“ລີ ກວນ ຢູ” ຜູ້ນໍາທີ່ປະສົບຄວາມສໍາເລັດທີ່ສຸດໃນໂລກ

ອະດີດນາຍົກສິງກະໂປ ລີ ກວນ ຢູ ເຖິງແກ່ມໍລະນະກໍາແລ້ວໃນວັນທີ 23 ກໍລະກົດຜ່ານມາ ລວມອາຍຸ​ໄດ້ 91 ປີ. ລີ ກວນ ຢູ ປົກຄອງສິງກະໂປໃນລະຫວ່າງປີ 1959-1990 ລວມ 31 ປີ ແລະ ຍັງເປັນເສົາຫຼັກທາງການເມືອງຂອງສິງກະໂປເຖິງປັດຈຸບັນ.

ລີ ກວນ ຢູ ຫຼື ແຮຣີ່ ເປັນຊາວສິງກະໂປລຸ້ນທີ 4 ບັນພະບູລຸດອົບພະຍົບມາຈາກມົນທົນກວາງຕຸ້ງຂອງຈີນ ເມື່ອປະມານ 160 ປີກ່ອນ, ທ່ານສຶກສາດ້ານເສດຖະສາດທີ່ປະເທດອັັງກິດ ໃນ​ໄລຍະຫຼັງສົງຄາມໂລກຄັ້ງທີ 2 ແລະ ໄດ້ຮັບປະລິນຍາດ້ານກົດໝາຍຈາກມະຫາວິທະຍາໄລ Cambridge.

ລີ ກວນ ຢູ ເລີ່ມຕົ້ນເສັ້ນທາງການເມືອງໃນປີ 1954 ດ້ວຍການກໍ່ຕັ້ງ People’s Action Party ຫຼື PAP ແລະ ໄດ້ຮັບເລືອກເປັນຜູ້ນໍາຝ່າຍຄ້ານໃນສະພາໃນອີກ 1 ປີຕໍ່ມາ. ໃນປີ 1959 ພັກ PAP ຊະນະເລືອກຕັ້ງໄດ້ເປັນຝ່າຍຈັດຕັ້ງລັດຖະບານ ແລະ ລີ ກວນ ຢູ ໄດ້ດໍາລົງຕໍາແໜ່ງນາຍົກຄົນທໍາອິດຂອງສິງກະໂປ ຕໍ່ເນື່ອງມາຈົນເຖິງປີ 1990 ລວມເວລາໄດ້ 31 ປີ ທີ່ທ່ານຢູ່ໃນຕໍາແໜ່ງ. ສາສະດາຈານ Carl Thayer ແຫ່ງ University of New South Wales ໃນອົດ​ສະຕຣາລີ ກ່າວວ່າ: ທ່ານ ລີ ກວນ ຢູ ຄືຜູ້ນໍາທີ່ຜັກດັນໃຫ້ສິງກະໂປກ້າວຂຶ້ນມາເປັນປະເທດສໍາຄັນທາງດ້ານເສດຖະກິດຂອງທະວີບອາຊີ, ເລື່ອງລາວຜົນສໍາເລັດຂອງສິງກະໂປຍຸກໃຫມ່ ແຍກບໍ່ອອກກັບເລື່ອງລາວຂອງທ່ານ ລີ ກວນ ຢູ, ທ່ານຄືຜູ້ຜັກດັນສິງກະໂປຈາກເມືອງຂຶ້ນຂອງອັງກິດ ກາຍເປັນປະເທດທີ່ມີອິດສະຫຼະພາບ ແລະ ຍັງປົກປ້ອງຄວາມທ້າທາຍຈາກລັດທິສັງຄົມນິຍົມ.

ເປົ້າໝາຍຫຼັກຂອງ ລີ ກວນ ຢູ ໃນ​ໄລຍະທໍາອິດ ຄືການດຶງສິງກະໂປເຂົ້າເປັນສ່ວນໜຶ່ງຂອງສະຫະພັນຣັດມາເລເຊຍ, ແຕ່ຕໍ່ມາເກີດຄວາມຂັດແຍ່ງລະຫວ່າງທ່ານກັບນາຍົກມາເລເຊຍ ໃນຂະນະນັ້ນຄືທ່ານ ອັບດຸລ ຣາມັນ ໃນ​ໄລຍະຫຼັງຄວາມວຸ້ນວາຍທາງເຊື້ອຊາດລະຫວ່າງຊາວຈີນກັບຊາວມຸດສະລິມໃນມາເລເຊຍ ໃນປີ 1964-1965 ຈົນກະທັ້ງ ໃນວັນທີ 9 ສິງຫາ 1966 ທ່ານ ອັບດຸລ ຣາມັນ ​ໄດ້ຂໍໃຫ້ມີການແຍກປະເທດສ້າງຄວາມສັບສົນວຸ້ນວາຍໃຫ້ກັບທ່ານ ລີ ກວນ ຢູ ເພາະຕະຫຼອດຊີວິດທີ່ຜ່ານມາ ທ່ານ ລີ ກວນ ຢູ ເຊື່ອໃນເອກະພາບລະຫວ່າງສິງກະໂປກັບມາເລເຊຍ ທັ້ງດ້ານພູມສາດ ແລະ ປະຫວັດສາດ.

ໃນໄວ 42 ປີ ລີ ກວນ ຢູ ຄືຜູ້ນໍາພຽງຄົນດຽວຂອງສິງກະໂປ ເປົ້າໝາຍຫຼັກຄືການຜັກດັນໃຫ້ສິງກະໂປເປັນປະເທດເສດຖະກິດຊັ້ນນໍາ ໂດຍມີຊີວິດປະຊາຊົນຫຼາຍລ້ານຄົນເປັນເດີມພັນ. ນັກວິເຄາະເຊື່ອວ່າ: ຄວາມເຂັ້ມແຂງ ແລະ ຄວາມເປັນນັກຄິດ, ນັກວາງແຜນຂອງ ລີ ກວນ ຢູ ຄືຕົ້ນແບບໃຫ້ກັບຊາວສິງກະໂປທົ່ວປະເທດ ເຮັດໃຫ້ສິງກະໂປສາມາດສ້າງຊັບພະຍາກອນທີ່ມີຄ່າຫຼາຍທີ່ສຸດໄດ້ ນັ້ນຄືມະນຸດ.

ເສດຖະກິດສິງກະໂປ ພາຍໃຕ້ການນໍາຂອງນາຍົກ ລີ ກວນ ຢູ ເຕີບໃຫຍ່ຢ່າງວ່ອງໄວ, ຕົວເລກຈີດີພີເພີ່ມຂຶ້ນເກືອບ 10% ຕິດຕໍ່ກັນກວ່າ 10 ປີ. ນາຍົກ ລີ ກວນ ຢູ ຍັງມີສ່ວນສໍາຄັນໃນການຈໍາກັດຄວາມຮູບແບບການພັດທະນາທີ່ຫຼາຍປະເທດນໍາໄປຮັບໃຊ້ ຈົນກາຍເປັນ 4 ເສືອອາຊີ ປະກອບມີ ຮົງກົງ, ໄຕ້ຫວັນ, ສ.ເກົາຫຼີ ແລະສິງກະໂປ.

ນັກລຸງທຶນທົ່ວໂລກຕ່າງກໍມຸ່ງໜ້າໄປສິງກະໂປ ເຮັດໃຫ້ສິງກະໂປກາຍເປັນສູນກາງນໍ້າມັນ, ການຄົມມະນາຄົມຂົນສົ່ງ ແລະ ການເງິນຂອງອາຊີ.

Michael Barr ນັກວິເຄາະການເມືອງ ທີ່ມະຫາວິທະຍາໄລ Flinders ໃນອົດສະຕຣາລີ ກ່າວວ່າ: ລີ ກວນ ຢູ ໄດ້ຮວບຮວມກຸ່ມຄົນຜູ້ມີຄວາມສາມາດ ເພື່ອຊ່ວຍກັນວາງຮາກຖານການພັດທະນາໃນໄລຍະຍາວໃຫ້ສິງກະໂປ. ຂະນະທີ່ການເປັນຜູ້ນໍາຂອງທ່ານ ຊ່ວຍສ້າງບັນຍາກາດການເມືອງທີ່ສອດຄ່ອງກົມກືນ.

ແຕ່ຄວາມເຂັ້ມແຂງເດັດຂາດຂອງທ່ານ ລີ ກວນ ຢູ ໄດ້ເຮັດໃຫ້ເກີດລັດທິອໍານາດນິຍົມຂຶ້ນ ຄືລັດຖະບານສິງກະໂປມີອໍານາດທັງ​ໝົດໃນການລົງໂທດຜູ້ທີ່ບໍ່ເຫັນພ້ອມ ຫຼື ວິພາກວິຈານລັດຖະບານ ນໍາໄປສູ່ການຈັບກຸມຄຸມຂັງນັກການເມືອງຝ່າຍຄ້ານ ແລະ ຜູ້ນໍາສະຫະພາບແຮງງານຕ່າງໆຈໍານວນຫຼາຍ.

ທ່ານ ລີ ກວນ ຢູ ກ່າວວ່າ: ໃຜກໍຕາມທີ່ປົກຄອງສິງກະໂປຕ້ອງມີຄວາມເຂັ້ມແຂງເດັດຂາດ ເພາະນີ້ບໍ່ແມ່ນເກມ ແຕ່ເປັັນຊີວິດຈິງ. ດັ່ງນັ້ນ ໃນ​ໄລຍະທີ່ຕົນຢູ່ໃນອໍານາດຈະບໍ່ມີໃຜລຶບລ້າງສິ່ງທີ່ຕົນໃຫ້ເວລາທັ້ງຊີວິດສ້າງຂຶ້ນມາໄດ້.