‘ນິວເດລີ’ ມົນລະພິດທາງອາກາດເພີ່ມຂຶ້ນ ຫລັງປະຊາຊົນລະເມີດຄຳສັ່ງຫ້າມຈູດພຸ ສະເຫລີມສະຫລອງເທດສະການດິວາລີ

ເມືອງຫລວງອິນເດຍຜະເຊີນວິກິດມົນລະພິດທາງອາກາດເຖິງຂັ້ນອັນຕະລາຍ ຫລັງປະຊາຊົນຈູດພຸສະເຫລີມສະຫລອງເທດສະການດິວາລີ ຫລື ເທດສະການແຫ່ງແສງສະຫວ່າງ ລະເມີດຄຳສັ່ງຫ້າມຂອງລັດຖະບານ.

ວັນທີ 6 ພະຈິກ 2021, ສຳນັກຂ່າວຕ່າງປະເທດລາຍງານວ່າ: ຄຸນນະພາບອາກາດໃນນະຄອນຫລວງນິວເດລີຍັງຢູ່ໃນສະຖານະການຮ້າຍແຮງ ມີໝອກຄວັນປົກຄຸມໄປທົ່ວເມືອງ ເຖິງວ່າຜ່ານພົ້ນການສະເຫລີມສະຫລອງເທດສະການດິວາລີ ຫລື ເທດສະການແຫ່ງແສງສະຫວ່າງ ເທດສະການສຳຄັນຂອງຜູ້ນັບຖືສາສະໜາຮິນດູ ເຊິ່ງມັກມີການສະເຫລີມສະຫລອງດ້ວຍການຈູດຕະກຽງ ແລະ ຈູດພຸດອກໄມ້ໄຟ ເປັນສັນຍາລັກຂອງການເລີ່ມຕົ້ນໃໝ່ ໄຊຊະນະຂອງແສງສະຫວ່າງເໜືອຄວາມມືດ ມາແລ້ວເປັນເວລາ 2 ວັນ.

ເຖິງວ່າລັດຖະບານຈະສັ່ງຫ້າມບໍ່ໃຫ້ມີການຈູດພຸໃນນະຄອນຫລວງນິວເດລີ ແລະ ບໍລິເວນອ້ອມຮອບ, ແຕ່ປະຊາຊົນຈຳນວນຫລາຍຍັງຈູດພຸສະເຫລີມສະຫລອງເທດສະການດັ່ງກ່າວຢ່າງຄຶກຄັກ ໂດຍສະເພາະໃນຄໍ່າຄືນຂອງວັນທີ 4 ພະຈິກ ສົ່ງຜົນໃຫ້ມົນລະພິດທາງອາກາດເຂົ້າສູ່ລະດັບອັນຕະລາຍນັບແຕ່ຊ່ວງເວລາດັ່ງກ່າວຕໍ່ເນື່ອງມາເຖິງປັດຈຸບັນ ແລະ ສູງທີ່ສຸດໃນເຊົ້າວັນທີ 5 ພະຈິກ.

ໜັງສືພິມຮິນດູສະຖານທາມຂອງອິນເດຍລະບຸວ່າ: ຄ່າດັດຊະນີຄຸນນະພາບອາກາດ (AQI) ໃນນະຄອນຫລວງນິວເດລີເຊົ້າວັນທີ 6 ພະຈິກ ວັດແທກໂດຍລະບົບການວິໄຈ ແລະ ການພະຍາກອນຄຸນນະພາບອາກາດ (SAFAR) ຢູ່ທີ່ 533 ຖືວ່າຍັງຢູ່ໃນລະດັບທີ່ເປັນອັນຕະລາຍຕໍ່ສຸຂະພາບ. ຂະນະທີ່ຄ່າ AQI ສະເລ່ຍໃນວັນທີ 5 ພະຈິກ ສູງເຖິງ 706 ໄມໂຄຣກຣາມ ໂດຍມີລາຍງານວ່າໃນພື້ນທີ່ບາງຈຸດສູງເຖິງ 999 ເຊິ່ງເປັນຄ່າສູງສຸດທີ່ສາມາດວັດແທກໄດ້.

ນິວເດລີເປັນໜຶ່ງໃນເມືອງຫລວງທີ່ມີຄຸນນະພາບອາກາດຮ້າຍແຮງທີ່ສຸດໃນໂລກ ອັນເປັນຜົນມາຈາກການປ່ອຍມົນລະພິດຈາກໂຮງງານອຸດສາຫະກຳ, ບັນຫາຝຸ່ນຄວັນ, ໄອເສຍລົດຍົນ ແລະ ສະພາບອາກາດຈະຮ້າຍແຮງເປັນພິເສດໃນຊ່ວງລະດູໜາວ ເຊິ່ງເປັນຊ່ວງເວລາທີ່ລົມຕາເວັນຕົກສຽງເໜືອພັດຄວັນໄຟຈາກການຈູດຕໍໄມ້ ເພື່ອປັບໜ້າດິນໃນລັດໃກ້ຄຽງເຊັ່ນ: ລັດປັນຈາບ ແລະ ລັດຫໍຢານາ ພັດເຂົ້າສູ່ເມືອງຫລວງ ບວກກັບເທດສະການແຫ່ງແສງສະຫວ່າງກໍຈັດຂຶ້ນໃນຊ່ວງເວລານີ້ ຍິ່ງເຮັດໃຫ້ສະຖານະການຮ້າຍແຮງອີກ.

ສ່ວນເວັບໄຊເອັນດີທີວີລາຍງານໂດຍອ້າງການເປີດເຜີຍຂອງຜູ້ຊ່ຽວຊານວ່າ: ຄຸນນະພາບອາກາດທີ່ຫລຸດລົງນີ້ສ່ວນໜຶ່ງເປັນຜົນມາຈາກສະພາບອາກາດທີ່ບໍ່ເອື້ອອຳນວຍເຊັ່ນ: ບໍ່ມີລົມ, ອຸນຫະພູມຕໍ່າ ແລະ ຄ່າຄວາມສູງປະສົມ (mixing height) ທີ່ຢູ່ໃນລະດັບຕໍ່າ.

ບັນຫາມົນລະພິດທາງອາກາດຖືເປັນວິກິດທີ່ຂ້າຊີວິດຊາວອິນເດຍນັບລ້ານຄົນໃນແຕ່ລະປີ ໂດຍຂໍ້ມູນໃນລາຍງານຂອງວາລະສານທາງການແພດ Lancet ລະບຸວ່າມີຊາວອິນເດຍເສຍຊີວິດຈາກພະຍາດທາງເດີນຫາຍໃຈເນື່ອງຈາກມົນລະພິດທາງອາກາດປະມານ 1,67 ລ້ານຄົນໃນປີ 2019 ໃນຈຳນວນນັ້ນມີເກືອບ 17.500 ຄົນອາໄສຢູ່ໃນເມືອງຫລວງຂອງປະເທດ.

ອ້າງອີງ:

https://www.dw.com/…/india-new-delhis-air…/a-59728319

https://www.hindustantimes.com/…/as-delhi-chokes-post…

https://www.ndtv.com/…/delhis-air-in-hazardous-category…