7 ເດືອນຕົ້ນປິ 2021 ຂຶ້ນທະບຽນລົດໄດ້ 23.842 ຄັນ ແລະ ອອກໃບຂັບຂີ່ຈໍານວນ 12.488 ໃບ.
ທ່ານ ບຸນປອນ ບຸນສົມຫວັງ ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ ນະຄອນຫລວງວຽງຈັນ ( ນວ ) ໃຫ້ຮູ້ວ່າ: ໃນໄລຍະ 7 ເດືອນຜ່ານມາທາງກອງຄຸ້ມຄອງພາຫະນະ ແລະ ການຂັບຂີ່ ນວ ໄດ້ສຸມໃສ່ທິດຊີ້ນຳຂອງນະຄອນຫລວງວຽງຈັນ ໃນການແກ້ໄຂບັນຫາ ຕາມທິດ 3 ຫລຸດ 3 ເພີ່ມ ໂດຍສະເພາະແມ່ນຫລຸດຜ່ອນອຸບັດຕິເຫດຕາມທ້ອງຖະໜົນ ໂດຍການຮັບປະກັນການກວດກາເຕັກນິກຍານພາຫະນະ ໃຫ້ໄດ້ຕາມມາດຕະຖານ, ເອົາໃຈໃສ່ເພີ່ມຄວາມຮັບຊອບທາງດ້ານການເມືອງຂອງສະມາຊິກພັກ-ພະນັກງານລັດຖະກອນ ແລະ ເພີ່ມຄວາມສາມາດໃນການເກັບລາຍຮັບໃຫ້ໄດ້ຕາມແຜນການ.
ປັດຈຸບັນ ໄດ້ມີການຂະຫຍາຍຫ້ອງການ 2 ສາຂາຄື: ຫ້ອງການຄຸ້ມຄອງພາຫະນະ ແລະ ການຂັບຂີ່ ສາຂາເມືອງນາຊາຍທອງ ( ນ້ຳຊ່ວງ ) ແລະ ຫ້ອງການຄຸ້ມຄອງພາຫະນະ ແລະ ການຂັບຂີ່ ສາຂາເມືອງໄຊທານີ ເຊິ່ງທັງສອງສາຂາ ສາມາດໃຫ້ບໍລິການຄືກັນກັບຢູ່ທົ່ງປົ່ງເຊັ່ນ: ຂຶ້ນທະບຽນໃໝ່, ຕໍ່ທະບຽນ, ໂອນກຳມະສິດ, ຕໍ່ໃບຂັບຂີ່ ແລະ ຕິດປ້າຍລົດ.
ທ່ານກ່າວຕື່ມວ່າ: ໃນປີ 2020 ພວກເຮົາສາມາດໃຫ້ບໍລິການຂຶ້ນທະບຽນລົດຈໍານວນ 47.316 ຄັນ, ອອກໃບ ຂັບຂີ່ 41.340 ໃບ ແລະ ເກັບລາຍຮັບໄດ້ ທັງໝົດ 23,9 ຕື້ກວ່າກີບ. ສ່ວນໃນ 6 ເດືອນ ຕົ້ນປີ 2021 ພວກເຮົາສາມາດໃຫ້ບໍລິການຂື້ນທະບຽນລົດຈໍານວນ 19.393 ຄັນ, ອອກໃບຂັບຂີ່ 10.645 ໃບ ແລະ ເກັບລາຍຮັບໄດ້ທັງໝົດ 10,3 ຕື້ກີບ, ເມື່ອທຽບກັບປີຜ່ານມາ ຈຳນວນຕົວເລກ ການຂຶ້ນທະບຽນລົດ ແລະ ອອກໃບຂັບຂີ່ແມ່ນຫລຸດລົງ ພ້ອມດຽວກັນນີ້ລາຍຮັບກໍຫລຸດລົງເຊັ່ນດຽວກັນ ເນື່ອງຈາກຜົນກະທົບຂອງການແຜ່ລະບາດຂອງພະຍາດໂຄວິດ 19.
ການໃຫ້ບໍລິການທາງກອງຄຸ້ມຄອງພາຫະນະ ແລະ ການຂັບຂີ່ ທັງ 3 ບ່ອນ ໃນນະຄອນຫລວງວຽງຈັນ ແມ່ນມີການເຂັ້ມງວດກວດກາມາດຕະການປ້ອງກັນໂຄວິດ ຢູ່ທາງເຂົ້າ, ຜູ້ທີ່ຈະສາມາດເຂົ້າຮັບບໍລິການໄດ້ ຕ້ອງໄດ້ຮັບວັກຊີນ ປ້ອງກັນໂຄວິດ-19 ຢ່າງໜ້ອຍຈຳນວນ 1 ໂດສຂຶ້ນໄປ ຈິ່ງອະນຸຍາດໃຫ້ເຂົ້າໃຊ້ບໍລິການ, ໃຊ້ເຄື່ອງວັດແທກອຸນນະພູມແບບອໍໂຕ້ ມີນ້ຳຢາຂ້າເຊື້ອໃນໂຕ, ຈັດບ່ອນນັ່ງໃຫ້ຜູ້ມາໃຊ້ບໍລິການ ( ຢູ່ໜ້າຕຶກ ) ໂດຍຮັກສາໄລຍະຫ່າງ, ການກວດເຕັກນິກລົດ ແມ່ນໃຫ້ເຈົ້າຂອງລົດຂັບຂຶ້ນບ່ອນກວດເອງ ກໍລະນີເຈົ້າຂອງຂັບຂຶ້ນບໍ່ໄດ້ ພະນັກງານເຮົາຈິ່ງຊ່ວຍຂັບຂຶ້ນໃຫ້ ເພື່ອປ້ອງກັນທັງສອງຝ່າຍ. ວິທີດຳເນີນເອກະສານແມ່ນ ຍື່ນເອກະສານປະໄວ້ໂຕະທີ່ຈັດກຽມໃຫ້ ໂດຍຮັກສາໄລຍະຫ່າງ 1 ແມັດຂຶ້ນໄປ ເມື່ອປະກອບເອກະສານສຳເລັດທຸກຢ່າງແລ້ວ ພະນັກງານຈະເອີ້ນຊື່ມາຮັບເອົາຕາມລຳດັບ.
