ເຈົ້ານະຄອນຫລວງພະບາງ ແຈ້ງໂຈະການເຮັດບຸນອອກພັນສາປະວໍຣະນາ ແລະ ບຸນໄຫລເຮືອໄຟ

ເຈົ້ານະຄອນຫລວງພະບາງ ໄດ້ອອກແຈ້ງການໃນວັນທີ 18 ຕຸລາ 2021 ກ່ຽວກັບ ການໂຈະການເຮັດບຸນອອກພັນສາປະວໍລະນາ ແລະ ບຸນໄຫລເຮືອໄຟ ເນື່ອງຈາກສະພາບການລະບາດຂອງ ພະຍາດໂຄວິດ-19 ຢູ່ພາຍໃນປະເທດໄດ້ເພີ່ມຂຶ້ນຢ່າງຕໍ່ເນື່ອງ ຈຶ່ງບໍ່ສາມາດຈັດງານບຸນອອກພັນສາປະວໍຣະນາ ແລະ ບຸນໄຫລເຮືອໄຟ ຄືທຸກປີທີ່ຜ່ານມາ. ສະນັ້ນຈຶ່ງໄດ້ກຳນົດຂໍ້ຫ້າມ ແລະ ອະນຸຍາດ ດັ່ງນີ້:
1. ໂຈະບໍ່ໃຫ້ມີການໃສ່ບາດ ໄລຍະປິດເມືອງ (Lockdown) ແລະ ສືບຕໍ່ມາດຕະການຈົນເຖິງວັນທີ 30 ຕຸລາ 2021.
2. ໂຈະການຈັດ ບຸນນະມັດສະການພະທາດຈອມສີ, ບຸນມະຫາຊາດວັດວິຊຸນ ແລະ ບຸນໄຫລເຮືອໄຟ.
3. ຫ້າມບໍ່ໃຫ້ປະຊາຊົນບັນດາເຜົ່າ ອອກຈາກເຂດບ້ານຂອງຕົນ ເພື່ອໄປລອຍກະໂທງຢູ່ແມ່ນໍ້າຕ່າງໆ.
4. ສິ່ງໃດທີ່ມີຄວາມຈຳເປັນ ທີ່ຕິດພັນກັບຮີດຄອງ-ປະເພນີ ແມ່ນໃຫ້ເຮັດພິທີຄອບໄຄວ່ຄວາມເຊື່ອງຖື.
5. ອະນຸຍາດໃຫ້ໄຕ້ທູບ-ທຽນບູຊາຕາມວັດແຫ່ງຕ່າງໆ ແລະ ເຮືອນຊານບ້ານຊ່ອງ ຕາມຮີດຄອງປະເພນີ ແຕ່ໃຫ້ຈຳກັດຢູ່ໃນຂອບເຂດສະຖານທີ່ຂອງໃຜລາວ.