ອິນເດຍສັກວັກຊີນຕ້ານໂຄວິດໄປແລ້ວປະມານ 1 ພັນລ້ານໂດສ ຫລາຍສຸດເປັນອັນດັບ 2 ຂອງໂລກ ຮອງຈາກຈີນ
ວັນທີ 22 ຕຸລາ 2021, ຈາກການຕິດຕາມສະຖານະການໂຄວິດ ແລະ ການສັກວັກຊີນຕ້ານໂຄວິດ ໂດຍ Johns Hopkins University & Medicine ລາຍງານວ່າ: ອິນເດຍເປັນປະເທດທີ 2 ຂອງໂລກທີ່ເດີນໜ້າສັກວັກຊີນໄປແລ້ວປະມານ 1 ພັນລ້ານໂດສ ຫລາຍສຸດໃນທາງປະລິມານ ເປັນອັນດັບ 2 ຮອງຈາກຈີນ (2,24 ພັນລ້ານໂດສ).
ພົນລະເມືອງປະມານ 20% ຂອງພົນລະເມືອງອິນເດຍທົ່ວປະເທດ 1,38 ພັນລ້ານຄົນ ເຂົ້າຮັບວັກຊີນຄົບໂດສແລ້ວ ທາງການເລັ່ງເດີນໜ້າສັກວັກຊີນເຂັມທີ 2 ໃຫ້ປະຊາຊົນ ໂດຍລັດອຸດຕໍປະເທດເປັນລັດທີ່ສັກວັກຊີນໃຫ້ປະຊາຊົນຫລາຍທີ່ສຸດໃນທາງປະລິມານ (ປະມານ 122 ລ້ານໂດສ). ຂະນະທີ່ລັດມະຫາຣາກລະເປັນລັດທີ່ສັກວັກຊີນເຂັມ 2 ໃຫ້ພົນລະເມືອງຫລາຍທີ່ສຸດຂອງອິນເດຍ (28 ລ້ານໂດສ).
ໂດຍວັກຊີນທີ່ໃຊ້ສັກເກືອບ 90% ເປັນວັກຊີນ AstraZeneca ທີ່ຜະລິດຂຶ້ນພາຍໃນອິນເດຍເອງ ໂດຍສະຖາບັນເຊຣຳແຫ່ງຊາດອິນເດຍ (Serum Institute of India) ເຊິ່ງທາງການອິນເດຍຕັ້ງເປົ້າໃຫ້ພົນລະເມືອງໄວຜູ້ໃຫຍ່ປະມານ 944 ລ້ານຄົນໄດ້ຮັບວັກຊີນພາຍໃນປີນີ້ ໂດຍປັດຈຸບັນຜູ້ທີ່ມີອາຍຸຕໍ່າກວ່າ 18 ປີ ເຊິ່ງມີປະມານ 40% ຂອງພົນລະເມືອງຍັງບໍ່ໄດ້ເຂົ້າຮັບວັກຊີນເຂັມທຳອິດແຕ່ຢ່າງໃດ.
ຫລ້າສຸດ, ອິນເດຍມີຜູ້ຕິດເຊື້ອສະສົມ 34.127.450 ຄົນ, ເສຍຊີວິດແລ້ວ 452.811 ຄົນ, ມີຜູ້ກຳລັງປິ່ນປົວ 178.831 ຄົນ, ຜູ້ຕິດເຊື້ອໃໝ່ມີປະມານ 18.000 ຄົນ ຫລຸດລົງມາຈາກໄລຍະທີ່ການແຜ່ລະບາດສູງສຸດ ເຄີຍມີຜູ້ຕິດເຊື້ອສູງເຖິງ 414.188 ຄົນພາຍໃນວັນດຽວ ເມື່ອວັນທີ 6 ພຶດສະພາຜ່ານມາ ໃນໄລຍະທີ່ເຊື້ອເດວຕາເລີ່ມລະບາດຢ່າງໜັກ ຈົນກາຍເປັນເຊື້ອສາຍພັນຫລັກໃນຫລາຍປະເທດທົ່ວໂລກໃນປັດຈຸບັນ.
ອ້າງອີງ:
- https://coronavirus.jhu.edu/map.html
- https://www.aljazeera.com/news/2021/10/21/india-one-billion-covid-vaccine-doses-song-film
- https://apnews.com/article/coronavirus-pandemic-business-health-asia-india-6946d0dd95d43975e383d28726af3fe4
- https://www.mohfw.gov.in/
