອຍເຕີວ່າ: ບໍລິສັດໄຟເຊີ ອິງ ກຳລັງຢູ່ລະຫວ່າງເຈລະຈາກັບ MPP ກ່ຽວກັບການມອບສິດທິການຜະລິດຢາ ‘ແພກໂລວິດ’ (Paxlovid) ເຊິ່ງເປັນຢາປິ່ນປົວພະຍາດໂຄວິດ-19 ໃຫ້ບໍລິສັດມີຄຸນສົມບັດເໝາະສົມໃນປະເທດຕ່າງໆ ເພື່ອເປີດໂອກາດໃຫ້ກຸ່ມປະເທດທຸກຍາກສາມາດເຂົ້າເຖິງຢາດັ່ງກ່າວໄດ້ ໂດຍປັດຈຸບັນຢູ່ລະຫວ່າງຂະບວນການພິຈາລະນາຂອງ MPP.

ໄຟເຊີເປີດເຜີຍໃນວັນທີ 4 ພະຈິກວ່າ: ຢາປິ່ນປົວໂຄວິດ-19 ຊະນິດຮັບປະທານຂອງບໍລິສັດ ມີຜົນການທົດລອງບົ່ງຊີ້ວ່າ: ສາມາດຫລຸດການເຂົ້າປິ່ນປົວໃນໂຮງໝໍ ແລະ ການເສຍຊີວິດໃນຜູ້ຕິດເຊື້ອທີ່ມີຄວາມສ່ຽງສູງໄດ້ເຖິງ 89% ສູງກວ່າ ‘ຢາໂມລນູພິຣາເວຍ’ ຂອງເມີກ ທີ່ມີປະສິດທິພາບ 50%. ພ້ອມລະບຸວ່າ: ຈະຟ້າວດຳເນີນການສົ່ງຜົນການທົດລອງນີ້ໃຫ້ສຳນັກງານຄະນະກຳມະການອາຫານ ແລະ ຢາອາເມລິກາ (FDA) ເພື່ອຂໍອະນຸມັດການໃຊ້ຢາດັ່ງກ່າວເປັນກໍລະນີສຸກເສີນໂດຍໄວທີ່ສຸດ.

ຢາດັ່ງກ່າວ ເຊິ່ງມີຊື່ວ່າ: ‘ແພກໂລວິດ’ (Paxlovid) ມີການທົດລອງໃນອາສາສະໝັກຈຳນວນ 1.219 ຄົນ ພົບວ່າຜູ້ຕິດເຊື້ອທີ່ໄດ້ຮັບຢາຂອງໄຟເຊີພາຍໃນ 3 ວັນຫລັງມີອາການມີຈຳນວນພຽງ 0,8% ທີ່ຕ້ອງເຂົ້າຮັບການປິ່ນປົວໃນໂຮງໝໍ ແລະ ບໍ່ມີຜູ້ໃດເສຍຊີວິດ ໂດຍອັດຕາດັ່ງກ່າວໃກ້ຄຽງກັບຜູ້ທີ່ໄດ້ຮັບຢາພາຍໃນ 5 ວັນຫລັງມີອາການ. ຂະນະທີ່ຜູ້ໄດ້ຮັບຢາຂີ້ຕົວະຈຳນວນ 7% ຕ້ອງເຂົ້າປິ່ນປົວໃນໂຮງໝໍ ແລະ ບາງຄົນເສຍຊີວິດໃນເວລາຕໍ່ມາ.

ນາງ ແອນນາລີຊາ ແອນເດິສັນ ຜູ້ອຳນວຍການໂຄງການຢາປິ່ນປົວໂຄວິດ-19 ຂອງໄຟເຊີ ກ່າວວ່າ: ຜົນການທົດລອງນີ້ເປັນຂ່າວທີ່ມະຫັດສະຈັນທີ່ສຸດ ເຮົາກຳລັງຊອກຫາວິທີທີ່ຈະມາປ້ອງກັນ ແລະ ປິ່ນປົວແບບຄົບວົງຈອນ ເຮົາມີວັກຊີນ ແລະ ຕອນນີ້ເຮົາມີໂອກາດໃນການປິ່ນປົວແລ້ວ.

ການເປີດເຜີຍຫລ້າສຸດຂອງໄຟເຊີຖືເປັນອີກໜຶ່ງຄວາມຫວັງໃນການປິ່ນປົວພະຍາດໂຄວິດ-19 ດ້ວຍຢາເມັດທີ່ສາມາດຮັບປະທານເອງຢູ່ເຮືອນ ເຊິ່ງຖືກເບິ່ງວ່າຈະມາເປັນເຄື່ອງມືສຳຄັນໃນການຄວບຄຸມວິກິດການແຜ່ລະບາດທົ່ວໂລກ.

ກ່ອນໜ້ານີ້, ເມີກ ແອນ ໂຄ ແລະ ຣິດແບັກ ໄອໂອເທຣາພິວຕິກ ໄດ້ຍື່ນຜົນການທົດລອງ ‘ໂມລນູພິຣາເວຍ’ ຢາປິ່ນປົວໂຄວິດ-19 ທີ່ທັງສອງບໍລິສັດຮ່ວມກັນພັດທະນາ ພົບວ່າສາມາດຫລຸດຄວາມສ່ຽງຈາກອາການໜັກ ຫລື ເສຍຊີວິດລົງເຄິ່ງໜຶ່ງໃນຜູ້ຕິດເຊື້ອໂຄວິດທີ່ມີອາການເລັກໜ້ອຍເຖິງປານກາງ ເພື່ອໃຫ້ສຳນັກງານຄະນະກຳມະການອາຫານ ແລະ ຢາອາເມລິກາອະນຸມັດນຳໃຊ້ເປັນກໍລະນີສຸກເສີນ.

ຂະນະດຽວກັນ, ເມີກຍັງໄດ້ລົງນາມຂໍ້ຕົກລົງກັບອົງການສິດທິບັດຢາ (MPP) ເຊິ່ງເປັນໜ່ວຍງານພາຍໃຕ້ອົງການສະຫະປະຊາຊາດ (UN) ເພື່ອເປີດເຜີຍສູດການຜະລິດຢາໂມລນູພິຣາເວຍ ໃຫ້ບໍລິສັດຢາໃນ 150 ປະເທດລາຍໄດ້ຕໍ່າ ແລະ ລາຍໄດ້ປານກາງທົ່ວໂລກ ເຊິ່ງສ່ວນຫລາຍຕັ້ງຢູ່ທະວີບອາຟຣິກາ ແລະ ອາຊີ ຫລັງຈາກຫລາຍຝ່າຍອອກມາສະແດງຄວາມກັງວົນວ່າ: ການທີ່ປະເທດຮັ່ງມີພາກັນສັ່ງຈອງຢາຈະເຮັດໃຫ້ປະເທດລາຍໄດ້ໜ້ອຍບໍ່ມີໂອກາດໃນການເຂົ້າເຖິງຢາ ເຊັ່ນດຽວກັບສະຖານະການທີ່ເຄີຍເກີດຂຶ້ນກັບວັກຊີນ.

ອ້າງອີງ:

https://www.reuters.com/…/pfizer-un-backed-medicines…/

https://www.washingtonpost.com/…/11/05/pfizer-covid-pill/