ອິນໂດເນເຊຍເຈລະຈາ Merck ຕັ້ງໂຮງງານຜະລິດຢາເມັດຕ້ານໂຄວິດເອງ

ລັດຖະບານອິນໂດເນເຊຍເຈລະຈາບໍລິສັດ Merck ຕັ້ງໂຮງງານຜະລິດຢາ Molnupiravir ໃນອິນໂດເນເຊຍ.

ສື່ທ້ອງຖິ່ນອິນໂດເນເຊຍລາຍງານວ່າ: ລັດຖະບານອິນໂດເນເຊຍກຳລັງເຈລະຈາກັບບໍລິສັດ Merck ຂອງອາເມລິກາ ຜູ້ຜະລິດ Molnupiravir (ໂມລນູພິຣາເວຍ) ຢາປິ່ນປົວໂຄວິດ-19 ກ່ຽວກັບຄວາມເປັນໄປໄດ້ໃນການຕັ້ງໂຮງງານຜະລິດຢາດັ່ງກ່າວໃນອິນໂດເນເຊຍ.

ທ່ານ ລູຮັດ ບິນຊາ ປັນໄຈຕັນ (Luhut Binsar Pandjaitan) ລັດຖະມົນຕີກະຊວງການລົງທຶນຂອງອິນໂດເນເຊຍ ເປີດເຜີຍວ່າ: ວັນທີ 20 ຕຸລາ, ທ່ານພ້ອມລັດຖະມົນຕີກະຊວງສາທາລະນະສຸກເດີນທາງໄປອາເມລິກາເພື່ອເຈລະຈາກັບບໍລິສັດຜູ້ຜະລິດຢາໃນບັນຫາດັ່ງກ່າວ.

ພ້ອມກ່າວວ່າ: ອິນໂດເນເຊຍຕ້ອງການເປັນຫລາຍກວ່າຜູ້ຊື້ ແລະ ຫວັງເປັນຢ່າງຍິ່ງວ່າຈະມີການລົງທຶນ ແລະ ຕັ້ງໂຮງງານຜະລິດຢາໂມລນູພິຣາເວຍໃນອິນໂດເນເຊຍໃນອະນາຄົດ.

ສ່ວນທ່ານ ບູດີ ກູນາດີ ຊາດິຄິນ ລັດຖະມົນຕີກະຊວງສາທາລະນະສຸກອິນໂດເນເຊຍ ກ່າວວ່າ: ຖ້າໃຊ້ຢາດັ່ງກ່າວຄຽງຄູ່ໄປກັບວັກຊີນທີ່ມີປະສິດທິພາບ ຈະຊ່ວຍໃຫ້ເຮົາສາມາດຕໍ່ສູ້ກັບໂຄວິດ-19 ໃຫ້ກາຍເປັນພຽງພະຍາດປະຈຳຖິ່ນໄດ້ໄວຂຶ້ນ.

ທ່າມກາງການເຝົ້າຕິດຕາມວ່າຢາໂມລນູພິຣາເວຍຈະເປັນຕົວປ່ຽນເກມໃນການຕໍ່ສູ້ກັບໂຄວິດ-19 ທີ່ແຜ່ລະບາດໄປທົ່ວໂລກ ຫລັງຈາກຜົນການທົດລອງໄລຍະທີ 3 ພົບວ່າຢາດັ່ງກ່າວສາມາດຫລຸດຄວາມສ່ຽງຂອງອາການຮຸນແຮງ ແລະ ການເສຍຊີວິດຈາກໂຄວິດ-19 ໄດ້ເຄິ່ງໜຶ່ງ, ຂະນະທີ່ລັດຖະບານຫລາຍປະເທດເຈລະຈາສັ່ງຊື້ຢາດັ່ງກ່າວແລ້ວ.

ທັງນີ້, ອິນໂດເນເຊຍສາມາດຄວບຄຸມການແຜ່ລະບາດຂອງໂຄວິດ-19 ໄດ້ໃນໄລຍະຜ່ານມາ ໂດຍມີຜູ້ຕິດເຊື້ອໃໝ່ຫລຸດລົງເຫລືອຕໍ່າກວ່າ 1.000 ຄົນຕໍ່ວັນ ເຊິ່ງຫລຸດລົງຫລາຍຈາກຜູ້ຕິດເຊື້ອ 500.000 ກວ່າຄົນຕໍ່ວັນໃນໄລຍະ 3 ເຖິງ 4 ເດືອນຜ່ານມາ, ຂະນະທີ່ຜູ້ເສຍຊີວິດຕອນນີ້ຫລຸດລົງເຫລືອວັນລະຕໍ່າກວ່າ 100 ຄົນ.

ນອກຈາກນີ້, ຍັງມີລາຍງານວ່າຜູ້ຜະລິດຢາຂອງຟີລິບປິນຫລາຍແຫ່ງໄດ້ເລີ່ມຫາລືກັບ Merck ກ່ຽວກັບຄວາມເປັນໄປໄດ້ທີ່ຈະຂໍອະນຸຍາດຜະລິດຢາໂມລນູພິຣາເວຍໃນປະເທດ.

ຂະນະທີ່ຜູ້ຜະລິດຢາໃນອິນເດຍ 5 ແຫ່ງໄດ້ຮ່ວມມືກັບ Merck ເພື່ອຜະລິດຢາໂມລນູພິຣາເວຍ ເພື່ອເລັ່ງຄວາມພ້ອມໃນອິນເດຍໃນການແກ້ໄຂການແຜ່ລະບາດຮອບໃໝ່ໃນປະເທດ ເຊິ່ງການຮ່ວມມືດັ່ງກ່າວເຮັດໃຫ້ບໍລິສັດຕ່າງໆໄດ້ຮັບອະນຸຍາດໃຫ້ຜະລິດ ແລະ ຈັດຫາຢາດັ່ງກ່າວໃຫ້ອິນເດຍ ແລະ ອີກ 100 ກວ່າປະເທດທີ່ມີລາຍໄດ້ໜ້ອຍ ແລະ ປານກາງ.

ອ້າງອີງ:

https://www.posttoday.com/world/666019?fbclid=IwAR3nurExWzIJnYRh31sDRuEl_G5BdPXoNwP_c3zJAs-ngOS3fYVaMWoUQOo