ດ່ານກວດກາເມືອງປາກງື່ມ ກວດພົບການເຄື່ອນຍ້າຍແຮ່ທາດຄ້າຍຄືຫີນ 1.492 ກິໂລ
ວັນທີ 25 ຕຸລາ 2021 ຜ່ານມາ, ເວລາປະມານ 00:10 ໂມງ ເຈົ້າໜ້າທີ່ປະຈໍາດ່ານກວດກາເມືອງປາກງື່ມ ໄດ້ສະກັດ ລົດ landcruiser ໝາຍເລກທະບຽນ ກກ 2499 ກໍາແພງນະຄອນ ເພື່ອທໍາການກວດກາ ແຕ່ ລົດຄັນດັ່ງກ່າວບໍ່ຢຸດໃຫ້ກວດ ແລະ ແລ່ນຜ່າດ່ານໜີການກວດກາ 3 ແຍກ ທົງເມັກ ຈຸດເຂົ້າ-ອອກເມືອງ ບໍ່ໃຫ້ຄວາມຮ່ວມມືກັບເຈົ້າໜ້າທີ່, ສນ 1191 ເມືອງປາກງື່ມ ຈຶ່ງຂັບຂີ່ລົດນໍາຈົນໄລ່ທັນ ຢູ່ເຂດບ້ານໄຮ່ ເມືອງປາກງື່ມ ຫ່າງຈາກຈຸດກວດກາ ປະມານ 3-4 ກິໂລແມັດ, ເຈົ້າໜ້າທີ່ ຈຶ່ງໄດ້ຂໍກວດຄົ້ນລົດ ພົບເຫັນ ແຮ່ທາດຄ້າຍຄືຫີນ ຈຳນວນ 24 ເປົາ, ນໍ້າໜັກ 1.492 ກິໂລ, ບໍ່ມີເອກະສານເຄື່ອນຍ້າຍ ຈຶ່ງນໍາຕົວມາສອບສວນ.
ຜ່ານການສອບສວນເບື້ອງຕົ້ນ ຮູ້ໄດ້ວ່າ: ຜູ້ຂັບຂີ່ລົດ ຊື່ ທ້າວ ເພັດປະເສີດ ອາຍຸ 35 ປີ, ຄ້າຂາຍ ຢູ່ບ້ານຫ້ວຍຫົງ ເມືອງຈັນທະບູລີ ນວ ເປັນຄົນຂົນສົ່ງຮັບຈ້າງ ໃຫ້ຂົນສົ່ງແຮ່ທາດສີຂຽວ-ເຫລືອງ ຈຳນວນ 24 ເປົາແທ້ເພື່ອນໍາສົ່ງໃຫ້ໝູ່ ຢູ່ເຂດບ້ານທ່າພະບາດ ເມືອງບໍລິຄັນ ແຂວງບໍລິຄໍາໄຊ ໄດ້ຮັບຄ່າຈ້າງ 1,000,000 ກີບຕໍ່ຖ້ຽວ. ປັດຈຸບັນເຈົ້າໜ້າທີ່ກໍາລັງສືບສວນ-ສອບສວນ ຕາມຂັ້ນຕອນຕໍ່ໄປ.
