ຈຳນວນຜູ້ເສຍຊີວິດຈາກໂຄວິດທົ່ວໂລກ ຄົບ 5 ລ້ານຄົນແລ້ວ
ທົ່ວໂລກລາຍງານຈຳນວນຜູ້ເສຍຊີວິດຈາກພະຍາດໂຄວິດ-19 ຄົບ 5 ລ້ານຄົນ ພາບລວມຊ້າລົງຈາກກ່ອນໜ້ານີ້.
ວັນທີ 1 ພະຈິກ 2021, ສຳນັກຂ່າວບລູມເບິກ (Bloomberg) ລາຍງານວ່າ: ຈຳນວນຜູ້ເສຍຊີວິດສະສົມຈາກພະຍາດໂຄວິດ-19 ທົ່ວໂລກໄດ້ຜ່ານຫລັກ 5 ລ້ານຄົນເປັນທີ່ຮຽບຮ້ອຍແລ້ວ ພາຍໃນໄລຍະເວລາບໍ່ເຖິງ 2 ປີຫລັງຈາກເລີ່ມລະບາດ.
ການມາເຖິງຂອງວັກຊີນຊ່ວຍໃຫ້ຕົວເລກຜູ້ເສຍຊີວິດຊ້າລົງຢ່າງຊັດເຈນ ໂດຍໃຊ້ເວລາກວ່າ 110 ວັນຈາກຫລັກ 4 ລ້ານມາເຖິງ 5 ລ້ານຄົນ. ຂະນະທີ່ຊ່ວງກ່ອນໜ້ານີ້ຈາກ 2 ລ້ານເຖິງ 3 ລ້ານຄົນ ແລະ 3 ລ້ານເຖິງ 4 ລ້ານຄົນ ໃຊ້ເວລາບໍ່ເຖິງ 90 ວັນ.
ເຖິງຢ່າງໃດກໍຕາມ, ປັດຈຸບັນຍັງມີຜູ້ເສຍຊີວິດຈາກພະຍາດນີ້ຫລາຍພັນຄົນຕໍ່ວັນ ແລະ ຍັງມີຄົນອີກນັບພັນລ້ານທີ່ຍັງບໍ່ໄດ້ຮັບການສັກວັກຊີນ ເຊິ່ງມີທັງຜູ້ທີ່ບໍ່ສາມາດເຂົ້າເຖິງວັກຊີນໄດ້ ແລະ ຜູ້ທີ່ປະຕິເສດວັກຊີນ ເຮັດໃຫ້ພວກເຂົາຍັງມີຄວາມສ່ຽງຖ້າໄດ້ຮັບເຊື້ອ.
ໂດຍອັດຕາສ່ວນຂອງຜູ້ເສຍຊີວິດ 5 ອັນດັບທຳອິດ ແຍກຕາມແຕ່ລະປະເທດມີດັ່ງນີ້: ອາເມລິກາ 14%, ຣັດເຊຍ 10%, ອິນໂດເນເຊຍ 8%, ບຣາຊິວ 8% ແລະ ເມັກຊິໂກ 5%. ສ່ວນປະເທດອື່ນໆມີອັດຕາສ່ວນລວມກັນ 55%.
ຕອນນີ້ຫລາຍປະເທດເລີ່ມມີການເປີດດ້ານການເດີນທາງຫລາຍຂຶ້ນ ເຊິ່ງຈະເປັນການທົດລອງຂອງພູມຕ້ານທານທີ່ໄດ້ຮັບຈາກວັກຊີນ ວ່າຕໍ່ຈາກນີ້ຈະມີອັດຕາການເສຍຊີວິດເພີ່ມຂຶ້ນ ຫລື ບໍ່ ຈາກການທີ່ມະນຸດເລີ່ມພະຍາຍາມຈະກັບມາໃຊ້ຊີວິດຕາມປົກກະຕິ.
ອ້າງອີງ:
https://www.bloomberg.com/…/covid-deaths-top-5-million…
