WHO ເຈລະຈາ Merck ຂໍຊື້ຢາ ໂມລນູພິຣາເວຍ 10 ໂດລາ/ຫລັກສູດ ຊ່ວຍປະເທດທຸກຍາກ

ອົງການອະນາໄມໂລກເຜີຍກຳລັງເຈລະຈາກັບ Merck ເພື່ອຊື້ຢາໂມລນູພິຣາເວຍ ໃນລາຄາ 10 ໂດລາຕໍ່ 1 ຫລັກສູດ ຊ່ວຍປະເທດທຸກຍາກໃຫ້ສາມາດເຂົ້າເຖິງຢາຕ້ານໂຄວິດ-19 ໄດ້ຢ່າງເທົ່າທຽມ.

ວັນທີ 20 ຕຸລາ 2021, ສຳນັກຂ່າວຣອຍເຕີລາຍງານໂດຍອ້າງຮ່າງເອກະສານສະບັບໜຶ່ງລະບຸວ່າ: ອົງການອະນາໄມໂລກ (WHO) ກຳລັງດຳເນີນໂຄງການທີ່ຈະຊ່ວຍໃຫ້ປະເທດທຸກຍາກສາມາດເຂົ້າເຖິງວັກຊີນ, ການທົດລອງ ແລະ ການປິ່ນປົວພະຍາດໂຄວິດ-19 ໄດ້ຢ່າງເທົ່າທຽມ ໂດຍຕັ້ງເປົ້າໄວ້ວ່າຈະຈັດຫາຢາປິ່ນປົວຜູ້ຕິດເຊື້ອທີ່ອາການບໍ່ຮຸນແຮງໃນລາຄາພຽງ 10 ໂດລາຕໍ່ 1 ຫລັກສູດ ໃຫ້ປະເທດເຫລົ່ານັ້ນ.

ເອກະສານດັ່ງກ່າວລະບຸວ່າ: ໂຄງການ Access to COVID-19 Tools Accelerator (ACT-A) ໄດ້ກຳນົດເປົ້າໝາຍໄວ້ຈົນຮອດເດືອນກັນຍາວ່າຈະຈັດສົ່ງຊຸດກວດໂຄວິດ-19 ປະມານ 1 ລ້ານຊຸດໃຫ້ກຸ່ມປະເທດລາຍໄດ້ຕໍ່າ ແລະ ຈັດຫາຢາປິ່ນປົວຜູ້ຕິດເຊື້ອ 120 ລ້ານຄົນທົ່ວໂລກ ຈາກທີ່ມີການຄາດການໄວ້ວ່າຈະມີຜູ້ຕິດເຊື້ອໃໝ່ 200 ລ້ານຄົນໃນອີກ 12 ເດືອນຕໍ່ໜ້າ.

ເຖິງວ່າ WHO ຈະບໍ່ໄດ້ລະບຸໂດຍກົງເຖິງການຈັດຊື້ຢາໂມລນູພິຣາເວຍ, ແຕ່ໃນເອກະສານມີການກ່າວເຖິງແຜນການຈັດຊື້ຢາທີ່ໃຊ້ຮັບປະທານຊະນິດໃໝ່ສຳລັບການປິ່ນປົວຜູ້ຕິດເຊື້ອໂຄວິດ-19 ທີ່ມີອາການບໍ່ຮຸນແຮງເຖິງປານກາງ ເຊິ່ງປັດຈຸບັນຢາໂມລນູພິຣາເວຍຂອງ Merck ມີທ່າອ່ຽງຈະເປັນໜຶ່ງໃນຢາປິ່ນປົວຜູ້ຕິດເຊື້ອໂຄວິດ-19 ອາການບໍ່ຮຸນແຮງທີ່ໄດ້ຜົນທາງບວກໃນການທົດລອງ ແລະ ກຳລັງຢູ່ລະຫວ່າງການອະນຸມັດໃຊ້ເປັນກໍລະນີສຸກເສີນຈາກສຳນັກງານອາຫານ ແລະ ຢາອາເມລິກາ (FDA).

ທັງນີ້, ຢາໂມລນູພິຣາເວຍ 1 ຫລັກສູດ ປະກອບມີຢາຂະໜາດ 200 ມິນລີກຣາມ ຈຳນວນ 40 ເມັດສຳລັບຜູ້ຕິດເຊື້ອ 1 ຄົນ ໂດຍຜູ້ຕິດເຊື້ອຈະຮັບປະທານຢາມື້ລະ 2 ຄັ້ງໆລະ 4 ເມັດ ເປັນເວລາ 5 ວັນ.

ຖ້າໂຄງການ ACT-A ເຈລະຈາກັບ Merck ສຳເລັດ ເທົ່າກັບວ່າຈະສາມາດຊື້ຢາໂມລນູພິຣາເວຍໃນລາຄາຖືກເມື່ອທຽບໃສ່ອາເມລິກາສັ່ງຊື້ຢາດັ່ງກ່າວໃນລາຄາຫລັກສູດລະ 700 ໂດລາ ໂດຍລັດຖະບານອາເມລິກາໄດ້ສັ່ງຊື້ຢາໂມລນູພິຣາເວຍແລ້ວຈຳນວນ 1,7 ລ້ານຫລັກສູດ ໂດຍໃຊ້ເງິນ 1.200 ລ້ານໂດລາ.

ນອກຈາກນີ້, ໂຄງການ ACT-A ຍັງມີແຜນຊື້ຢາອີກ 4,3 ລ້ານຫລັກສູດ ສຳລັບປິ່ນປົວຜູ້ຕິດເຊື້ອໂຄວິດ-19 ທີ່ມີອາການຮຸນແຮງ ໂດຍມີການປະເມີນລາຄາໄວ້ທີ່ 28 ລ້ານໂດລາຕໍ່ຫລັກສູດ, ແຕ່ຍັງບໍ່ມີການລະບຸຊື່ຢາຊະນິດໃດ ລວມທັງການຈັດຫາອົກຊີທາງການແພດໃຫ້ພຽງພໍຮອງຮັບຜູ້ຕິດເຊື້ອວິກິດຈຳນວນ 6-8 ລ້ານຄົນພາຍໃນເດືອນກັນຍາປີໜ້າ.

ອ້າງອີງ:

https://www.reuters.com/…/exclusive-who-led-programme…/