ຈີນຈະກາຍເປັນທີ 1 ດ້ານ ປູກຖ່າຍອະໄວຍະວະໃນອີກ 3 ປີ
ທ່ານ ຫວງ ເຈຍຟູ ອະດີດຮອງລັດຖະມົນຕີກະຊວງສາທາລະນະສຸກຈີນ ເປີດເຜີຍວ່າ: ຈີນຈະກາຍເປັນປະເທດຜູ້ນຳດ້ານການປູກຖ່າຍອະໄວຍະວະອັນດັບ 1 ຂອງໂລກ ແຊງອາເມລິກາພາຍໃນປີ 2020.
ປັດຈຸບັນ ອາເມລິກາຍັງເປັນຜູ້ນຳດ້ານການປູກຖ່າຍອະໄວຍະວະ ໂດຍໃນແຕ່ລະປີ ອາເມລິກາປູກຖ່າຍອະໄວຍະວະໃຫ້ຄົນເຈັບປະມານ 28.000 ຄົນ, ແຕ່ທ່ານ ຫວງ ກ່າວວ່າ: ຈຳນວນຜູ້ເຂົ້າຮັບການປູກຖ່າຍອະໄວຍະວະຢູ່ຈີນພວມເພີ່ມຂຶ້ນຢ່າງວ່ອງໄວ ແລະ ຄາດວ່າ: ຈະແຊງອາເມລິກາພາຍໃນປີ 2020 ໂດຍໃນປີນີ້ ຈີນຈະມີການປູກຖ່າຍອະໄວຍະວະໃຫ້ຄົນເຈັບຈຳນວນ 15.000 ຄົນ.
ທ່ານ ຫວງ ກ່າວອີກວ່າ: ນັບແຕ່ມີການຫ້າມນຳເອົາອະໄວຍະວະຈາກນັກໂທດທີ່ຖືກຕັດສິນປະຫານຊີວິດມາໃຊ້ໃນການປູກຖ່າຍໃນປີ 2015, ຈີນຍັງດຳເນີນການຕາມມາດຕະການດັ່ງກ່າວ ແຕ່ກໍມີກະແສຮຽກຮ້ອງຈາກພາຍນອກຂໍໃຫ້ຈີນຍອມອະນຸຍາດໃຫ້ມີການກວດສອບຢ່າງອິດສະລະ ເພື່ອໃຫ້ເກີດຄວາມໝັ້ນໃຈວ່າ: ຈີນບໍ່ມີການໃຊ້ອະໄວຍະວະຈາກນັກໂທດແທ້.
