ພຽງ 15 ວັນ ຢູ່ນະຄອນຫລວງວຽງຈັນ ມີຜູ້ເສຍຊີວິດ 3 ຄົນ ແລະ ບາດເຈັບ 20 ຄົນຈາກອຸປະຕິເຫດທ້ອງຖະໜົນ

ພະແນກຕຳຫລວດຈະລາຈອນ ນະຄອນຫລວງວຽງຈັນ ລາຍງານວ່າ:  ໃນໄລຍະແຕ່ວັນທີ 1-15 ຕຸລາ 2021 ທົ່ວນະຄອນຫລວງວຽງຈັນ ມີອຸບັດຕິເຫດເກີດຂຶ້ນ 17 ກໍລະນີ,  ມີຜູ້ໄດ້ຮັບບາດເຈັບ 20 ຄົນ ແລະ ເສຍຊີວິດ 3 ຄົນ.

ທ່ານ ພັທ ວິລະພົງ ສະເໜ່ຫາ ຫົວໜ້າພະແນກຕຳຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ທົ່ວນະຄອນຫລວງວຽງຈັນມີອຸບັດຕິເຫດເກີດຂຶ້ນ 17 ຄັ້ງ, ໃນນີ້ ປະເພດລົດຍົນຕໍາກັບລົດຍົນ 5 ຄັ້ງ, ລົດຍົນຕໍາກັບລົດຈັກ 8 ຄັ້ງ, ລົດຈັກຕຳກັບລົດຈັກ 1 ຄັ້ງ, ລົດຈັກລົ້ມເອງ 1 ຄັ້ງ ແລະ ອື່ນໆ 2 ຄັ້ງ; ຄົນໄດ້ຮັບບາດເຈັບທັງໝົດ 20 ຄົນ, ບາດເຈັບເລັກໜ້ອຍ 5 ຄົນ, ບາດເຈັບສົມຄວນ 11 ຄົນ, ບາດເຈັບສາຫັດ 4 ຄົນ ແລະ ມີຜູ້ເສຍຊີວິດ 3 ຄົນ, ໄລຍະເວລາທີ່ເກີດອຸບັດຕິເຫດແມ່ນເວລາແຕ່ 14:00-23:00 ໂມງ.

ສາເຫດເກີດຈາກນັກຂັບຂີ່ບໍ່ປະຕິບັດກົດລະບຽບຈະລາຈອນ ໂດຍສະເພາະການປ່ຽນທິດທາງເດີນລົດບໍ່ຮັບປະກັນ, ການຊີງແຊງຂຶ້ນໜ້າ, ການຂັບຂີ່ລົດດ້ວຍຄວາມໄວບໍ່ຮັກສາໄລຍະຫ່າງ ແລະ ຖະ ໜົນທີ່ເກີດອຸບັດຕິເຫດເກີດຂຶ້ນຫຼາຍແມ່ນຖະໜົນ ເລກ 10 (ທ່າງ່ອນ), ຖະໜົນ 13 ເໜືອ ແລະ 13 ໃຕ້, ຖະໜົນກໍາແພງເມືອງ, ຖະໜົນສຸພານຸວົງ ແລະ ອື່ນໆ ລວມມູນຄ່າຄວາມເສຍຫາຍ 3 ຮ້ອຍກວ່າລ້ານກີບ.

ກອງບັນຊາການ ປກສ ນະຄອນຫລວງວຽງຈັນ ຮຽກຮ້ອງມາຍັງນັກຂັບຂີ່ຜູ້ໃຊ້ລົດໃຊ້ຖະໜົນ ຈົ່ງຊ່ວຍກັນເປັນເຈົ້າການ ໃນການປະຕິບັດກົດລະບຽບຈະລາຈອນຢ່າງເຂັ້ມງວດ ເພື່ອຫລຸດຜ່ອນບັນການເກີດອຸປະຕິເຫດ ແລະ ພ້ອມກັນປະຕິບັດຕາມ ຄໍາສັ່ງເລກທີ 15/ນຍ ແລະ ແຈ້ງການເລກທີ 37/ຈນວ, ໃນໄລຍະສືບຕໍ່ເພີ່ມທະວີການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂ ການແພ່ລະບາດຂອງພະຍາດໂຄວິດ-19 ຢູ່ນະຄອນຫລວງວຽງຈັນ ແຕ່ວັນທີ 16–30 ຕຸລາ 2021.