ສສຊ ສະເໜີເອົາການພັດທະນາເສດຖະກິດດີຈີຕອນເຂົ້າໃນຫລັກສູດການຮຽນ

ທ່ານ ແດງ ປະທຸມທອງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 18 ແຂວງໄຊສົມບູນ ໄດ້ປະກອບຄຳເຫັນຕໍ່ຮ່າງວິໃສທັດພັດທະນາເສດຖະກິດ-ສັງຄົມດີຈີຕອນແຫ່ງຊາດໄລຍະ 20 ປີ (2021-2040) ຍຸດ​ທະ​ສາດ​ການ​ພັດ​ທະ​ນາ​ເສດ​ຖະ​ກິດ​ດີຈີຕອນ​ແຫ່ງ​ຊາດ​ໄລ​ຍະ 10 ປີ (2021-2030 ) ແລະ​ ແຜນພັດ​ທະ​ນາ​ເສດ​ຖະ​ກິດ​ດີຈີຕອນ​ແຫ່ງ​ຊາດ​ໄລ​ຍະ 5 ປີ ( 2021-2025 ) ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX, ໃນວັນທີ 5 ພະຈິກນີ້, ທີ່ຫໍສະພາແຫ່ງຊາດວ່າ: ຕໍ່ກັບການພັດທະນາເສດຖະກິດດິຈີຕອນແຫ່ງຊາດໃນ 20 ປີ( 2021-2040) ໃນຕໍ່ໜ້າຈະເຮັດໃຫ້ການນໍາໃຊ້ເຕັກໂນໂລດີຈີຕອນຢ່າງກວ້າງຂວາງໃນທົ່ວສັງຄົມ ທັງເປັນເຄື່ອງມືທີ່ສຳຄັນໃນການຂັບເຂື່ອນທຸກຂະແໜງການມີການຂະຫຍາຍຕົວຢ່າງເຂັ້ມແຂງ ແລະ ຍືນຍົງ ສ້າງພື້ນຖານການຜະລິດ ແລະ ການບໍລິການແບບອັດສະລິຍະ, ສ້າງຕົວເມືອງອັດສະລິຍະເຮັດໃຫ້ເສດຖະກິດດີຈີຕອນສ້າງລາຍຮັບໄດ້ເຖິງ 10% ຂອງຈິດີພີ ເພື່ອພັດທະນາຊັບພະຍາກອນມະນຸດໃຫ້ມີຄວາມຊ່ຽວຊານ ແລະ ສາມາດເປັນເຈົ້າເຕັກໂນໂລຊີດີຈີຕອນຢ່າງແທ້ຈິງ, ສ້າງແຮງງານທີ່ມີທັກສະດີຈີຕອນກວມເອົາ 4% ຂອງແຮງງານທັງໝົດ ອັນນັ້ນແມ່ນການເບິ່ງບັນຫາໃນໄລຍະ 20 ປີ ຮອດປີ 2040 ຊຶ່ງໄດ້ກຳນົດ 8 ຍຸດທະສາດໃນໄລຍະ 10 ປີ ແລະ ມີ 14 ແຜນງານໃນໄລຍະ 5 ປີ (2021-2025 ).

ຕໍ່ບັນຫາດັ່ງກ່າວເຫັນຄວນເພີ່ມເຕີມວິໃສທັດກໍຄືຍຸດທະສາດແຜນພັດທະນານີ້ ໂດຍສະເພາະໃນຍຸດທະສາດທີ 4 ນີ້ສຳຄັນຫຼາຍຖ້າຢາກເຮັດດີຈີຕອນຕ້ອງມີຄົນທີ່ເກັ່ງດິຈີຕອນ ຕ້ອງເກັ່ງທັງດີຈີຕອນເກັ່ງທັງເສດຖະ ກິດ ດັ່ງນັ້ນຂໍສະເໜີໃຫ້ເອົາຫຼັກສູດດັ່ງກ່າວເຂົ້າໃນການຮຽນຂັ້ນປະຖົມ, ມັດທະຍົມຂຶ້ນໄປສຳຄັນຢາກໃຫ້ເອົາເຂົ້າໃນຫຼັກສູດການສອນນອກລະບົບໂດຍສະເພາະແມ່ນຊາວໜຸ່ມທີ່ຢູ່ໃນເກນອາຍຸ 15-35 ປີທີ່ບໍ່ໄດ້ຮຽນໃນໂຮງຮຽນສາມັນ ຖ້າບໍ່ເຮັດແນວນີ້ມັນຊິບໍ່ໄດ້ພົນລະເມືອງອັດສະລິຍະ, ອີກຈຸດໜຶ່ງແມ່ນການສ້າງພະນັກງານຢາກໃຫ້ເອົາເຂົ້າໃນມາດຖານການຮັບພະນັກງານໃໝ່ຕ້ອງເກັ່ງທາງດ້ານນີ້ພ້ອມ.

ທ່ານ ສີເຮັງ ຫອມສົມບັດ ສສຊ ເຂດ 14 ແຂວງສາລະວັນ ໄດ້ປະກອບຄຳເຫັນຕໍ່ຮ່າງວິໃສທັດພັດທະນາເສດຖະກິດ-ສັງຄົມ ດີຈີຕອນແຫ່ງຊາດ ໂດຍສະເພາະໃນ 8 ຍຸດທະສາດຂອງລັດຖະບານ ໂດຍຂໍເນັ້ນໃສ່ຍຸດທະສາດທີ 4, ບັນຫານີ້ສຳຄັນຫຼາຍຕໍ່ການລົງທຶນເຂົ້າໃສ່ພື້ນຖານໂຄງລ່າງຂອງເສດຖະກິດດີຈີຕອນຢາກໃຫ້ເນັ້ນໃສ່ໂຮງຮຽນເພື່ອໃຫ້ເປັນລະບົບຄົບຊຸດ ເພາະການທີ່ຈະປະຕິບັດຍຸດທະສາດໃຫ້ມັນສຳເລັດນັ້ນ ສຳຄັນທີ່ສຸດແມ່ນຄົນທີ່ຈະເຮັດ ສະນັ້ນຢາກໃຫ້ເນັ້ນໃສ່ໂຮງຮຽນເພື່ອໃຫ້ໂຮງຮຽນໄດ້ມີໂຄງລ່າງພື້ນຖານນັກຮຽນໄດ້ຮັບອຸປະກອນການຮຽນທີ່ທັນສະໄໝໃຫ້ທ່ວງທັນ, ອີກຈຸດໜຶ່ງ ການສົ່ງເສີມການຮຽນຮູ້ ແລະ ການຝຶກອົບຮົມທັກສະໃນການນໍາໃຊເສດຖະກິດດີຈີຕອນ ຫຼືເຄື່ອງມືດີຈີຕອນທີ່ຈະປະກອບສ່ວນໃນການພັດທະນາເສດຖະກິດ-ສັງຄົມມັນເປັນຄວາມຈຳເປັນພາຫວະວິໃສແທ້ໆ ເຖິງວ່າພວກເຮົາຊິມາຊ້າແຕ່ຂໍໃຫ້ສຸມໃສ່ປະຊາຊົນ, ພະນັງານເຮົາໃຫ້ມີຄວາມຮູ້ໃນລະດັບທີ່ແນ່ນອນ ຈຶ່ງສາມາດຂັບເຂື່ອນເສດຖະກິດໄປໄດ້ ພາຍຫຼັງທີ່ໄດ້ນໍາໃຊ້ໂທລະສັບໃນປີ 2000 ຖືໄດ້ວ່າເປັນເວລາ 20 ປີ ແລະ ໃນປີຜ່ານມາໄດ້ມີການສຳຫຼວດເກືອບ 70% ຂອງຜູ້ຊົມໃຊ້ໃນທົ່ວແຂວງແມ່ນໄດ້ນໍາໃຊ້ໄປໂທລະສັບເຂົ້າສູ່ການບັນເທິງເທົ່ານັ້ນ ບໍໄດ້ນໍາໃຊ້ເຂົ້າໃນການສ້າງສາພັດທະນາເສດຖະກິດພໍເທົ່າໃດ, ພັດທະນາພຽງ 5% ສ່ວນຜູ້ຈະນໍາໄປໃຊ້ເຂົ້າໃນການພັດທະນາເສດຖະກິດມີໜ້ອຍ ສຳຄັນທີ່ສຸດເຮົາຕ້ອງສ້າງຄົນຮຸ່ນໜຸ່ມໃຫ້ມີຄວາມຮູ້ພື້ນຖານໃນດ້ານນີ້ເພື່ອຂັບເຂື່ອນທາງດ້ານເສດຖະກິດໄດ້ ສະນັ້ນ, ຕໍ່ໄປນີ້ພວກເຮົາຕ້ອງຍົກລະດັບຊາວໜຸ່ມ ຄົນຮຸ້ນໜຸ່ມໃຫ້ມີຄວາມຮູ້ດ້ານນີ້ເພື່ອຂັບເຂື່ອນເສດຖະກິດໃຫ້ເຂົ້າສູ່ຍຸກພັດທະນາຢ່າງແທ້ຈິງ.