ຍ້ອນການແພ່ລະບາດພະຍາດໂຄວິດ-19 ເຮັດໃຫ້ເສດຖະກິດຂອງ ສປປ ລາວ ໃນປີ 2021 ຄາດວ່າຈະບັນລຸພຽງ 3%

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ 9 ເດືອນ ແລະ ວຽກງານຈຸດສຸມ 3 ເດືອນທ້າຍປີ 2021 ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ທີ່ໄຂຂຶ້ນໃນມື້ທໍາອິດຢູ່ສະພາແຫ່ງຊາດ ໃນວັນທີ 1 ພະຈິກ 2021, ໂດຍຍົກໃຫ້ເຫັນວ່າ: ການປະຕິບັດແຜນພັດທະນາເສດຖະກິດ-ສັງຄົມຢູ່ ສປປ ລາວເຮົາໝົດປີ 2021 ນີ້ ແມ່ນຈະບໍ່ສາມາດບັນລຸຕາມຕົວເລກການເຕີບໂຕຂອງ GDP ທີ່ມະຕິສະພາແຫ່ງຊາດຮັບຮອງໃນລະດັບ 4% ຂຶ້ນໄປ, ຄາດວ່າຈະບັນລຸພຽງ 3% ເທົ່ານັ້ນ ແລະ GDP ມູນຄ່າຕາມລາຄາປັດ ຈຸບັນເທົ່າກັບ 180.243 ຕື້ກີບ (ມະຕິສະພາ 182.603 ຕື້ກີບ) ແລະ ສະເລ່ຍ ຕໍ່ຫົວຄົນເທົ່າກັບ 2.649 ໂດລາສະຫະລັດ.

ທ່ານ ລັດຖະມົນຕີກະຊວງແຜນການ ແລະ ການລົງທຶນ ອະທິບາຍວ່າ: ປີ 2021 ນີ້, ຂະແໜງກະສິກໍາ ເພີ່ມຂຶ້ນ 2,5%, ອຸດສາຫະກໍາ ເພີ່ມຂຶ້ນ 4,9%, ການບໍລິການ ເພີ່ມຂຶ້ນ 1,2% ແລະ ພາສີ-ອາກອນ ເພີ່ມຂຶ້ນ 2,8%. ຂະນະທີ່ຂະແໜງການທີ່ຈະເປັນທ່າແຮງຊ່ວຍຂັບເຄື່ອນລະບົບເສດຖະກິດມະຫາພາກໃຫ້ສືບຕໍ່ຂະຫຍາຍຕົວຈະເປັນປະເພດການກໍ່ສ້າງ, ການສື່ສານ, ບໍ່ແຮ່, ສ້ອມແປງພາຫະນະ, ການຂາຍຍົກ-ຂາຍຍ່ອຍ, ບໍລິການການເງິນ, ປະກັນໄພ, ລະບົບຮັກສາສຸ ຂະພາບ ແລະ ໄຟຟ້າ. ສ່ວນຂະແໜງທີ່ກະທົບຕໍ່ລະບົບເສດຖະກິດ ເຮັດໃຫ້ບໍ່ບັນລຸແຜນແມ່ນຂົງເຂດບໍລິການ ເປັນຕົ້ນ: ຮ້ານອາຫານ, ໂຮງແຮມ ແລະ ຂົນສົ່ງ. ແນວໃດກໍຕາມ, ການຂົນສົ່ງໂດຍສານຄາດວ່າຈະກັບຄືນ ມາດີຂຶ້ນ ໃນໄຕມາດ 4 ຍ້ອນມີການເປີດທາງລົດໄຟລາວ-ຈີນ ໃນທ້າຍປີນີ້.

ໃນໄລຍະ 9 ເດືອນຜ່ານມາ, ສໍາລັບ ມູນຄ່າການສົ່ງອອກບັນລຸໄດ້ 5.611 ລ້ານໂດລາສະຫະລັດ ເທົ່າກັບ 85% (ມະຕິ ສະພາ 6.582 ກວ່າລ້ານໂດລາສະຫະລັດ) ແລະ ມູນຄ່າການນໍາເຂົ້າບັນລຸໄດ້ 4.452 ລ້ານໂດລາສະຫະລັດ ເທົ່າກັບ 69,7% (ມະຕິສະພາ 6.384 ກວ່າ ລ້ານໂດລາສະຫະລັດ) ໝາຍວ່າເກີນດຸນປະມານ 1.160 ລ້ານໂດລາສະຫະລັດ.  ສ່ວນການລົງທຶນຂອງລັດໃນ 9 ເດືອນນີ້ ແມ່ນໄດ້ສະເໜີການເບີກຈ່າຍ ທັງໝົດ 5.047 ໂຄງການ, ລວມມີມູນຄ່າ 2.176,62 ຕື້ກີບ ເທົ່າກັບ 56% ຂອງແຜນການ (ມະຕິສະພາ 3.900 ຕື້ກີບ) ແລະ ໄດ້ເບີກຈ່າຍຕົວຈິງຜ່ານລະບົບຄັງເງິນກະຊວງການເງິນ ລວມມີມູນຄ່າທັງໝົດ 1.378,76 ຕື້ກີບ ເທົ່າກັບ 35,35% ຂອງແຜນການ.

ພ້ອມນີ້, ທ່ານລັດຖະມົນຕີກະຊວງແຜນການ ແລະ ການລົງທຶນ ກ່າວຕື່ມວ່າ: ສາເຫດທີ່ພາໃຫ້ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຢູ່ປະເທດເຮົາບໍ່ບັນລຸຄາດໝາຍໃນປີນີ້ ຕົ້ນຕໍກໍຍັງແມ່ນມາຈາກສະພາບການລະບາດຂອງພະຍາດໂຄວິດ-19 ທີ່ສົ່ງຜົນກະທົບທັງທາງກົງ ແລະ ທາງອ້ອມຢ່າງຫລີກລ່ຽງບໍ່ໄດ້, ສົມທົບກັບຄວາມ ຫຍຸ້ງຍາກທາງດ້ານການເງິນ-ເງິນຕາ, ບັນຫາໜີ້ສິນສາທາລະນະ, ຄວາມສ່ຽງເກີດໄພພິບັດທາງທໍາມະຊາດ, ການລະບາດຂອງພະຍາດຕາມລະດູການ ແລະ ບັນຫາອື່ນໆ.