ລາວ ແລະ ອົງການຢູນິເຊັບ ຮັບຮອງເອົາແຜນງານການຮ່ວມມືສ້າງວິໄສທັດ ແລະ ເປົ້າໝາຍ ທີ່ສາມາດບັນລຸໄດ້ໃຫ້ກັບເດັກນ້ອຍລາວ

ວັນທີ 19 ຕຸລາ 2021​ ລັດຖະບານ ແຫ່ງ ສປປ ລາວ ແລະ ອົງການຢູນິເຊັບໄດ້ຈັດພິທີເປີດໂຕແຜນງານການຮ່ວມມື ສົກປີ 2022-2026 ຢ່າງເປັນທາງການ ໂດຍການເຂົ້າຮ່ວມຂອງຄະນະນໍາຂັ້ນສູງຈາກຫຼາຍກະຊວງ ແລະ ຂະແໜງການຕ່າງໆຂອງລັດຖະບານຜ່ານລະບົບປະຊຸມທາງໄກ, ໂດຍ ທ່ານນາງ ພອນວັນ ອຸທະວົງ, ຮອງລັດຖະມົນຕີ ກະຊວງແຜນການ ແລະ ການລົງທຶນ, ແລະ ປະທານຮ່ວມ ໂດຍ ທ່ານນາງ ດຣ ເພຍ ເຣເບນໂລ ບຣິໂຕ, ຜູ້ຕາງໜ້າອົງການ ຢູນີເຊັບ ປະຈຳ ສປປ ລາວ, ເຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ດຣ. ສີສຸກ ວົງວິຈິດ, ຮອງລັດຖະມົນຕີກະຊວງສາທາລະນະສຸກ, ພະນະທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ພະນະທ່ານ ລີປ່າວ ຢ່າງ, ເເລະ ຮອງປະທານສູນກາງສະຫະພັນແມ່ຍິງລາວ, ທ່ານນາງ ສິລິກິດ ບຸບຜາ, ເຊິ່ງແຕ່ລະທ່ານຕ່າງໄດ້ກ່າວຄໍາຖະແຫຼງການໃຫ້ຄໍາໝັ້ນສັນຍາ ຕໍ່ກັບ ແຜນງານການຮ່ວມມືສະບັບໃໝ່ນີ້ ແລະ ການປັບປູງສິດ ແລະ ສະຫວັດດີພາບຂອງເດັກນ້ອຍທຸກຄົນໃນ ສປປ ລາວ. ຜູ້ຕາງໜ້າ ແລະ ເອກອັກຄະລັດຖະທູດ ຂອງບັນດາຄູ່ຮ່ວມພັດທະນາຫຼັກ ກໍ່ໄດ້ໃຫ້ກຽດເຂົ້າຮ່ວມໃນພິທີດັ່ງກ່າວ. ລວມທັງໝົດມີຜູ້ເຂົ້າຮ່ວມປະມານ 160 ຄົນ ທີ່ໄດ້ສະແດງການສະໜັບສະໜູນໃນຂະບວນການ ແລະ ແຜນງານການຮ່ວມມືສະບັບໃໝ່ນີ້ ເພື່ອຜົນປະໂຫຍດສູງສຸດຂອງເດັກນ້ອຍລາວ.

ແຜນງານການຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການຢູນິເຊັບ ແມ່ນການສ້າງວິໄສທັດ ແລະ ເປົ້າໝາຍ ທີ່ສາມາດບັນລຸໄດ້ໃຫ້ກັບເດັກນ້ອຍລາວ. ແຜນງານນີ້ເເມ່ນຜ່ານການຄົ້ນຄວ້າພິຈາລະນາເຖີງສະພາບການຂອງເດັກນ້ອຍ, ຄວາມຕ້ອງການ ແລະສິດທິຂອງພວກເຂົາ ແລະ ຍັງສ້າງຂຶ້ນບົນພື້ນຖານຜົນສໍາເລັດທີ່ບັນລຸໄດ້ໃນຊຸມປີທີ່ຜ່ານມາ ເພື່ອແກ້ໄຂສິ່ງທ້າທາຍໃໝ່ໆ ໃຫ້ບັນລຸຜົນໄດ້ຮັບສໍາລັບເດັກທຸກຄົນ, ໂດຍສະເພາະເດັກນ້ອຍທີ່ມີຄວາມສ່ຽງຫຼາຍທີ່ສຸດ.

ທ່ານ ນາງ ພອນວັນ ອຸດທະວົງ, ຮອງລັດຖະມົນຕີ ກະຊວງແຜນການ ແລະ ການລົງທຶນ ແຫ່ງ ສປປ ລາວ, ກ່າວວ່າ: “ແຜນງານການຮ່ວມມືສະບັບໃໝ່ນີ້ ຈະປະກອບສ່ວນເຂົ້າໃສ່ການບັນລຸວິໄສທັດຂອງພວກເຮົາທີ່ວ່າ ພາຍໃນປີ 2026 ເດັກນ້ອຍ ແລະ ແມ່ຍິງ ຢູ່ໃນ ສປປ ລາວ, ໂດຍສະເພາະຜູ້ທີ່ມີດ້ອຍໂອກາດ ແລະ ມີຄວາມສ່ຽງຫຼາຍທີ່ສຸດ, ມີສິດໃນການມີຊີວິດລອດ, ພັດທະນາເຕັມຄວາມສາມາດ ແລະ ດໍາລົງຊີວິດຢູ່ໃນສະພາບແວດລ້ອມທີ່ມີຄວາມປອດໄພ. ຈຸດປະສົງຂອງແຜນງານນີ້ເເມ່ນມີຄວາມສໍາຄັນຫຼາຍ ເມື່ອພວກເຮົາຄໍານຶງເຖິງຜົນກະທົບທາງດ້ານເສດຖະກິດ-ສັງຄົມ ຈາກການລະບາດຂອງພະຍາດ ໂຄວິດ-19 ແລະ ຜົນສະທ້ອນທີ່ມັນໄດ້ສ້າງໃນຊີວິດຂອງຄອບຄົວ ແລະ ເດັກ ແລະ ກໍ່ໃຫ້ເກີດມີຄວາມທຸກຍາກຫລາຍຂື້ນ”

ກອບການຮ່ວມມືນີ້, ເຊິ່ງໄດ້ພັດທະນາຂຶ້ນຜ່ານຂະບວນການທີ່ມີສ່ວນຮ່ວມ ໂດຍການປຶກສາຫາລືຢ່າງເປີດກວ້າງກັບຫຼາກຫຼາຍພາກສ່ວນທີ່ກ່ຽວຂ້ອງ, ຈະສະໜັບສະໜູນແຜນຍຸດທະສາດຕ່າງໆ ເພື່ອປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ ທີ່ກ່ຽວກັບເດັກໃນ ສປປ ລາວ ແລະ ໃນເວລາດຽວກັນກໍ່ຈະຊ່ວຍແກ້ໄຂບັນຫາການຂາດເຂີນຫຼາຍໆມິຕິທີ່ເດັກກໍາລັງປະເຊີນຢູ່, ເຊິ່ງລວມມີ ບັນຫາດ້ານສຸຂະພາບ, ໂພຊະນາການ, ນໍ້າສະອາດ, ສຸຂາພິບານ ແລະ ສຸຂະອະນາໄມ, ການສຶກສາ ແລະ ການປົກປ້ອງທາງສັງຄົມ.

ແຜນງານການຮ່ວມມືສະບັບໃໝ່ນີ້ ຍັງສອດຄ່ອງກັບບູລິມະສິດ ຂອງ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 9 ແລະ ຍັງໄດ້ກໍານົດຫຼາຍຂົງເຂດພັດທະນາເສດຖະກິດ-ສັງຄົມ ທີ່ ອົງການຢູນິເຊັບ ຈະໃຫ້ການສະໜັບສະໜູນໃນອີກ 5 ປີຕໍ່ໜ້າ.

ທ່ານນາງ ດຣ. ເພຍ ເຣເບນໂລ ບຣິໂຕ, ຜູ້ຕາງໜ້າຂອງອົງການຢູນິເຊັບ ປະຈໍາ ສປປ ລາວ. ນອກຈາກນັ້ນ, ທ່ານ ຍັງໄດ້ເນັ້ນໃຫ້ຮູ້ວ່າ “ນັບຕັ້ງແຕ່ອົງການຢູນິເຊັບໄດ້ສ້າງຕັ້ງຫ້ອງການ ປະຈໍາຢູ່ ສປປ ລາວ ໃນປີ 1973, ພວກເຮົາໄດ້ເຮັດວຽກໂດຍມີກອບການຮ່ວມມືກັບລັດຖະບານແຫ່ງ ສປປ ລາວ ມາແລ້ວຫຼາຍຊຸດ ແລະ ຂ້າພະເຈົ້າເຊື່ອໝັ້ນຢ່າງຍິ່ງວ່າ ການເປີດແຜນງານການຮ່ວມມື ສົກປີ 2022-2026 ຈະເປັນການເສີມຂະຫຍາຍວຽກງານ ແລະ ການຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການຢູນິເຊັບ,” ເຖິງ ສປປ ລາວ ຈະມີການພັດທະນາຫຼາຍ, ແຕ່ຄວາມບໍ່ເທົ່າທຽມກັນຍັງສົ່ງຜົນກະທົບເຖິງຮູບແບບການດໍາລົງຊີວິດຂອງເດັກທີ່ເກີດໃນ ສປປ ລາວ, ຫຼື ຕັ້ງແຕ່ຍັງບໍ່ທັນເກີດ. “ນີ້ແມ່ນເຫດຜົນທີ່ວ່າເປັນຫຍັງຄວາມເທົ່າທຽມຈຶ່ງເປັນໜຶ່ງໃນຫຼັກການສໍາຄັນທີ່ໃຊ້ເຂົ້າໃນການພັດທະນາແຜນງານການຮ່ວມມືສະບັບໃໝ່ນີ້.”

ເພື່ອບັນລຸວິໄສທັດດ້ານສິດທິ ແລະ ສະຫວັດດີພາບຂອງແມ່ຍິງ ແລະ ເດັກນ້ອຍໃນ ສປປ ລາວ ພາຍໃນປີ 2026, ແຜນງານການຮ່ວມມືສະບັບໃໝ່ນີ້ ຈະເນັ້ນໜັກເປັນພິເສດຕໍ່ການສ້າງຄວາມເຂັ້ມແຂງໃຫ້ລະບົບ, ເຊິ່ງເປັນບົດຮຽນຫຼັກທີ່ໄດ້ຮຽນຮູ້ຈາກແຜນງານການຮ່ວມມືສະບັບກ່ອນ, ເຊິ່ງມັນສໍາຄັນເປັນຢ່າງຍິ່ງເມື່ອເວລາທີ່ ສປປ ລາວ ຈະກ້າວໄປສູ່ການຫຼຸດພົ້ນອອກຈາກສະຖານະຄວາມເປັນປະເທດດ້ອຍພັດທະນາ.

ເພື່ອຖືເອົາເດັກນ້ອຍເປັນໃຈກາງ, ອົງການຢູນິເຊັບ ຈະເຮັດວຽກຢ່າງໃກ້ຊິດກັບຫຼາຍພາກສ່ວນທີ່ສໍາຄັນ ລວມທັງ ເດັກນ້ອຍ ແລະ ຊາວໜຸ່ມ ໂດຍຜ່ານວິທີການເຜີຍແຜ່ ແລະ ການສື່ສານ. ອົງການຢູນິເຊັບຈະສືບຕໍ່ເຮັດໜ້າທີ່ເປັນກະບອກສຽງໃຫ້ແກ່ເດັກນ້ອຍ ແລະ ເຍົາວະຊົນ ແລະ ໄວໜຸ່ມ ແລະ ຈະຂະຫຍາຍການພົວພັນກັບພາກເອກະຊົນ, ຂະຫຍາຍການຮ່ວມມືກັບບັນດາຂະແໜງການຂອງລັດ ທີ່ນອກເໜືອຈາກຂະແໜງສັງຄົມ.
ແຜນງານການຮ່ວມມືສະບັບໃໝ່ນີ້ ຍັງໃຫ້ຄວາມສໍາຄັນກັບການປະຕິບັດງານທີ່ກ່ຽວຂ້ອງກັບການປ່ຽນແປງຂອງດິນຟ້າອາກາດ ດ້ວຍຄວາມເຂົ້າໃຈທີ່ວ່າ ວິກິດການປ່ຽນແປງຂອງດິນຟ້າອາກາດ ແມ່ນວິກິດການທີ່ສົ່ງຜົນກະທົບຕໍ່ສິດທິເດັກ. ການປ່ຽນແປງຂອງດິນຟ້າອາກາດສາມາດເວົ້າໄດ້ວ່າເປັນສິ່ງທ້າທາຍອັນໃຫຍ່ທີ່ສຸດຕໍ່ກັບ ການຊົມໃຊ້ສິດທິຂອງເດັກ ແລະ ເປັນໄພຂົ່ມຂູ່ທີ່ສາມາດລົບກວນຄວາມຄືບໜ້າໃນການປັບປຸງຊີວິດການເປັນຢູ່ຂອງເດັກນ້ອຍໃນຫຼາຍທົດສະວັດທີ່ຜ່ານມາ. ດັ່ງນັ້ນ, ພວກເຮົາຈະສຸມໃສ່ຮັບປະກັນໃຫ້ລະບົບການດໍາເນີນງານຂອງທຸກໆຂະແໜງການທີ່ກ່ຽວຂ້ອງມີຄວາມເຂັ້ມແຂງຫຼາຍຂຶ້ນ ແລະ ສາມາດຮັບມືກັບການປ່ຽນແປງຂອງດິນຟ້າອາກາດໄດ້ຢ່າງມີປະສິດທິພາບ.

ພ້ອມທັງລະນຶກວ່າ ສຽງຂອງເດັກ ແລະ ບັນຫາອື່ນໆທີ່ກ່ຽວກັບເລື່ອງນີ້ແມ່ນຕ້ອງໄດ້ຖືກຮັບຟັງ, ອົງການຢູນິເຊັບ ຈະເສີມຂະຫຍາຍການມີສ່ວນຮ່ວມໃນການສ້າງແຜນງານ ກ່ຽວກັບ ການປ່ຽນແປງຂອງດິນຟ້າອາກາດ, ໂດຍສະເພາະແມ່ນວິທີການປະຕິບັດງານ; ສົ່ງເສີມການສົນທະນາຮ່ວມກັບຊຸມຊົນ ແລະ ສູນກາງ ກ່ຽວກັບ ການກະທໍາທີ່ອາດສົ່ງຜົນຕໍ່ການປ່ຽນແປງຂອງດິນຟ້າອາກາດ ໂດຍທີ່ໃຫ້ເດັກນ້ອຍ ແລະ ຊາວໜຸ່ມ ໄດ້ເຂົ້າຮ່ວມໃນການສົນທະນາ ແລະ ປະກອບຄໍາຄິດຄໍາເຫັນ.