ທ້າຍຝົນຕົ້ນໜາວ ຈົ່ງພ້ອມກັນຕ້ານພະຍາດໂຄວິດ-19

ຫລັງຈາກອອກພັນສາໄປແລ້ວ ພວກເຮົາກໍຈະກ້າວເຂົ້າສູ່ລະດູໜາວ ແຕ່ກໍໜ້າເສຍດາຍ ບຸນອອກພັນສາປີນີ້ ສະເພາະຢູ່ນະຄອນຫລວງວຽງຈັນ ແລະ ບັນດາເຂດແຂວງທີ່ມີການລະບາດຂອງພະຍາດໂຄວິດ-19 ທາງການເພິ່ນຫ້າມເຄື່ອນໄຫວກິດຈະກຳທາງສາສະໜາ ແລະ ປະເພນີທາງວັດທະນະທຳເຊັ່ນ: ຫ້າມໄປວັດຕັກບາດທີ່ມີຄົນຈຳນວນຫລວງຫລາຍແອອັດຍັດແຍ່ກັນ ອັນຈະເປັນທີ່ມາໃນການແຜ່ລະບາດພະຍາດໂຄວິດ-19. ນອກນັ້ນ ກໍໂຈະກິດຈະກຳການໄຫລເຮືອໄຟ, ລອຍກະໂທງ, ໂຈະການແຂ່ງຂັນຊ່ວງເຮືອ ຫລື ກິດຈະກຳອື່ນໆທີ່ກ່ຽວຂ້ອງກັບປະເພນີບຸນອອກພັນສາ ອັນສາເຫດຕົ້ນຕໍກໍຍ້ອນວ່າ ເພື່ອຕ້ານ ແລະ ສະກັດກັ້ນບໍ່ໃຫ້ເຊື້ອພະຍາດໂຄວິດ-19 ແຜ່ລະບາດໃນຊຸມຊົນແບບເປັນວົງກວ້າງ.

ແຕ່ແນວໃດກໍຕາມ, ສຳລັບທ້ອງຖິ່ນໃດທີ່ບໍ່ມີການລະບາດນັ້ນກໍສາມາດຈັດກິດຈະກຳໄດ້ ແຕ່ຕ້ອງໄດ້ປະຕິບັດຕາມມາດຕະການຂອງຄະນະສະເພາະກິດວາງອອກຢ່າງເຄັ່ງຂັດ ເພາະວ່າສະພາບການແຜ່ລະບາດຂອງພະຍາດໂຄວິດ-19 ໃນຊຸມຊົນຢູ່ປະເທດເຮົາໃນປັດຈຸບັນຖືວ່າຍັງຢູ່ໃນລະດັບສູງ ແລະ ມີຂຶ້ນມີລົງໃນແຕ່ລະວັນ.

ກໍດັ່ງພວກເຮົາໄດ້ຮັບຮູ້ນຳກັນແລ້ວວ່າ, ເຊື້ອພະຍາດໂຄວິດ-19 ເປັນເຊື້ອໄວຣັສທີ່ມັກຄວາມໜາວເຢັນ ແລະ ມັນສາມາດຢູ່ໄດ້ດົນກວ່າອາກາດຮ້ອນເອົ້າ. ສະນັ້ນ ຊ່ວງຍາມໜາວ ພວກເຮົາຍິ່ງຕ້ອງລະມັດລະວັງ. ນອກຈາກຫາວິທີປ້ອງກັນຕ້ານໂຄວິດ-19 ແລ້ວ ອາດຈະຍັງມີພະຍາດຊະນິດອື່ນໆຕາມມາເຊັ່ນ: ໄຂ້ຫວັດ, ໄຂ້ຍຸງ ແລະ ໂຣກລະບາດຕາມລະດູການ. ໃນຊ່ວງລະດູໜາວນີ້ ເພື່ອໃຫ້ທຸກຄົນຢູ່ລອດປອດໄພ ບໍ່ໃຫ້ໂຣກຮ້າຍຕ່າງໆເຂົ້າມາທຳລາຍຊີິວິດອິນຊີ ແລະ ລະບົບເສດຖະກິດ-ສັງຄົມຂອງປະເທດ ຍິ່ງກວ່າເວລາໃດໝົດພວກເຮົາຕ້ອງຮ່ວມແຮງຮ່ວມໃຈສາມັກຄີຕີຕ້ານພະຍາດໂຄວິດ-19 ໃຫ້ໝົດໄປຈາກເມືອງລາວຢ່າງຊິ້ນເຊີງ.

ອີກບໍ່ນານເກີນລໍ ສາຍທາງລົດໄຟຄວາມໄວສູງ ລາວ-ຈີນ ກໍຈະໄດ້ເລີ່ມເປີດຮັບໃຊ້ບໍລິການມວນຊົນ ໃນໂອກາດວັນທີ 2 ທັນວາທີ່ຈະມາເຖິງ. ຖ້າຫາກໂຄວິດ-19 ໝົດໄປຈາກເມືອງລາວ ການທ່ອງທ່ຽວໄປມາຄ້າຂາຍທຸກຢ່າງກໍສະດວກສະບາຍ, ບ້ານເມືອງມີຄວາມສະຫງົບຮົ່ມເຢັນ ເສດຖະກິດເຟື້ອງຟູ ອະນາຄົດຄົນລາວຊາດລາວຕ້ອງຢູ່ເຢັນເປັນສຸກ ຮັ່ງມີອີ່ມໜຳສຳລານ.

ແຕ່ກົງກັນຂ້າມ, ຖ້າຫາກຍັງພາກັນລະເຫລີງຕໍ່ມາດຕະການຕ້ານໂຄວິດ-19 ດ້ວຍການຊຸມແຊວ, ຫາເລາະບ້ານໃຕ້ໃສ່ບ້ານເໜືອ, ຫ້າມເທົ່າໃດກໍບໍ່ຟັງ ດັ່ງເຈົ້າໜ້າທີ່ໄປຫາເລາະກວາດລ້າງຕາມໂຮງແຮມ, ຕາມຫ້ອງແຖວຂຶ້ນລົດແຕ່ລະມື້ ມີລົດໄຟຄວາມໄວສູງຄັນງາມໆປານໃດກໍບໍ່ໄດ້ຂີ່ ຍ້ອນໂຄວິດ-19 ເປັນເຫດພາກັນຕິດເຊື້ອແຜ່ລະບາດໃນຕູ້ລົດໄຟຊ້ຳຕື່ມກໍຢ່າຫວັງວ່າຈະມີຄວາມສຸກຕາມທິດກໍ່າວ່າ.