ອາເມລິກາອອກພາສປອດຫົວທຳອິດທີ່ອະນຸຍາດໃຫ້ລະບຸເພດ X ໄດ້ ເພື່ອໂອບຮັບຄວາມຫລາກຫລາຍທາງເພດໃນສັງຄົມ
ວັນທີ 27 ຕຸລາ 2021: ທາງການອາເມລິກາໄດ້ອອກພາສປອດຫົວທຳອິດທີ່ອະນຸຍາດໃຫ້ລະບຸເພດ x ໄດ້ ເພີ່ມຕື່ມຈາກເພດຊາຍ (M) ຫລື ເພດຍິງ (F) ເພື່ອໂອບຮັບຄວາມຫລາກຫລາຍທາງເພດໃນສັງຄົມ ລວມທັງເປີດພື້ນທີ່ໃຫ້ພົນລະເມືອງອາເມລິກາກຸ່ມ LGBTQ+ ໂດຍສະເພາະເປັນ Non-Binary, Intersex ລວມທັງ Gender Non-Conforming ເພດອື່ນໆທີ່ບໍ່ໄດ້ຢູ່ໃນຂອບພຽງເພດຊາຍ ແລະ ເພດຍິງ ໃຫ້ສາມາດລະບຸຕົວຕົນທີ່ສອດຄ່ອງກັບຄວາມເປັນຈິງໄດ້ຍິ່ງຂຶ້ນໃນເອກະສານສຳຄັນ.
ທ່ານ ເນັດ ໄພຣ ໂຄສົກກະຊວງການຕ່າງປະເທດ ໂພສຂໍ້ຄວາມລະບຸວ່າ: ກະຊວງການຕ່າງປະເທດອາເມລິກາຈະຍັງເດີນໜ້າເຮັດຕາມຄຳໝັ້ນທີ່ເຄີຍໃຫ້ໄວ້ວ່າຈະສະໜັບສະໜູນສິດເສລີພາບ, ການມີສັກສີ ແລະ ເທົ່າທຽມກັນຂອງຄົນທຸກຄົນ ລວມທັງພົນລະເມືອງອາເມລິກາທີ່ເປັນ LGBTQ+.
ທ່ານ ແອນໂທນີ ບລິງເຄນ ລັດຖະມົນຕີຕ່າງປະເທດອາເມລິກາ ເຜີຍເຖິງທ່າອ່ຽງທີ່ຈະອະນຸຍາດໃຫ້ພົນລະເມືອງອາເມລິກາສາມາດລະບຸເພດ x ໃນພາສປອດໄດ້ ນັບແຕ່ເດືອນມິຖຸນາຜ່ານມາ ແລະ ຄາດວ່າຈະເລີ່ມອະນຸຍາດໃຊ້ໄດ້ຊ່ວງຕົ້ນປີໜ້າ ໂດຍໃນຫລາຍໆລັດເຊັ່ນ: ລັດນິວຢອກ ໄດ້ເລີ່ມທະຍອຍອະນຸຍາດໃຫ້ພົນລະເມືອງພາຍໃນລັດລະບຸເພດ x ໄດ້ໃນໃບຂັບຂີ່ ແລະ ບັດປະຈຳຕົວ ລວມທັງເອກະສານລັດຖະການອື່ນໆໄດ້ແລ້ວ.
ຂະນະທີ່ນາງ ເຈສສິກາ ສະເຕິນ ຜູ້ແທນພິເສດດ້ານສິດທິ LGBTQ+ ພາຍໃຕ້ລັດຖະບານຂອງປະທານາທິບໍດີ ໂຈ ໄບເດນ ລະບຸວ່າ: ນີ້ຖືເປັນກ້າວສຳຄັນຂອງປະຫວັດສາດທີ່ເອກະສານສຳຄັນຕ່າງໆ ຈະຢຶດໂຍງ ແລະ ສອດຄ່ອງກັບຄວາມເປັນຈິງ ສະທ້ອນສະເປກຕຳຂອງອັກຄະລັກທາງເພດ ແລະ ຕົວຕົນຂອງມະນຸດທີ່ແຕກຕ່າງກັນ.
ໂດຍອາເມລິກາເປັນອີກໜຶ່ງປະເທດທີ່ອະນຸຍາດໃຫ້ລະບຸເພດທີ່ກວ້າງຂຶ້ນໄດ້ ນອກເໜືອຈາກເພດຊາຍ ແລະ ເພດຍິງ ເຊິ່ງກ່ອນໜ້ານີ້ຫລາຍປະເທດໄດ້ເລີ່ມອະນຸຍາດໃຫ້ລະບຸເພດ x ໃນພາສປອດໄດ້ແລ້ວ ແຕ່ອາດມີເງື່ອນໄຂແຕກຕ່າງກັນເຊັ່ນ: ການາດາ, ອົດສະຕຣາລີ, ນິວຊີແລນ, ເຢຍລະມັນ, ອິນເດຍ ແລະ ເນປານ.
ອ້າງອີງ:
- https://www.aljazeera.com/news/2021/10/27/us-issues-first-passport-with-x-for-gender
- https://www.npr.org/2021/10/27/1049690803/state-department-first-passport-with-nonbinary-gender-x-option
- https://www.reuters.com/world/us/us-issues-first-passport-with-x-gender-marker-2021-10-27/
